ປີນີ້ ໄຊຍະບູລີ ຈະຜະລິດຊີ້ນ, ປາ, ໄຂ່ ໃຫ້ໄດ້ 20,621 ໂຕນ

  ປີຜ່ານມາການລ້ຽງສັດທົ່ວ ແຂວງໄຊຍະບູລີ ໄດ້ມີການຂະຫຍາຍຕົວປະຊາຊົນສ່ວນຫຼາຍໄດ້ຄ່ອຍຫັນເຂົ້າສູ່ການລ້ຽງສັດແບບເປັນລະບົບໂດຍນໍາໃຊ້ວິທະຍາສາດທີ່ກ້າວ ໜ້າເຂົ້າຊ່ວຍເທື່ອລະກ້າວຫັນຈາກການລ້ຽງແບບທໍາມະຊາດກະແຈກກະຈາຍມາລ້ຽງເປັນກຸ່ມ, ເປັນຟາມຕິດພັນກັບການປູກຫຍ້າລ້ຽງສັດປະເພດງົວຄວາຍ; ນອກນັ້ນຍັງໄດ້ລ້ຽງປາໃນໜອງຢ່າງແຜ່ຫຼາຍໃນຂອບເຂດທົ່ວແຂວງຈຶ່ງເຮັດໃຫ້ການຜະລິດທາດຊີ້ນໃນປີຜ່ານມາໄດ້ທັງໝົດ 20.096 ໂຕນ ສາມາດສະໜອງຊີ້ນ, ປາ, ໄຂ່ສະ ເລ່ຍໃສ່ຫົວຄົນໜຶ່ງໄດ້ 50,68 ກິໂລຕໍ່ຄົນຕໍ່ປີ, ທຽບໃສ່ແຜນປີ 2019 ແມ່ນ 55 ກິໂລຄົນຕໍ່ປີ ປະຕິບັດໄດ້ 92,14%.

  ທ່ານ ຄໍາພຸດ ອິນທະວົງ ຮອງຫົວໜ້າພະແນກກະສິກໍາ ແລະປ່າໄມ້ ແຂວງໄຊຍະບູລີ ໄດ້ກ່າວໃນກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາຊົນນະບົດປະ ຈໍາປີ 2019 ທີ່ໄດ້ສໍາເລັດລົງໃນທ້າຍເດືອນມີນານີ້ວ່າ: ການລ້ຽງສັດຂອງປະຊາຊົນຊາວແຂວງໄຊຍະບູລີໄດ້ມີການຂະຫຍາຍຕົວຢ່າງຕໍ່ເນື່ອງສະເລ່ຍການຂະຫຍາຍຕົວຂອງຝູງສັດສະເພາະຄວາຍ-ງົວ ເທົ່າ 8,11% ທຽບໃສ່ແຜນການປີປະຕິບັດໄດ້ 115,85%, ປະຈຸບັນທົ່ວແຂວງມີສັດລ້ຽງທັງໝົດ 4 ລ້ານ 3 ແສນກວ່າໂຕໃນນີ້ມີຄວາຍ 66.561 ໂຕ, ທຽບໃສ່ປີຜ່ານມາເພີ່ມຂຶ້ນ 4.198 ໂຕ, ງົວ 209.327 ໂຕ ເພີ່ມຂຶ້ນ 18.356 ໂຕ, ໝູ182.338 ໂຕ ເພີ່ມຂຶ້ນ 9.729 ໂຕ, ແບ້ 24.162 ໂຕ ເພີ່ມຂຶ້ນ 5.783 ໂຕ ແລະ ສັດປີກ 3 ລ້ານ 8 ແສນກວ່າໂຕ ເພີ່ມຂຶ້ນ 466.316 ໂຕ.

