ທຳຮ້າຍຮ່າງກາຍກັນເສຍຊີວິດທີ່ປະຕູໄຊ

  ກໍລະນີທີ່ພົບຊາຍນິລະນາມນອນເສຍຊີວິດໂດຍບໍ່ຮູ້ເສຍເຫດຢູ່ບໍລິເວນປະຕູໄຊໃນຕອນເຊົ້າວັນທີ 30 ມີນາ 2020 ຜ່ານມາ ເຮັດໃຫ້ປະຊາຊົນພາກັນແຕກຕື່ນຫຼາຍພໍ ສົມຄວນເນື່ອງຈາກວ່າຜູ້ທີ່ເສຍຊີວິດນັ້ນແມ່ນມາຈາກໃສ ແລະເສຍຊີວິດຍ້ອນສາຍເຫດອັນໃດຫຼາຍໆທ່ານທີ່ຊາບຂ່າວ ແລະເຫັນລົງໃນສື່ອອນລາຍກໍເກີດຄວາມບໍ່ສະບາຍໃຈຄິດວ່າຜູ້ກ່ຽວນັ້ນອາດຕາຍຍ້ອນຕິດເຊື້ອພະຍາດ COVID-19 ກໍເປັນໄປໄດ້ເພາະຢູ່ໃນໄລຍະຂອງການແຜ່ລະບາດຂອງພະຍາດດັ່ງກ່າວນີ້.

ຈາກການລົງກວດສອບສະຖານທີ່ເກີດເຫດຂອງເຈົ້າໜ້າທີ່ເພື່ອເກັບກຳຂໍ້ມູນຫຼັກຖານໂດຍສະເພາະກ້ອງວົງຈອນປິດໃກ້ຈຸດເກີດເຫດທີ່ຈະເປັນຫຼັກຖານຕົວຈິງຂອງການເສຍຊີວິດຈຶ່ງຮູ້ວ່າ: ເວລາປະມານ 12:12 ໂມງຂອງວັນທີ 30 ມີນາ 2020 ຜູ້ເສຍຊີວິດໄດ້ມີປາກສຽງກັບຊາຍຄົນໜຶ່ງ (ຜູ້ກໍ່ເຫດ) ຈົນເຖິງຂັ້ນລົງມືທຳຮ້າຍຮ່າງ ກາຍກັນໂດຍອີກຝ່າຍໄດ້ເຕະເຂົ້າກ້ານຄໍຂອງຜູ້ເສຍຊີວິດໜຶ່ງບາດເຂົ້າຈຸດສຳຄັນເຮັດໃຫ້ຜູ້ກ່ຽວລົ້ມລົງທັງຢືນ ແລະ ໝົດສະຕິຈາກນັ້ນໄດ້ມີຜູ້ຊາຍອີກຄົນຊຶ່ງເປັນຄົນທີ່ຢູ່ໃນເຫດການ ແລະເຫັນເຫດການທີ່ເກິດຂຶ້ນທັງໝົດເຂົ້າມາຊ່ວຍເຫຼືອຊາຍຜູ້ເຄາະຮ້າຍດັ່ງກ່າວໂດຍເຂົ້າມາຫາມໄປນັ່ງຢູ່ຕັ່ງເພື່ອເບິ່ງອາການແຕ່ກໍບໍ່ໄດ້ນຳສົ່ງໄປໂຮງໝໍ ຫຼືໂທລະສັບຫາໜ່ວຍກູ້ໄພມາຊ່ວຍເຫຼືອແຕ່ຢ່າງໃດເຮັດໃຫ້ຊາຍຜູ້ເຄາະຮ້າຍນັ້ນເສຍວິດໃນເວລາຕໍ່ມາ.

 ປະຈຸບັນຄະດີດັ່ງກ່າວນີ້ທາງເຈົ້າໜ້າທີ່ຕຳຫຼວດ ປກສ ກຳລົງຕິດຕາມຫາຂໍ້ມູນຫຼັກຖານເພື່ອຊອກຫາຜູ້ກະທຳຜິດມາດຳເນີນການສຶບສວນ-ສອບສວນຫາຕົ້ນຕໍໃນການກໍ່ເຫດຄັ້ງນີ້.

------------------

ໜັງສືພິມເສດຖະກິດ-ສັງຄົມ

แชร์