ເມືອງນອງ ຮັບຮອງ 10 ບ້ານ ເປັນບ້ານວັດທະນະທຳ

 ໃນວັນທີ 27 ມີນາ 2020 ຜ່ານມານີ້ ທີ່ເດີ່ນໂຮງຮຽນປະຖົມ ບ້ານນາລົງໃໝ່ ໄດ້ຈັດພິທີຮັບຮອງເອົາ 10 ບ້ານເປັນບ້ານວັດທະນະທຳຄື: ບ້ານຊວງໄຕ້, ຊວງໃຫຍ່, ບ້ານນາລົງໃໝ່, ລະເບົານໍ້າ, ພູໝາກມີ້, ອາລັອງ, ລະໄກ໊, ບ້ານແສນ, ຕານໂຕ໊ຍ ແລະບ້ານລະແບງໂຄກ ໂດຍພາຍໃຕ້ການເປັນປະທານ ຂອງທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວວັດທະນະທຳ ແລະທ່ອງທ່ຽວແຂວງ, ທ່ານ ລຳແກ້ວ ແສງໜູທອງ ເຈົ້າ ເມືອງນອງ, ຕາງໜ້າໃຫ້ບ້ານທັງ 10 ບ້ານ, ມີເຖົ້າແກ່ແນວໂຮມພໍ່ ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.

 ທ່ານ ໝອນຕາ ຮອງເລຂາໜ່ວຍພັກບ້ານນາລົງໃໝ່ຕາງໜ້າ 10 ບ້ານ ຂຶ້ນຜ່ານບົດລາຍງານຜົນສຳເລັດໃນການສ້າງຄອບຄົວ ແລະບ້ານວັດທະນະທຳຂອງ 10 ບ້ານດັ່ງກ່າວ ຊຶ່ງເປັນບ້ານທີ່ມີເອກະລັກທາງດ້ານວັດທະນະທຳ, ຂະນົບທໍານຽມຮິດຄອງປະເພນີ,ສິລະປະ-ວັດທະນະທໍາທີ່ມີເອກະລັກແຕກຕ່າງກັນ, 10 ບ້ານ ມີ 839 ຄອບຄົວ ມີພົນລະເມືອງ ທັງໝົດ 3.199 ຄົນ ຍິງ 1.534 ຄົນ, ມີ 40 ໜ່ວຍ, ມີຈຳນວນ 586 ຄົົວເຮືອນ ໃນນັ້ນເຜົ່າຕະໂອ໊ຍກວມເອົາ 34,33%, ເຜົ່າມັງກອງກວມເອົາ 65,67% ແລະພໍ່ແມ່ປະຊາ ຊົົນມີຄວາມສາມັກຄີຮັກແພງຊ່ວຍ ເຫຼືອເຊິ່ງກັນ ແລະກັນຮັບຮູ້ ແລະເຂົ້າໃຈຢ່າງເລິກເຊິ່ງໄປພ້ອມໆກັບການ ປັບປຸງລະບົບການຈັດຕັ້ງໃຫ້ມີ ຄວາມໜັກແໜ້ນສາມາດຮັກສາຄວາມເປັນລະບຽບຮຽບຮ້ອຍໄດ້ໂດຍພື້ນຖານ, ອຳນາດການປົກ ຄອງບ້ານສ່ວນໃຫຍ່ແມ່ນສຸມໃສ່ສ້າງເສດຖະກິດຄອບຄົວແກ້ໄຂຊີວິດການເປັນຢູ່ໃຫ້ດີຂຶ້ນເປັນຕົ້ນການປູກຝັງລ້ຽງສັດເປັນສິນຄ້າສ້າງລາຍຮັບເຂົ້າສູ່ຄອບຄົວຄື:ການປູກກ້ວຍ, ມັນຕົ້ນ, ເປືອກຢາງ ໂບງ, ຫວາຍ, ການເຮັດນາດ້ວຍ ການນຳໃຊ້ແນວພັນປັບປຸງໃໝ່ໃນທຸກໆປີເພື່ອເຮັດໃຫ້ສະມັດຕະພາບ ການຜະລິດເຂົ້າໄດ້ຫຼາຍຂຶ້ນໃນນັ້ນ ມີເນື້ອທີ່ນາ 70  ເຮັກຕາ, ເນື້ອທີ່ໄຮ່  ສວນ 340 ເຮັກຕາ, ສະມັດຕະພາບ 1,5 ໂຕນຕໍ່ເຮັກຕາ, ສວນ ຢາງໂບງ 138 ເຮັກຕາ, ຫວາຍ 10 ເຮັກຕາ.

ນອກນັ້ນຍັງໄດ້ຊຸກຍູ້ໃຫ້ພໍ່ແມ່ ປະຊາຊົນໃຫ້ມີການປ້ອງກັນ ແລະ ສັກຢາກັນພະຍາດໃຫ້ສັດລ້ຽງທີ່ ມັກເກີດຕາມລະດູການໃນນັ້ນມີ ຄວາຍ 102 ໂຕ, ງົວ 487 ໂຕ ແລະສັດປີກ 3.173 ໂຕ, ມີໜອງປາ 168 ໜອງປ່ອຍປາໃສ່ໜອງ ໄດ້ທັງໝົດ 23.580 ໂຕ.

 ໃນຕອນທ້າຍກໍຍັງມີການມອບໃບຢັ້ງຢືນບ້ານວັດທະນະທຳໃຫ້ທັງ 10 ບ້ານໂດຍການເປັນກຽດມອບໃບຢັ້ງຢືນຂອງທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ ແລະພ້ອມທັງລັ່ນຄ້ອງ 9 ບາດ ຂອງທ່ານ ລຳ ແກ້ວ ແສງໜູທອງ ເລຂາພັກເມືອງ ເຈົ້າເມືອງໆນອງ ເພື່ອເປັນສິລິມົງ ຄຸນ ແລະເປັນສັນຍານບົ່ງບອກວ່າ 10 ບ້ານ ດັ່ງກ່າວໄດ້ກາຍເປັນ ບ້ານວັດທະນະທຳຢ່າງເປັນທາງ ການ.

--------

ໜັງສືພິມເສດຖະກິດ-ສັງຄົມ

แชร์