ຄະນະເລຂາທິການສູນກາງພັກ ອອກຄຳສັ່ງເພີ່ມທະວີຊີ້ນຳການປ້ອງກັນ ແລະແກ້ໄຂໂຄວິດ-19

  ຄຳສັ່ງຂອງຄະນະເລຂາທິການສູນກາງພັກວ່າດ້ວຍເພີ່ມທະວີການນຳພາຊີ້ນຳຕໍ່ການປ້ອງກັນ, ສະກັດກັ້ນ ແລະແກ້ໄຂການລະບາດຂອງເຊື້ອພະຍາດຈຸລະໂລກອັກເສບປອດສາຍພັນໃໝ່ໂຄວິດ-19 ສະບັບເລກທີ 07/ ຄລສພ ລົງວັນ ທີ 6 ເມສາ 2020 ມີເນື້ອໃນວ່າ: ເລີ່ມຕົ້ນທົດສະວັດໃໝ່ປີ 2020, ໂລກເຮົາໄດ້ຕົກຢູ່ໃນສະພາບຄວາມຕື່ນຕົກໃຈຕໍ່ການເກີດຂຶ້ນຂອງເຊື້ອຈຸລະໂລກອັກເສບປອດສາຍພັນໃໝ່ (New Corona Virus ຫຼື Covid-19) ຊຶ່ງປະຈຸບັນໄດ້ແຜ່ລະບາດເປັນວົງກວ້າງອອກໄປຫຼາຍປະເທດໃນຂອບເຂດທົ່ວໂລກ ແລະເພີ່ມທະວີຄວາມຮຸນແຮງຂຶ້ນຢ່າງຕໍ່ເນື່ອງຊຶ່ງໄດ້ສ້າງຄວາມເສຍຫາຍຕໍ່ຊີວິດ, ຊັບສິນກໍຄືສົ່ງຜົນກະທົບຕໍ່ເສດຖະກິດ-ສັງ ຄົມຂອງຫຼາຍປະເທດ ແລະສະພາບດັ່ງກ່າວຍັງບໍ່ທັນສາມາດຄາດການທີ່ຊັດເຈນວ່າຈະສືບຕໍ່ແກ່ຍາວໄປຮອດເວລາໃດ.

  ຢູ່ປະເທດຂອງພວກເຮົາກໍພວມປະເຊີນໜ້າກັບສະພາບດັ່ງກ່າວ, ນັບແຕ່ການເລີ່ມຕົ້ນລະບາດຂອງເຊື້ອພະຍາດດັ່ງກ່າວໂດຍເຫັນແຈ້ງໄພອັດຕະລາຍນັ້ນ, ກົມການເມືອງສູນກາງພັກແມ່ນມີຄວາມເປັນຫ່ວງ ແລະໄດ້ຊີ້ນຳລັດຖະບານກະກຽມຄວາມພ້ອມແຕ່ຫົວທີ່ເພື່ອເຝົ້າລະວັງ, ສະກັດກັ້ນ, ປ້ອງກັນ ແລະຮັບມືແກ້ໄຂການລະບາດທີ່ອາດຈະເກີດຂຶ້ນຊຶ່ງເປັນສິ່ງທີ່ບໍ່ສາມາດຫຼີກເວັ້ນໄດ້.

