ນໍ້າດື່ມໂລມາຄຳ ມອບນໍ້າດື່ມຊ່ວຍແຂວງສະຫວັນນະເຂດຕ້ານໂຄວິດ-19

  ຫຼາຍພາກສ່ວນພາຍໃນແຂວງສະຫວັນນະເຂດ ຍັງສືບຕໍ່ມອບເຄື່ອງຊ່ວຍໃຫ້ແກ່ລັດເພື່ອຕ້ານ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງຕໍ່ເນື່ອງ ສະເພາະໃນວັນທີ 10 ເມສາ ຜ່ານມາທີ່ຫ້ອງວ່າການປົກຄອງແຂວງໂຮງງານຜະລິດນໍ້າດື່ມ-ນໍ້າກ້ອນໂລມາຄຳກໍໄດ້ນຳເອົານໍ້າດື່ມມູນຄ່າ 20,25 ລ້ານກີບ ມາມອບໃຫ້ແຂວງຊຶ່ງໃຫ້ກຽດຮັບໂດຍ ທ່ານ ປອ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດທັງເປັນປະທານຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ CIVID-19 ຂັ້ນ ແຂວງ ແລະຕາງໜ້າມອບຂອງທ່ານ ບຸນລໍ້າ ແກ້ວອາສາ ຜູ້ຈັດການໂຮງງານຜະລິດນໍ້າດື່ມ-ນໍ້າກ້ອນໂລມາຄຳໂດຍມີພາກສ່ວນທີ່ກ່ຽວຂ້ອງສອງຝ່າຍເຂົ້າຮ່ວມ.

  ທ່ານ ເກຍ ອຸ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ-ນໍ້າກ້ອນໂລມາຄຳເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມວ່າ: ການອຸປະຖຳນໍ້າດື່ມໃນຄັ້ງນີ້ກໍເພື່ອເປັນການປະກອບສ່ວນມອບໃຫ້ແຂວງສະຫວັນນະເຂດນຳໃຊ້ເຂົ້າໃນວຽກງານການປ້ອງກັນການແຜ່ລະບາດຂອງພະຍາດໂຄວິດ-19 ທີ່ລະບາດໃນຂະນະທີ່ຢູ່ໃນບັນດາປະເທດທົ່ວໂລກກໍຄືຢູ່ລາວເຮົາ ທັງນີ້ທ່ານຍັງໄດ້ຮຽກຮ້ອງໃຫ້ພໍ່ແມ່ປະຊາຊົນໂດຍສະເພາະນັກທຸລະກິດຜູ້ມີເງື່ອນໄຂຈົ່ງໄດ້ເສຍສະຫຼະຊັບສິນສ່ວນຕົວເປັນເງິນຄຳ ຫຼືອຸປະ ກອນກໍໄດ້ປະກອບສ່ວນຕ້ານໂຄວິດ-19 ຊ່ວຍລັດຖະບານເປັນຕົ້ນແມ່ນອົງການປົກຄອງທ້ອງຖີ່ນທຸກຂັ້ນເພື່ອເຮັດແນວໃດໃຫ້ລາວເຮົາສາມາດຜ່ານພົ້ນວິດກິດໂຄວິດ-19 ນີ້ໂດຍໄວ.

  ສຳລັບໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳແມ່ນໄດ້ໃຫ້ຄວາມສຳຄັນເປັນພິເສດຕໍ່ການຈັດຕັ້ງປະຕິບັດບັນດາຄຳສັ່ງ ແລະແຈ້ງການຕ່າງໆຂອງລັດແຕ່ລະຂັ້ນ ແລະຍັງໄດ້ເອົາໃຈໃສ່ຢ່າງເຂັ້ມງວດຮ່ວມແຮງຮ່ວມໃຈໃນການສະກັດກັ້ນ ແລະຕ້ານການແຜ່ລະບາດຂອງພະຍາດໂຄວິດ-19 ພາຍໃນໂຮງງານຢ່າງສະໝໍ່າສະເໝີຕະ ຫຼອດມາ.

-------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 20/04/2020