ແນະນໍາການອະນາໄມ ແລະຂ້າເຊື້ອສະຖານທີ່ມີຄວາມສ່ຽງຈາກໂຄວິດ

ກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກໄດ້ເປີດກອງປະຊຸມຂຶ້ນໃນວັນທີ 31 ມີນາ 2020 ຢູ່ຫ້ອງປະຊຸມຂະແໜງໄຂ້ຍຸງພະແນກສາທາລະນະສຸກ ແຂວງຫຼວງພະບາງ ໂດຍການເປັນປະທານຂອງທ່ານ ດຣ ອ່ອນຈັນ ແກ້ວສະຫວັນ ຮອງຫົວໜ້າກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກ, ມີຕາງໜ້າ ຈາກຫ້ອງການປົກຄອງແຂວງ,ພະແນກ ຖວທ, ພະແນກສຶກສາ, ແມ່ຍິງ, ກໍາມະບານ, ສະມາຄົມ ຮ້ານອາຫານ, ໂຮງແຮມ, ສະມາຄົມຂົນສົ່ງທາງບົກ ແລະທາງອາກາດພ້ອມດ້ວຍວິຊາການຂອງກະຊວງ, ພະແນກສາທາລະນະສຸກ ແຂວງຫຼວງພະບາງເຂົ້າຮ່ວມ.

 ທ່ານ ດຣ ອ່ອນຈັນ ແກ້ວສະຫວັນ ຮອງຫົວໜ້າກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກກ່າວວ່າ:ຈຸດປະສົງການຈັດກອງປະຊຸມຄັ້ງນີ້ກໍເພື່ອສະເໜີຫຼັກການໆອະນາໄມສິ່ງແວດລ້ອມ ແລະການຂ້າເຊື້ອຢູ່ແຕ່ລະສະຖານທີ່ມີຄວາມສຽງເປັນຕົ້ນແມ່ນໂຮງແຮມ, ເຮືອນພັກ, ຮ້ານອາຫານ, ສໍານັກງານອົງການ, ໂຮງ ຮຽນ ແລະສະຖານທີ່ສາທາລະນະ ແລະເຮືອນທີ່ມີກໍລະນີສົງໄສວ່າຕິດເຊື້ອ ຫຼື ແຍກປ່ຽວຊົ່ວຄາວ, ເພື່ອປ້ອງກັນ ແລະຄວບຄຸມພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ໂຄວິດ-19 ບໍ່ໃຫ້ມີການແຜ່ ລະບາດອອກເປັນວົງກວ້າງ ໂດຍໃຫ້ແຕ່ລະພາກສ່ວນຕ້ອງເປັນເຈົ້າການຊ່ວຍກັນ.

  ສະນັ້ນທາງກົມອະນາໄມ ແລະ ສົ່ງເສີມສຸຂະພາບກະຊວງສາທາ ລະນະສຸກ ຈຶ່ງໄດ້ວາງຍຸດທະສາດ ແລະມາດຕະການປ້ອງກັນ ແລະ ຄວບຄຸມເພື່ອໃຫ້ທຸກຄົນປະຕິບັດ ໂດຍການໃຫ້ຂໍ້ມູນຂ່າວສານ ແລະສື່ສານຄວາມສ່ຽງ, ກັກໂຕເອງ, ຫຼີກເວັ້ນການໂຮມຊຸມນຸມ, ຄົ້ນຫາ, ແຍກປ່ຽວຄົນເຈັບ ແລະຜູ້ສໍາຜັດໃກ້ ສິດ, ກັນ ແລະຄວບຄຸມການຕິດເຊື້ອໃນໂຮງໝໍ, ຈໍາກັດການເດີນທາງ, ຈໍາກັດບໍລິເວນ, ທໍາການອະນາໄມ ແລະຂ້າເຊື້ອ ແລະໃນຕອນບ່າຍວັນດຽວກັນຜູ້ເຂົ້າຮ່ວມຍັງໄດ້ ລົງສາທິດການສີດຢາຂ້າເຊື້ອຢູ່ທີ່ໂຮງໝໍແຂວງ ແລະສະໜາມບິນ ສາກົນແຂວງຫຼວງພະບາງ ຕື່ມອີກ ເພື່ອໃຫ້ເຂົ້າໃຈ ແລະນໍາໄປເຜີຍແຜ່ ໃຫ້ກົມກອງຂອງຕົນໄດ້ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນດີ.

------

ໂດຍ: ສີສຸວັນ

แชร์