  ຕະຫຼອດໄລຍະຂອງການຕິດຕາມ, ເຝົ້າລະວັງ, ສູນກາງພັກ-ລັດຖະບານໄດ້ມີຄວາມຕັດສິນໃຈສູງໃນການຊີ້ນຳ ແລະວາງອອກຫຼາຍມາດຕະການເພື່ອປ້ອງກັນການແຜ່ລະບາດ Covid-19 ເປັນຕົ້ນແມ່ນການເລື່ອນການຈັດງານແຂ່ງຂັນກີລາແຫ່ງຊາດ ແລະກິດຈະກຳປິ່ນອ້ອມຢູ່ແຂວງຊຽງຂວາງກໍຄືຍົກເລີກການຈັດຕັ້ງພິທີມິດຕິງໃຫຍ່ລະດັບຊາດ ແລະລະດັບທ້ອງຖິ່ນເພື່ອສະເຫຼີມສະຫຼອງວັນສ້າງຕັ້ງພັກປະຊາຊົນປະຕິບັດລາວຄົບຮອບ 65 ປີ, ເລື່ອນການຈັດກອງປະຊຸມໃຫຍ່ຂອງບັນດາອົງຄະ ນະພັກ, ອົງການຈັດຕັ້ງມະຫາຊົນຢູ່ແຕ່ລະຂັ້ນແລະທຸກກິດຈະກຳການເຕົ້າໂຮມຄົນຈຳນວນຫຼວງຫຼາຍໃນສະຖານທີ່ດຽວ ແລະອື່ນໆ, ຫຼ້າສຸດ, ລັດຖະບານກໍໄດ້ຍົກລະດັບມາດຕະການປ້ອງກັນ ແລະແກ້ໄຂ Covid-19 ຂຶ້ນສູ່ລະດັບໃໝ່ໂດຍສະເພາະໄລຍະແຕ່ວັນທີ 1-19 ເມ ສາ 2020 ແນໃສ່ຈຳກັດສະພາບການລະບາດຂອງເຊື້ອພະຍາດ Covid-19 ບໍ່ໃຫ້ແຜ່ຂະຫຍາຍສູ່ວົງກວ້າງ ແລະ ພະຍາຍາມບໍ່ໃຫ້ກ້າວເຂົ້າສູ່ຂັ້ນວິກິດ... ບັນດາທິດຊີ້ນຳ ແລະ ມາດຕະການຕ່າງໆ ທີ່ພັກ-ລັດວາງອອກ, ໂດຍລວມທົ່ວສັງຄົມໄດ້ໃຫ້ການສະໜັບສະໜູນ ແລະເຂົ້າຮ່ວມໃນຂະບວນການເຝົ້າລະວັງ, ປ້ອງກັນ,ສະກັດກັ້ນ ແລະແກ້ໄຂ Covid-19 ໄດ້ເປັນຢ່າງດີແຕ່ຄຽງຄູ່ກັນນັ້ນ,ກໍຍັງມີຫຼາຍບັນຫາທີ່ຕ້ອງໄດ້ເພີ່ມທະວີການຊີ້ນຳ-ນຳພາຂອງຄະນະພັກ ແລະອົງການປົກຄອງແຕ່ລະຂັ້ນເພື່ອຮັບປະກັນການເອົາຊະນະໃນບັ້ນຮົບຕ້ານພະຍາດດັ່ງກ່າວເປັນຕົ້ນແມ່ນການປ້ອງກັນຕົນເອງກໍຄືການກັກຕົວເອງຍັງບໍ່ເຂັ້ມງວດ,ຂໍ້ມູນຂ່າວສານຍັງບໍ່ທັນເຂົ້າເລິກສູ່ສັງຄົມຢ່າງທົ່ວເຖິງ, ເຮັດໃຫ້ປະຊາຊົນຈຳນວນຫຼວງຫຼາຍຍັງຖືເບົາ, ນັບທັງພະນັກງານ, ສະມາຊິກພັກເຮົາຊຶ່ງເກີດມີໜໍ່ແໜງກໍຄືຄວາມສ່ຽງທີ່ຈະພາໃຫ້ພະຍາດ Covid-19 ເພີ່ມທະວີການແຜ່ລະບາດໃນວົງກວ້າງ.

  ບົນຈິດໃຈດັ່ງກ່າວນັ້ນ, ຄະນະເລຂາທິການສູນກາງພັກອອກຄຳສັ່ງດັ່ງນີ້:

  1. ພະຍາດ Covid-19 ແມ່ນໄພອັນຕະລາຍຮ້າຍແຮງທີ່ພວມຂົ່ມຂູ່ຕໍ່ຊີວິດ, ຊັບສິນຂອງປະຊາຊົນ, ການພັດທະນາສ້າງສາກໍຄືຄວາມໝັ້ນຄົງຂອງປະເທດຊາດພວກເຮົາ, ທົ່ວພັກ, ລັດ, ກຳລັງປະກອບອາວຸດ ແລະທົ່ວປວງຊົນລາວທັງຊາດທັງມີຄວາມຮັບຜິດຊອບ, ທັງເປັນພັນທະ, ໜ້າທີ່ໃນການຕິດຕາມ, ເຝົ້າລະວັງ, ປ້ອງ ກັນ, ສະກັດກັ້ນ ແລະແກ້ໄຂດ້ວຍຄວາມເປັນເຈົ້າການ,ຄະນະພັກ, ອົງການປົກຄອງແຕ່ລະຂັ້ນຕ້ອງຖືບັນຫາດັ່ງກ່າວເປັນວຽກສຳຄັນທີ່ມີລັກສະນະຍຸດທະສາດຮີບດ່ວນໃນການຊີ້ນຳ-ນຳພາຂອງຕົນໃນໄລຍະນີ້, ຊຶ່ງຕ້ອງໄດ້ສຸມການ, ຊີ້ນຳ-ນຳພາບັນຊາ, ກຳລັງຄົນ, ພາຫະນະ, ວັດຖຸ, ເຕັກນິກຢ່າງຈິງຈັງ ແລະມີຈຸດສຸມ, ປຽບເໝືອນການຊີ້ນຳບັນຊາໃນພາວະສົງຄາມ.

