ຕະຫຼາດລາວ-ອົດຊີ ຫຼຸດຄ່າເຊົ່າໃຫ້ພໍ່ຄ້າ-ແມ້ຄ້າ

  ຕະຫຼາດລາວ-ອົດຊີ ໜຶ່ງຕະຫຼາດຂອງນະຄອນຫຼວງວຽງຈັນ ທີ່ມີສະຖານທີ່ໃຫຍ່ກວ້າງຂວາງສາມາດຮອງຮັບແມ່ຄ້າຊາວຂາຍປະຈຸບັນໄດ້ມີນະໂຍບາຍໃຫ້ແກ່ພໍ່ຄ້າ-ແມ່ຄ້າໂດຍມີການຫຼຸດເກັບຄ່າເຊົ່າ ແລະຄ່າໃຊ້ຈ່າຍຕ່າງໆ ສະເລ່ຍ 15%-20% ຂອງແຕ່ລະມື້; ທັງມີການວັດແທກອຸນຫະພູມທຸກຄົນທີ່ເຂົ້າມາບໍລິການໃນຕະຫຼາດ;

   ສ້າງຄວາມສະດວກ ແລະໃຫ້ແມ່ຄ້າທີ່ມາຊື້ ແລະມາຂາຍສິນຄ້າກະສິກໍາ, ເຄື່ອງອຸປະໂພກ-ບໍລິໂພກ ເພື່ອປ້ອນສິນຄ້າເຫຼົ່ານີ້ໃຫ້ພຽງພໍກັບປະຊາຊົນລາວທຸກຄົນເພື່ອການດໍາລົງຊິວິດໃຫ້ມີຄວາມຕ້ານທານສູ້ກັບພະຍາດນີ້ໃຫ້ຜ່ານພົ້ນໄປພ້ອມໆກັນ.

  ທ່ານ ນາງ ໄຊສົງຄາມ ສີຄໍາແພງ ຜູ້ອໍານວຍການຕະຫຼາດລາວ-ອົດຊີ ໄດ້ໃຫ້ສຳພາດຕໍ່ສື່ມວນຊົນຮູ້ວ່າ: ກ່ຽວກັບນະໂຍບາຍໃຫ້ພໍ່ຄ້າ-ແມ່ຄ້າ ແລະມາດຕະການທີ່ຕະຫຼາດວາງອອກຊຶ່ງທຸກຄົນທີ່ມາໃຊ້ບໍລິການໃນຕະຫຼາດແມ່ນມີການກວດກາຄົນ 24 ຊົ່ວໂມງ ໂດຍການວັດແທກອຸນຫະພູມທຸກຄົນທີ່ເຂົ້າມາໃນຕະຫຼາດ, ຖ້າພົບຜູ້ມີອຸນຫະພູມຮ່າງກາຍສູງເກີນ 37,5 ອົງສາ ແລະມີອາການໄອ, ຈາມ, ຕ່າງໆ ທີ່ມີອາການຄ້າຍຄືພະຍາດໂຄວິດຕາມທີ່ທາງກະຊວງສາທາລະນະສຸກໄດ້ແຈ້ງໄວ້ນັ້ນແມ່ນພວກເຮົາໄດ້ແນະນໍາໃຫ້ກັບບ້ານພັກຜ່ອນ ຫຼືໄປຫາແພດສະເພາະທີ່ທາງການເພິ່ນແນະນໍາກ່ອນ; ພ້ອມນີ້ຍັງກໍານົດໃຫ້ທຸກຄົນທີ່ມາໃຊ້ບໍລິການໃນຕະຫຼາດຕ້ອງໃສ່ຜ້າປິດປາກ ຫຼືໜ້າກາກອະນາໄມ.

  ສຳລັບຕະຫຼາດມີຈຸດລ້າງມື ແລະນໍາໃຊ້ເຈວຂ້າເຊື້ອພະຍາດ; ແນະນຳໃຫ້ທຸກຄົນຢູ່ຫ່າງກັນ 1-2 ແມັດ ເພື່ອບໍ່ໃຫ້ເກີດຄວາມແອອັດພາຍໃນຕະຫຼາດ ແລະມີການໃຫ້ປິດຮ້ານທີ່ບໍ່ຈໍາເປັນຊົ່ວຄາວເຊັ່ນຮ້ານເສື້ອຜ້າ-ເກີບ ໃນຊ່ວງ 19 ມື້ (1-19 ເມສາ2020). ນອກນີ້ ຍັງໄດ້ສີດພົ່ນຢາຂ້າເຊື້ອພະຍາດທົ່ວບໍລິເວນຕະຫຼາດ ແລະອະນາໄມໃຫ້ສະອາດເປັນປະຈໍາ; ມີການບໍລິການສົ່ງສິນຄ້າທຸກຢ່າງຈາກຕະຫຼາດຮອດບ້ານປະຊາຊົນເພື່ອສົ່ງເສີມໃຫ້ຄົນຢູ່ບ້ານເພື່ອຫຼຸດຜ່ອນການແຜ່ເຊື້ອພະຍາດ.

  ສຳລັບການຄວບຄຸມລາຄາສິນຄ້າທາງຈັດສັນຕະຫຼາດ ແລະພາກສ່ວນລັດໄດ້ມີການຕິດຕາມ ແລະກວດກາລາຄາສິນຄ້າທຸກປະເພດທີ່ມີການເໜັງຕີງ, ທັງຊອກຫາທີ່ໄປທີ່ມາ ແລະຕົ້ນເຫດເພື່ອແກ້ໄຂໃຫ້ຖືກຈຸດນຳກັນເພາະທາງຕະຫຼາດໄດ້ປະກາດເລື້ອຍໆ ຖ້າຜູ້ບໍລິໂພກ ຫຼືປະຊາຊົນຜູ້ໃດທີ່ຊື້ສິນຄ້າເກີນລາຄາທີ່ພາກລັດກໍານົດອອກມາແມ່ນໃຫ້ມາແຈ້ງຫ້ອງການຈັດສັນໂດຍດ່ວນເພື່ອປະຕິບັດໂທດຕໍ່ແມ່ຄ້າຜູ້ທີ່ລະເມີດລະບຽບຂອງຕະຫຼາດວາງໄວ້.

____________

ຂຽນໂດຍ: ບຸນນິກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์