ລາວບໍ່ມີຜູ້ຕິດເຊື້ອໂຄວິດ-19 ໃໝ່ 7 ວັນຕິດຕໍ່ກັນ ດ້ານລັດຕໍ່ເວລາຄຳສັ່ງ 06/ນຍ ຮອດ 3 ພຶດສະພາ

  ຊ້ວງເທດສະການປີໃໝ່ລາວເຖິງປີນີ້ຈະບໍ່ມີການຈັດສະຫຼອງເໝືອນກັບທຸກໆ ປີທີ່ໄດ້ສືບທອດກັນມາແຕ່ບູຮານນະການຍ້ອນຜົນມາຈາກສະພາບການລະບາດຂອງພະຍາດໂຄວິດ-19 ແຕ່ໃນຊ້ວງດັ່ງກ່າວກໍນັບເປັນຂ່າວດີສຳລັບພີ່ນ້ອງຊາວລາວເນື່ອງຈາກບໍ່ພົບຜູ້ຕິດເຊື້ອໃໝ່ເພີ່ມເປັນເວລາ 7 ວັນຕິດຕໍ່ກັນຊຶ່ງປະຈຸບັນໃນຈຳນວນ 19 ຄົນຜູ້ຕິດເຊື້ອກ່ອນນັ້ນ 2 ຄົນໄດ້ປິ່ນປົວຫາຍເຊົາ ແລະໄດ້ກັບຄືນເມືອສູ່ອ້ອມກອດຄອບຄົວສ່ວນທີ່ເຫຼືອ 17 ຄົນ ແມ່ນຍັງສືບຕໍ່ຮັກສາຕົວຢູ່ໂດຍອາການດີຂຶ້ນ.

  ໃນວັນທີ 19 ເມສາຜ່ານມາ ທາງຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ໂຄວິດ-19 ໂດຍທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກຜູ້ປະຈຳການຄະນະສະເພາະກິດໄດ້ຖະແຫຼງຂ່າວຕໍ່ສື່ມວນຊົນຮູ້ວ່າ: ສະພາບການເຝົ້າລະວັງໂຄວິດ-19 ຢູ່ລາວວັນທີ 18 ເມສາຜ່ານມາວຽກງານຈຸດຜ່ານດ່ານມີຈຳນວນຜູ້ເດີນທາງເຂົ້າມີທັງໝົດ 1.009 ຄົນ, ຜ່ານດ່ານລາວ-ໄທ ທັງໝົດ 332 ຄົນ, ໃນນັ້ນມີແຮງງານລາວມາແຕ່ໄທ 15 ຄົນຜ່ານດ່ານຊ່ອງເມັກ, ດ່ານລາວ-ຈີນ 265 ຄົນ, ລາວ-ຫວຽດ 412 ຄົນ.


  ນັບແຕ່ເດືອນມັງກອນຮອດວັນທີ 18 ເມສາ 2020 ໄດ້ເກັບຕົວຢ່າງມາກວດທັງໝົດມີ 1.333 ຄົນ ກວດພົບຜູ້ຕິດເຊື້ອທັງໝົດ 19 ຄົນ ແລະໃນວັນທີ 8 ເມສາແມ່ນບໍ່ພົບຜູ້ຕິດເຊື້ອເພີ່ມນັບວ່າເປັນເວລາ 7 ວັນຕິດຕໍ່ກັນ.

   ສຳລັບການຕິດຕາມສະຖານທີ່ຈຳກັດບໍລິເວນ ແລະ ຜູ້ຈຳກັດບໍລິເວນຢູ່ເຮືອນໃນທົ່ວປະເທດມາຮອດວັນທີ 18 ເມສາ 2020 ທົ່ວປະເທດຍັງມີສູນຈຳກັດບໍລິເວນທັງ ໝົດ 982 ສູນ, ມີຜູ້ຈຳກັດບໍລິເວນຢູ່ສູນ 6.191 ຄົນ, ຢູ່ເຮືອນ 5.396 ຄົນເກັບຕົວຢ່າງໄປກວດວິເຄາະຫາເຊື້ອມີທັງໝົດ 122 ຄົນ.

  ການຕິດຕາມຜູ້ທີ່ຕິດເຊື້ອປະຈຸບັນນອນຢູ່ໂຮງໝໍ 17 ຄົນ ຈຳນວນ 3 ຄົນ ໂຮງໝໍແຂວງຫຼວງພະບາງເຫັນວ່າມີອາການຊົງຕົວຂັ້ນເບົາບາງຍັງຕິດຕາມຫາເຊື້ອເພື່ອຢັ້ງຢືນ ແລະຢູ່ນະຄອນຫຼວງວຽງຈັນມີຈຳນວນ 14 ຢູ່ໂຮງໝໍມິດຕະພາບທັງໝົດມີອາການເບົາບາງ ແລະຕິດຕາມການກວດເຊື້ອ.


  ຢ່າງໃດກໍຕາມເຖິງແມ່ນວ່າຕົວເລກການຕິດເຊື້ອຂອງລາວຢູ່ຕົວແຕ່ຢູ່ຕ່າງປະເທດຍັງສືບຕໍ່ເພີ່ມຂຶ້ນ ແລະ ພາຍໃນປະເທດເຮົາກໍຍັງມີຄວາມສ່ຽງ ແລະ ສິ່ງທ້າຍທາຍບໍ່ໜ້ອຍສະນັ້ນລັດຖະບານຈຶ່ງເຫັນດີໃຫ້ຕໍ່ເວລາໃນການຈັດຕັ້ງປະຕິບັດຕາມຄຳສັ່ງ 06/ນຍ ລົງວັນທີ 29 ມີນາ 2020, ບັນດານິຕິກຳ, ຄຳແນະນຳ, ແຈ້ງການຂອງຄະນະສະເພາະກິດໃນການປ້ອງກັນ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19, ຫ້ອງວ່າການສຳນັກງານນາຍົກລັດຖະມົນຕີ ແລະ ຂະແໜງການທີ່ກ່ຽວຂ້ອງອອກໄປຕື່ມອີກ 14 ວັນຈົນຮອດວັນທີ 3 ພຶດສະພາ 2020 ຢ່າງຖືກແລະເຂັ້ມງວດຖ້າຫາກມີການປ່ຽນແປງແນວໃດລັດຖະບານແມ່ນຈະມີການແຈ້ງຕື່ມໃນພາຍຫຼັງ.

______________

ຂຽນໂດຍ:  ບຸນນິກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์