 ຄາດໝາຍໃຫຍ່ແມ່ນຕ້ອງເດັດຂາດຕໍ່ມາດຕະການຄວບຄຸມການແຜ່ລະບາດໃຫ້ຢູ່ໃນວົງຈຳກັດທີ່ສຸດ, ເຮັດໃຫ້ການສູນເສຍດ້ານຊີວິດໜ້ອຍທີ່ສຸດເທົ່າທີ່ຈະເຮັດໄດ້, ຮັບ ປະກັນຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມຢ່າງໜັັກແໜ້ນ, ເດັດຂາດບໍ່ໃຫ້ມີຄວາມວຸ້ນວາຍເກີດຂຶ້ນໃນສັງຄົມ.

   2. ໃຫ້ຄະນະພັກແຕ່ລະຂັ້ນສືບຕໍ່ນຳພາການເມືອງແນວຄິດໃຫ້ສະມາຊິກພັກ,ພະນັກງານທະຫານ,ຕຳຫຼວດ ແລະປະຊາຊົນຮັບຮູ້ເຂົ້າໃຈສະພາບຄວາມເປັນຈິງ ແລະໄພອັນຕະລາຍຂອງພະຍາດ Covid-19 ແລະຕື່ນຕົວເປັນເຈົ້າການປ້ອງກັນຕົນເອງ, ຄອບຄົວ ແລະຜູ້ອື່ນດ້ວຍການຈັດຕັ້ງປະຕິບັດຢ່າງເຂັ້ມງວດຕາມມາດຕະການທີ່ລັດຖະບານກໍຄືຄະນະສະເພາະກິດວາງອອກເພື່ອຜ່ານຜ່າຄວາມຫຍຸ້ງຍາກ ແລະພ້ອມກັນເອົາຊະນະພະຍາດດັ່ງກ່າວ.

  ກ່ອນອື່ນໝົດຕ້ອງເລີ່ມຈາກສຳນັກງານ, ອົງການຂອງພັກ-ລັດ (ລວມທັງໝົດລະບົບການເມືອງ) ແຕ່ລະຂັ້ນ, ແຕ່ລະຮາກຖານຕ້ອງຮັບປະກັນການປ້ອງກັນ ແລະຕ້ານພະຍາດ Covid-19 ສະມາຊິກພັກແຕ່ລະສະຫາຍຕ້ອງເປັນເຈົ້າການ ແລະເປັນແບບຢ່າງນຳໜ້າ, ເຮັດແທ້ທຳຈິງຕໍ່ການປ້ອງກັນ, ສະກັດກັ້ນ ແລະແກ້ໄຂພະ ຍາດ Covid-19, ຖືບັນຫາດັ່ງກ່າວເປັນຂະບວນການຕົວຈິງໃນການກະກຽມ ແລະ ດຳເນີນກອງປະຊຸມໃຫຍ່ຂອງຄະນະພັກແຕ່ລະຂັ້ນກໍຄືຄວາມອາດສາມາດນຳພາຕົວຈິງຂອງຄະນະພັກ, ການຄຸ້ມຄອງ-ບໍລິຫານຂອງອົງການປົກຄອງຢູ່ແຕ່ລະບ່ອນ.

  3. ໃຫ້ຄະນະພັກ,ອົງການປົກຄອງແຕ່ລະຂັ້ນກວດກາຄືນດ້ານການຈັດຕັ້ງ, ການນຳພາຊີ້ນຳ-ນຳພາໂດຍສະເພາະການແຕ່ງຕັ້ງຄະນະສະເພາະກິດຂັ້ນຂອງຕົນ (ແຕ່ຂັ້ນກະຊວງ, ອົງການ, ແຂວງ, ເມືອງຮອດຂັ້ນບ້ານ) ຊຶ່ງປະກອບດ້ວຍພາກສ່ວນກ່ຽວຂ້ອງພາຍໃຕ້ການນຳພາໂດຍກົງຂອງສະຫາຍເລຂາຄະນະພັກເພື່ອນຳພາປະຕິ ບັດຕົວຈິງ, ເຮັດໃຫ້ການແກ້ໄຂບັນຫາມີຄວາມຮັດກຸມແທດຕົວຈິງ ແລະໄດ້ຮັບຜົນສຳເລັດ.

