ສິຣິຄອດເມຕິກ ມອບໜ້າກາກອະນາໄມ 3 ພັນອັນ ໃຫ້ຄະນະແພດສາດ

  ເພື່ອເປັນສ່ວນໜຶ່ງໃນການສະໜັບສະໜູນການປະຕິບັດງານຂອງເຈົ້າໜ້າທີ່ແພດໝໍ ບໍລິສັດ ສິຣິຄອດເມຕິກ ໄດ້ມອບໜ້າກາກອະນາໄມຈໍານວນ 3 ພັນອັນໃຫ້ຄະນະແພດສາດມະຫາວິທະນາໄລວິທະຍາສາດສຸຂະພາບ (ຄພສ) ເພື່ອຮັບໃຊ້ໃນວຽກງານຕ້ານ ແລະສະກັດກັ້ນພະຍາດໂຄວິດ19.

  ພິທີມອບໄດ້ຈັດຂຶ້ນໃນວັນທີ 7 ເມສາ 2020 ທີ່ ຄພສ ຕ່າງໜ້າຮັບໂດຍ ທ່ານ ດຣ ເກດສົມສຸກ ບຸບຜາວັນ ຄະນະບໍດີ ຄະນະ ຄພສ ມອບໂດຍທ່ານ ນາງ ປານີ ວົງແກ້ວ ຕົວແທນຜູ້ນໍາເຂົ້າຜະລິດຕະພັນ ແບຣນ ສິຣິ ຄອດເມຕິກ ໃນປະເທດລາວ.

  ທ່ານ ດຣ ເກດສົມສຸກ ບຸບຜາວັນ ກ່າວວ່າ: ອຸປະກອນການແພດທີ່ໄດ້ຮັບໃນຄັ້ງນີ້ແມ່ນຜະລິດຕະພັນທີ່ຈໍາເປັນສໍາລັບນັກສຶກສາ ຄພສ ຈໍານວນ 800 ກວ່າຄົນ ທີ່ລົງປະຕິບັດຕົວຈິງໃນສະຖານທີ່ຕ່າງໆບໍ່ວ່າຈະເປັນໂຮງຮຽນ, ສູນກັກກັນ, ໂຮງໝໍ, ດ່ານສາກົນເພື່ອຮັບໃຊ້ເຂົ້າໃນວຽກງານວິຊາສະເພາະ ແລະ ເປັນສ່ວນໜຶ່ງທີ່ສະແດງຄວາມຮັບຜິດຊອບຕໍ່ສັງຄົມໃນນາມຕ່າງໜ້າ ຄພສ ຂໍ້ສະແດງຄວາມຂອບໃຈ ແລະຂໍໃຫ້ບໍລິສັດຈົ່ງມີຄວາມຈະເລີນກ້າວໜ້າຂຶ້ນໄປເລື້ອຍໆ.

  ທ່ານ ນາງ ສິຣິກອນ ພັດຄົງສິນ ເຈົ້າຂອງ ບໍລິສັດ ສິຣິຄອດເມຕິກ ກ່າວວ່າ: ຂໍເປັນສ່ວນໜຶ່ງໃນການຊ່ວຍເຫຼືອສະໜັບສະໜູນໃຫ້ກຳລັງໃຈ ແລະພ້ອມເປັນສ່ວນໜຶ່ງໃນການຊ່ວຍເຫຼືອພີ່ນ້ອງ ສປປ ລາວ ຈຶ່ງໄດ້ມອບໃຫ້ ທ່ານ ນາງ ປານີ ວົງແກ້ວ ເປັນຕົວແທນມອບໜ້າກາກອະນາໄມແບບ 4 ຊັ້ນ ຈຳນວນ 3.000 ອັນ ມູນຄ່າ 14 ລ້ານກີບ ໂດຍເງິນຈຳນວນນີ້ທາງບໍລິສັດ ສິຣິ ຄອດເມຕິກ (ປະເທດໄທ) ບໍລິຈາກສະໜັບສະໜູນຈຳນວນ 10 ລ້ານກີບ ແລະສ່ວນ 4 ລ້ານກີບແມ່ນມາຈາກການຮ່ວມແຮງຮ່ວມໃຈຂອງການຈຳໜ່າຍສິນຄ້າຂອງທາງບໍລິສັດເປັນຕົ້ນແມ່ນລາຍໄດ້ຈາກການຂາຍສະບູເມືອກຫອຍທາກສະບູສາຫຼ່າຍພວງອາງຸ່ນໂລຊັ່ນສາຫຼ່າຍພວງອາງຸ່ນ ແລະອື່ນໆ.

  ທ່ານ ນາງ ສິຣິກອນ ພັດຄົງສິນ ລວມເຖິງຕົວແທນຈຳໜ່າຍທຸກທ່ານຂໍຂອບໃຈພີ່ນ້ອງຊາວລາວທຸກຄົົນທີ່ສະໜັບສະໜູນຜະລິດຕະພັນຂອງທາງເຮົາມາໂດຍຕະຫຼອດ ແລະຂໍຂອບໃຈໃນການມີສ່ວນຮ່ວມໃນການເຮັດບຸນຄັ້ງນີ້ “ເພາະເຮົາຄືພີ່ນ້ອງໄທ-ລາວ ເຮົາຈະບໍ່ຖິ້ມກັນ”.

แชร์