ອັດຕະປືຍັງມີບາງຮ້ານກິນດື່ມເປີດຢູ່

  ລາຍງານດ່ວນຈາກທ່ານຫົວໜ້າພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວໃນວັນທີ 30 ມີນາ 2020 ຜ່ານທາງນັກຂ່າວ-ສື່ມວນຊົນຂອງແຂວງອັດຕະປື ໃຫ້ຮູ້ວ່າ: ນັບແຕ່ໄດ້ຮັບແຈ້ງການຂອງລັດຖະມົນຕີກະຊວງ ຖວທ ກ່ຽວກັບການສັ່ງໂຈະ ຫຼືປິດຊົ່ວຄາວກິດຈະການການບໍລິການຕ່າງໆທີ່ພາໃຫ້ມີຊຸມຊົນຊຸມນົມກັນໜ້າແໜ້ນເພາະເປັນຄວາມສ່ຽງໃຫ້ແກ່ການແຜ່ເຊື້ອພະຍາດໂຄວິດ-19 ນັ້ນຄະນະສະເພາະກິດກ່ຽວຂ້ອງຂອງພະແນກ ຖວທ ແຂວງອັດຕະປື ໄດ້ນຳເອົາເເຈ້ງການ ແລະມະຕິ, ຄຳສັ່ງຕ່າງໆລົງປະສານສົມທົບກັບອຳນາດການປົກຄອງເມືອງ, ບ້ານເພື່ອເຜີຍແຜ່ໃຫ້ບັນດາຜູ້ປະກອບການຮ້ານກິນດື່ມທົ່ວໄປພາຍໃນແຂວງຢ່າງເຄັ່ງຄັດ.

  ທ່ານ ນາງ ບຸນນານ ບຸນນະແສງ ຫົວໜ້າພະແນກ ຖວທ ແຂວງອັດຕະປືຄະນະກຳມະການຄວບຄຸມ, ປ້ອງກັນພະຍາດໂຄວິດ-19 ຂັ້ນແຂວງເເຈ້ງຕົວເລກໃຫ້ຊາບວ່າ: ມາຮອດປະຈຸບັນບັນດາຮ້ານບໍລິການ ຫຼືວ່າສະຖານທີ່ທ່ອງທ່ຽວບ່ອນທີ່ມີຄົນຊຸມນຸມຫຼາຍໃນທົ່ວແຂວງຊຶ່ງທົ່ວແຂວງມີຈຳນວນ 108 ແຫ່ງນັ້ນໄດ້ສັ່ງໃຫ້ປິດຊົ່ວຄາວໄປແລ້ວ 106 ແຫ່ງ ຊຶ່ງຍັງອີກ 2 ແຫ່ງ “ບໍ່ໄດ້ເອີຍຊື່ຢູ່ເມືອງສາມັກຄີໄຊ” ມອບໃຫ້ຄະນະກຳມະການສະເພາະກິດກ່ຽວຂ້ອງສົມທົບກັນສືບຕໍ່ສຶກສາອົບຮົມແນະນຳໃຫ້ຜູ້ກ່ຽວຕ້ອງໄດ້ຈັດຕັ້ງປະຕິບັດຕາມຄຳສັ່ງແນະນຳຂອງຂັ້ນເທິງໃຫ້ເຂັ້ມງວດ,

  ນອກຈາກນີ້, ຍັງສັ່ງໃຫ້ຢຸດຕິ ຫຼືໂຈະການຈັດງານບຸນປະເພນີຕ່າງໆນັບທັງບຸນປີໃໝ່ລາວ, ພິທີປ່ຽນຜ້າບ່ຽງພະອົງແສນທີ່ວັດສະເເຄະ, ການຈັດງານປະກວດຕ່າງໆ, ສະຖານທີ່ທ່ອງທ່ຽວໃນແຕ່ລະທ້ອງຖິ່ນມອບໃຫ້ເຈົ້າເມືອງ, ອຳນາດການປົກຄອງບ້ານເຮັດໜ້າທີ່ຕິດກວດກາຕາມແຈ້ງການຂອງຂັ້ນເທິງທຸກສະບັບໃຫ້ເຄັ່ງຄັດເພື່ອເປັນການສະກັດກັ້ນການແຜ່ລະບາດຂອງເຊື້ອໄວຣັດໂຄວິດ-19 ທີ່ກຳລັງລະບາດໃນຂະນະນີ້.

  ພ້ອມດຽວກັນນີ້ ທ່ານ ນາງ ບຸນນານ ບຸນນະແສງຍັງໄດ້ກ່າວສະເເດງຄວາມຍ້ອງຍໍຊົມເຊີຍເປັນຢ່າງສູງຕໍ່ບັນດາຜູ້ປະກອບການໃນທົ່ວແຂວງທີ່ໄດ້ໃຫ້ຄວາມຮ່ວມໄມ້ຮ່ວມມືນຳພາກລັດໂດຍສະເພາະແມ່ນການປະຕິບັດຄຳສັ່ງ, ແຈ້ງການຕ່າງໆຂອງຂັ້ນເທິງຄິດວ່າສັງຄົມຊາວແຂວງອັດຕະປືຈະໄດ້ພ້ອມພຽງຮຽງໜ້າກັນເປັນຈິດໜຶ່ງໃຈດຽວເພື່ອຜົນປະໂຫຍດລວມຂອງບຸກຄົນ, ຄອບຄົວ ແລະປະເທດຊາດຮຽກຮ້ອງໃຫ້ສັງຄົມໃນທົ່ວແຂວງທີ່ຍັງບໍ່ທັນໄດ້ປະຕິບັດຕາມແຈ້ງການຕ່າງໆກໍ່ຂໍໃຫ້ມີສະຕິລະວັງຕົວ ແລະມີຈິດສຳນຶກເພື່ອພ້ອມກັນປ້ອງກັນບໍ່ໃຫ້ແຜ່ເຖິງຄົນອື່ນ.

_________

ຂຽນໂດຍ: ສາຍນໍ້າ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์