  4. ໃຫ້ຄະນະພັກ, ອົງການປົກຄອງແຕ່ລະຂັ້ນນຳພາການຄຸ້ມຄອງ, ກວດກາ ແລະຈັດຕັ້ງສະໜອງສິນຄ້າທີ່ຈຳເປັນໃຫ້ແກ່ສັງຄົມ, ຫຼີກເວັ້ນການສວຍໂອກາດໃນທຸກຮູບແບບໃນຍາມຄັບຂັນຫຍຸ້ງຍາກ, ທຸກການລະເມີດຕ້ອງໄດ້ຮັບການລົງໂທດຕາມກົດໝາຍ.

  ສະເໜີໃຫ້ລັດຖະບານສືບຕໍ່ຄົ້ນຄວ້າ, ມີນະໂຍບາຍດ້ານຕ່າງໆຮອງຮັບທີ່ສົມເຫດສົມຜົນຕໍ່ບັນດາພາກສ່ວນເສດຖະກິດຫົວໜ່ວຍທຸລະກິດ, ຜູ້ປະກອບການກໍຄືຜູ້ອອກແຮງງານທີ່ຖືກຜົນກະທົບຈາກ Covid-19 ດ້ວຍມາດຕະການຕົວຈິງທີ່ເປັນຮູບປະທຳ, ພ້ອມກັນນັ້ນກໍໃຫ້ມີການພິຈາລະນາຢ່າງຖີ່ຖ້ວນ, ຮອບດ້ານຕໍ່ມາດຕະການຕ່າງໆ ທີ່ຈະວາງອອກໃໝ່ເພື່ອບໍ່ສ້າງຄວາມກົດດັນ ຫຼືສ້າງຜົນເສຍຫາຍຕໍ່ລະບົບການຜະລິດ-ທຸລະກິດ.

 5. ໃຫ້ເອົາໃຈໃສ່ ແລະເພີ່ມທະວີການຕອບສະໜອງດ້ານວິທະຍາສາດ, ເຕັກນິກ-ຂ່າວສານ, ດ້ານໜຶ່ງແມ່ນຮັບປະກັນຄວາມໄວໃນການນຳພາ ແລະເຜີຍແຜ່ຂ່າວສານທີ່ຖືກຕ້ອງ, ຊັດເຈນໃຫ້ທົ່ວສັງຄົມຮັບຮູ້ເຂົ້າໃຈ ແລະ ເຂົ້າຮ່ວມປະຕິບັດຢ່າງພ້ອມພຽງ, ດ້ານສອງແມ່ນຮັບປະກັນໃຫ້ເຈົ້າໜ້າທີ່, ພະນັກງານຂອງພັກ-ລັດ ແຕ່ລະຂັ້ນກໍຄືສັງຄົມໄດ້ເຄື່ອໄຫວວຽກງານຜ່ານເຄື່ອງມືຂອງລະບົບອຸປະກອນທັນສະໄໝ, ແກ້ໄຂບັນຫາຢ່າງວ່ອງໄວ, ທັນການໂດຍບໍ່ປະໃຫ້ວຽກຖືກແກ່ຍາວ.

  6. ໃຫ້ເອົາໃຈໃສ່ເປັນພິເສດຕໍ່ຖັນແຖວແພດໝໍທີ່ເປັນນັກຮົບປະຈັນບານຕໍ່ສູ້ໂດຍກົງກັບພະຍາດ Covid-19 ເປັນຕົ້ນການປະກອບເຄື່ອງມື, ອຸປະກອນການແພດ ແລະການປ້ອງກັນຕິດເຊື້ອຢ່າງເປັນລະບົບ,ຄົບຊຸດພ້ອມນັ້ນກໍ່ຕ້ອງໃຫ້ກຳລັງໃຈ, ປະຕິບັດນະໂຍບາຍທີ່ເໝາະສົມ, ທັນການຕໍ່ເຂົາເຈົ້າເພື່ອເຮັດສຳເລັດໜ້າທີ່ໆສຳຄັນນີ້.

