ເຂື່ອນເຊລະນອງ 1 ມອບເງິນຊົດເຊີຍງວດທຳອິດ

  ໃນວັນທີ 7ເມສາ 2020 ນີ້ທີ່ ໂຮງຮຽນບ້ານຈັດສັນໄດ້ມີພິທີມອບ-ຮັບເງິນຄ່າຊົດເຊີຍໃຫ້ປະຊາຊົນບ້ານລ໋ອຍນໍ້າ ແລະ ບ້ານລະເບົານໍ້າເມືອງນອງທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້າເຊລະນອງ 1 ໃນງວດທີ 1 ໂດຍການເຂົ້າຮ່ວມຂອງ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດປະທານຄະ ນະກໍາມະການຍົກຍ້າຍຈັດສັນໂຄງການກໍ່ສ້າງເຂື່ອນໄຟຟ້າເຊລະນອງ 1, ຈາກນີ້ກໍມີ ພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ, ພະແນກກະສິກໍາ ແລະປ່າໄມ້ແຂວງ, ພະແນກພະລັງງານ ແລະ ບໍ່ແຮ່ແຂວງ, ພະແນກແຜນການ ແລະ ການລົງທຶນແຂວງພ້ອມການນໍາເມືອງນອງຕະຫຼອດຮອດຕາງໜ້າປະຊາຊົນ 2 ບ້ານເຂົ້າຮ່ວມ, ກ່ອນໜ້ານີ້ໜຶ່ງປີກວ່າປະຊາຊົນ 2 ບ້ານ ແມ່ນຕັ້ງບ້ານເຮືອນຢູ່ລຽບແຄມເຊ