ການລ້ຽງສັດໃຫຍ່ຕາມເນື້ອທີ່ປ່າທໍາມະຊາດທົ່ວແຂວງທີ່ໄດ້ກໍານົດມີ 900 ກວ່າແຫ່ງໃນເນື້ອທີ່ທັງໝົດ 58.434 ເຮັກຕາ ນອກຈາກການລ້ຽງສັດໃຫຍ່ໃນເນື້ອທີ່ປ່າທໍາມະຊາດແລ້ວການປູກຫຍ້າອາຫານສັດຂອງປະຊາຊົນກໍໄດ້ກາຍເປັນຂະບວນກວ້າງຂວາງໃນປະຈຸບັນມີຄອບຄົວປູກຫຍ້າທັງໝົດ6.692ຄອບຄົວມີເນື້ອທີ່20.553 ເຮັກຕາ, ທຽບໃສ່ປີ ຜ່ານມາເພີ່ມຂຶ້ນ 3.658 ເຮັກຕາ, ທົ່ວແຂວງມີຟາມລ້ຽງສັດທັງໝົດ 100 ກວ່າຟາມ ໃນນີ້ຟາມງົວ-ຄວາຍ 44 ຟາມ, ມີງົວ-ຄວາຍ 2.909 ໂຕ, ທຽບໃສ່ປີຜ່ານມາຫຼຸດລົງ 5 ຟາມ, ຟາມລ້ຽງໝູມີ 35 ຟາມມີໝູ 19.786 ໂຕ, ມີພໍ່ພັນ 36 ໂຕ, ແມ່ພັນ593 ໂຕ, ຜະລິດໝູໄດ້ 11.397 ໂຕ, ຟາມໄກ່ ພັນໄຂ່ 22 ຟາມມີໄກ່ 68,8 ພັນໂຕສະເລ່ຍການໃຫ້ໄຂ່ໄດ້ 67.390 ໜ່ວຍຕໍ່ມື້, ທົ່ວແຂວງມີໜອງປາທັງໝົດ 11.083 ໜອງ, ລ້ຽງປາໃນກະຊັງມີ 89 ກະຊັງ, ປ່ອຍປາ 39 ພັນໂຕ ໃນ 1 ປີຜ່ານມາສາມາດຜະລິດສັດເປັນສິນຄ້າບໍລິໂພກພາຍໃນໄດ້ 55.689 ໂຕ, ໝູ 43.519 ໂຕ ພ້ອມນີ້ຍັງສົ່ງອອກຂາຍຕ່າງແຂວງໃນຈໍານວນ 12.939 ໂຕ ລວມມູນຄ່າ 55 ຕື້ກີບ; ໃນນີ້ມີຄວາຍ 4.671 ໂຕ, ງົວ 5.725 ໂຕ, ໝູ 2.543 ໂຕ.

  ທ່ານຍັງກ່າວຕື່ມວ່າ: ໃນປີ 2020 ນີ້ຕ້ອງສູ້ຊົນສະໜອງຊີ້ນ, ປາ, ໄຂ່ສະເລ່ຍໃສ່ຫົວຄົນໜຶ່ງໃຫ້ໄດ້ 52 ກິໂລຕໍ່ຄົນຕໍ່ປີ ພ້ອມທັງ ຊຸກຍູ້ສົ່ງເສີມຜະລິດຊີ້ນ, ປາ, ໄຂ່ ໃຫ້ໄດ້ 20.621 ໂຕນ, ສົ່ງເສີມການລ້ຽງສັດເຮັດໃຫ້ຝູງສັດຂະຫຍາຍຕົວໃນລະດັບ 7% ຕໍ່ປີ, ລ້ຽງປາໃຫ້ໄດ້ 42 ລ້ານໂຕ ຜົນຜະລິດປາເພີ່ມຂຶ້ນ 8% ຕໍ່ປີ ແລະການຜະລິດສັດເປັນສິນຄ້າສົ່ງອອກໃຫ້ໄດ້ 16 ພັນໂຕ, ຄວາຍ 5 ພັນໂຕ, ງົວ 6 ພັນໂຕ ແລະໝູ 5 ພັນໂຕ.

______________

ຂຽນໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์