  ໃຫ້ຈັດຕັ້ງດຳເນີນມາດຕະການປ້ອງກັນ, ສະກັດກັ້ນ ແລະປິ່ນປົວພະຍາດຕາມມາດຕະຖານດ້ານສາທາລະນະສຸກຢ່າງເຂັ້ມງວດ, ບໍ່ໃຫ້ມີການລະເມີດຫຼືຝ່າຝືນຊຶ່ງຈະນຳຜົນເສຍຫາຍຕໍ່ສັງຄົມໃນວົງກວ້າງ, ໃຫ້ເຈົ້າໜ້າທີ່ປົກຄອງ, ທະຫານທຸກຂັ້ນດຳເນີນມາດຕະການບໍລິຫານທີ່ເຂັ້ມງວດ, ເດັດຂາດຕໍ່ບຸກຄົນ,ການຈັດຕັ້ງ, ພາກສ່ວນຕ່າງໆທີ່ລະເມີດຄຳສັ່ງກໍຄືມາດຕະການຂອງລັດຖະບານ, ຂອງຄະນະສະເພາະກິດ ແລະຂອງອົງການປົກຄອງທ້ອງຖິ່ນວາງອອກ.

  7. ໃຫ້ຄະນະພັກ-ຄະນະບັນຊາຂອງກຳລັງປ້ອງກັນຊາດ-ປ້ອງກັນຄວາມສະຫງົບມີການຊີ້ນຳ ແລະສັ່ງກຳລັງຢູ່ໃນທ່າກຽມພ້ອມເພື່ອຊ່ວຍໜູນການແກ້ໄຂບັນຫາໃນກໍລະນີສະພາບການຜັນແປໄປ ແລະມີຄວາມຮຸນແຮງເພີ່ມຂຶ້ນ.

  8. ໃຫ້ຄະນະປະຈຳພັກແຂວງ, ຄະນະປະຈຳພັກນະຄອນຫຼວງວຽງຈັນ ກໍຄືຄະນະພັກກະຊວງ, ອົງການລາຍງານປະຈຳອາທິດກ່ຽວກັບສະພາບການຊີ້ນຳ-ນຳພາແກ້ ໄຂພະຍາດ Covid-19 ກໍຄືການແກ້ໄຂບັນຫາເສດຖະກິດ-ສັງຄົມ ໃນໄລຍະນີ້ຕໍ່ຄະນະເລຂາທິການສູນກາງພັກໂດຍຜ່ານຫ້ອງວ່າການສູນກາງພັກເພື່ອລາຍງານກົມການເມືອງສູນກາງພັກໃຫ້ທິດຊີ້ນຳຢ່າງເປັນລະບົບ, ຕໍ່ເນື່ອງ ແລະມີປະສິດທິຜົນ.

  9. ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະທົ່ວປວງຊົນລາວທັງຊາດຈົ່ງເຊີດຊູມານະຈິດປະຕິວັດ, ນໍ້າໃຈຮັກຊາດ, ຄວາມເປັນເຈົ້າຕົນເອງ, ເປັນເຈົ້າປະ ເທດຊາດ, ເສີມຂະຫຍາຍມູນເຊື້ອສາມັກຄີເປັນປຶກແຜ່ນຂອງປະຊາຊົນລາວ, ຊາດລາວພາຍໃຕ້ການນຳພາຂອງພັກ-ລັດ, ຈົ່ງໄດ້ຮ່ວມແຮງ, ຮ່ວມໃຈກັນປະຕິບັດກົດ ໝາຍ, ຄຳສັ່ງ, ລະບຽບການຕ່າງໆ, ມີຄວາມເສຍສະລະ, ປະກອບສ່ວນສຳຄັນເຂົ້າໃນການຊ່ວຍປະເທດຊາດ, ບໍ່ແຕກຕື່ນ, ແຕ່ກໍ່ມີສະຕິທຸ່ນທ່ຽງບໍ່ປະໝາດ, ບໍ່ສ້າງຄວາມສັບສົນຫຍຸ້ງຍາກ, ບໍ່ໃຊ້ອາລົມແຕ່ໃຊ້ເຫດຜົນໃນການແກ້ໄຂບັນຫາຕ່າງໆ ເດັດດ່ຽວເຂົ້າຮ່ວມພາລະກິດປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະ ຍາດ Covid-19 ໃຫ້ຜ່ານພົ້ນໄປ ແລະມີຜົນສຳເລັດຢ່າງຈົບງາມ.

___________

ພາບ ແລະຂ່າວຈາກ:

ໜັງສືພິມເສດຖະກິດ-ສັງຄົມ

แชร์