  ລະນອງ,  ຊຶ່ງເປັນໜ້າເຂື່ອນເຊລະນອງ 1 ໃນປະຈຸບັນແມ່ນໂຄງການໄດ້ປຸກສ້າງເຮືອນ ແລະຍົກຍ້າຍປະຊາຊົນທັງ 2  ບ້ານໄດ້ຢູ່ເຮືອນຫຼັງໃໝ່ໄດ້ໜຶ່ງປີແລ້ວ; ຄ່າຊົດເຊີຍເນື້ອທີ່ນາ, ຜົນລະປູກ ແລະຊັບສິນທີ່ທາງຕາງໜ້າບໍລິສັດກໍ່ສ້າງເຂື່ອນໄຟຟ້າ ເຊລະນອງ1 ມອບຄັ້ງນີ້ເປັນໃນງວດທີ 1 ເປັນຈຳນວນເງິນ 786 ລ້ານກວ່າກີບ, ໃນນັ້ນບ້ານລະເບົານໍ້າ 608 ລ້ານກວ່າກີບ, ບ້ານລ໋ອຍນໍ້າ 177 ລ້ານກວ່າກີບ, ສໍາລັບຜົນການລົງວາງແຜນຜະລິດ ແລະສໍາຫຼວດການຈັດຫາແຫຼ່ງນໍ້າຢູ່ 2 ບ້ານ ດັ່ງກ່າວທາງຕາງໜ້າພະແນກກະສິກໍາ ແລະປ່າໄມ້ແຂວງ ໄດ້ໃຫ້ຮູ້ວ່າ: ບ້ານລ໋ອຍນໍ້າມີ 32 ຄອບຄົວ, ໄດ້ຮັບການຈັດສັນທີ່ດິນເພື່ອທໍາ ການຜະລິດທັງໝົດ 58 ເຮັກຕາ, ມີ ເງິນຊົດເຊີຍຜົນລະປູກທັງໝົດ 341 ລ້ານກວ່າກີບ, ໃນນັ້ນຄອບຄົວທີ່ໄດ້ຮັບ ໄດ້ຮັບຄ່າຊົດເຊີຍຫຼາຍສຸດ 96 ລ້ານ ລ້ານກີບ ແລະຄອບຄົວຜູ້ໜ້ອຍສຸດ 1 ແສນກວ່າກີບ, ໃນນີ້ຈໍານວນຄອບຄົວທີ່ໄດ້ຮັບເງິນຊົດເຊີຍຄ່າຜົນລະປູກ 10 ລ້ານກີບຂຶ້ນໄປ,ບຸກເບີກເນື້ອທີ່ນາ 3 ຄອບຄົວ ເນື້ອທີ່ 7 ເຮັກຕາ,ລ້ຽງໝູ 9 ຄອບຄົວ ຈໍານວນ 31 ໂຕ, ຊື້ຈັກເຮືອເພື່ອຫາປາ 1 ຄອບຄົວ,ລ້ຽງງົວ 2 ຄອບຄົວ, ລ້ຽງປາຈໍານວນ 1 ຄອບຄົວ,ຊື້ລົດໄຖນາເດີນຕາມ 1 ຄອບຄົວ ແລະໃຊ້ຈ່າຍວຽກງານທີ່ຈໍາເປັນ 2 ຄອບ ຄົວ, ສ່ວນວ່າບ້ານລະເບົານໍ້າປະກອບມີ 56 ຄອບຄົວ, ມີເງິນຊົດເຊີຍຜົນລະປູກ 1,5 ຕື້ກີບ ລວມທັງເງິນຈັດສັນທີ່ດິນ ເພື່ອທໍາການຜະລິດທີ່ຍັງບໍ່ທັນບຸກເບີກ, ໃນນັ້ນຜູ້ໄດ້ຮັບຄ່າຊົດເຊີຍຫຼາຍສຸດ 205 ລ້ານກວ່າກີບ ແລະຜູ້ໄດ້ໜ້ອຍສຸດ 16 ພັນກີບ;ໃນນີ້ຈໍານວນຄອບຄົວທີ່ໄດ້ຮັບເງິນຊົດເຊີຍຄ່າຜົນລະປູກ 10 ລ້ານກີບ ຂຶ້ນໄປມີ 19 ຄອບຄົວ, 5 ລ້ານກີບ ຫາ 9 ລ້ານກີບ, ມີ 3 ຄອບຄົວ, 1 ລ້ານຫາ 4 ລ້ານ, ມີ 6 ຄອບຄົວ, 5 ແສນຫາ 9 ແສນກີບ, ມີ 4 ຄອບຄົວ ແລະ ຜູ້ໄດ້ຮັບຕໍ່າກວ່າ 5 ແສນກີບ, ມີ 8 ຄອບຄົວ, ຊຶ່ງຈໍາ ນວນດັ່ງກ່າວມີຄວາມຕ້ອງການລ້ຽງ ງົວ, ລ້ຽງໝູ, ຂຸດໜອງປາ, ປູກກ້ວຍ, ມັນຕົ້ນ, ຊື້ໜາມໝາກຈັບອ້ອມຮົ້ວ, ຊື້ເຮືອ ຫາປາ, ຊື້ມອງຫາປາ, ເຈາະນໍ້າບາດານ, ຊື້ລົດໄຖນາ, ຊື້ລົດຈັກ, ຊື້ຈັກປັ່ນເຂົ້າ, ຊື້ດິນ ແລະບຸກເບີກເນື້ອທີ່ນາ, ຊື້ເນື້ອທີ່ນາ ແລະ ເພື່ອໃຊ້ໜີ້, ໂອກາດດັ່ງກ່າວທ່ານ ທ່ອນແກ້ວ ພຸດທະໄກຍະລາດ ກໍ່ໄດ້ຊີ້ນຳໃຫ້ຄະນະກຳມະການແຕ່ຂັ້ນແຂວງຮອດຂັ້ນເມືອງ, ຈົ່ງພ້ອມກັນເອົາໃຈໃສ່ຕິດຕາມການນຳໃຊ້ງົບປະມານຫ່ວງນີ້ໃຫ້ເກີດດອກອອກຜົນ ແລະຖືກຈຸດປະສົງ-ເປົ້າໝາຍ, ທັງນີ້ກໍ່ເພື່ອຊີວິດການເປັນຢູ່ຂອງພໍ່ແມ່ປະຊາຊົນທີ່ຖືກຍົກຍ້າຍບ້ານໃຫ້ມີຄວາມຢູ່ດີ, ກິນດີຂຶ້ນໄປເລື້ອຍໆ.

แชร์