ໂຮງໝໍຈຳປາສັກສາມາດກວດຫາເຊື້ອໂຄວິດ-19

  ປະຈຸບັນໂຮງໝໍແຂວງຈໍາປາສັກມີອຸປະກອນການແພດທີ່ສາມາດກວດຫາເຊື້ອພະຍາດໂຄວິດ-19 ໄດ້ແລ້ວ, ແຕ່ຍັງຕ້ອງໄດ້ສົ່ງຜົນກວດຂຶ້ນໄປກວດຢູ່ນະຄອນຫຼວງວຽງຈັນຕື່ມອີກເພື່ອຄວາມເປັນເອກະພາບ ແລະຖືກຕ້ອງຊັດເຈນ.

  ທ່ານ ດຣ ສີວິໄຊ ໄຊຍະສານ ຮອງຫົວໜ້າພະແນກສາທາລະນະສຸກ ແຂວງຈໍາປາສັກ ໃຫ້ຮູ້ຕື່ມວ່າ: ພະແນກສາທາໄດ້ຈັດທີມແພດຕັ້ງຈຸດກວດຕາມດ່ານຕ່າງໆ ເພື່ອກວດສຸຂະພາບຂອງປະຊາຊົນທີ່ເດີນທາງເຂົ້າປະເທດຢ່າງເຂັ້ມງວດໂດຍເນັ້ນໜັກທຸກຄົນຕ້ອງໄດ້ຜ່ານການກວດອຸນຫະພູມ, ໄດ້ຮັບການແນະນໍາຈາກທີມແພດ, ມີການສອບຖາມປະຫວັດ, ນອກນີ້ໃນກໍລະນີກວດພົບຜູ້ມີອຸນຫະພູມສູງ (ໄຂ້ສູງ) ເຂົ້າຂ່າຍ ຫຼືນິຍາມຂອງໂຄວິດແມ່ນໄດ້ກັກຕົວມາໄວ້ທີ່ສູນກັກຕົວໂຮງໝໍເມືອງໂພນທອງ14 ວັນເພື່ອຕິດຕາມປິ່ນປົວ, ຜູ້ທີ່ອະນຸຍາດໃຫ້ກັບບ້ານກໍຕ້ອງໄດ້ກັກບໍລິເວນຕົນເອງ (ຢູ່ຫ່າງຈາກບຸກຄົນອື່ນ) 14 ວັນເຊັ່ນດຽວກັນ.

  ອາທິດຜ່ານມາມີແຮງງານລາວທີ່ເດີນທາງກັບຈາກຣາຊະອານາຈັກໄທເຂົ້າມາລາວຈໍານວນຫຼາຍພັນຄົນຜ່ານດ່ານສາກົນວັງເຕົ່າ-ຊ່ອງເມັກແຂວງຈໍາປາສັກຕໍ່ກັບການລະບາດຂອງພະຍາດດັ່ງກ່າວເຮັດໃຫ້ເຈົ້າໜ້າທີ່ຂອງລັດແຕ່ລະຂະແໜງການໄດ້ດໍາເນີນການປະຕິບັດໜ້າທີ່ຂອງຕົນຢ່າງເຂັ້ມງວດເພື່ອພ້ອມກັນຂາມຜ່ານວິກິດການຈາກການລະບາດຂອງພະຍາດທີ່ເກີດຂຶ້ນເປັນຕົ້ນ: ພະແນກສາທາລະນະສຸກເປັນເຈົ້າການຕັ້ງຈຸດກວດສຸຂະພາບຂອງປະຊາຊົນທີ່ເດີນທາງເຂົ້າປະເທດ,ກອງບັນຊາການ ປກສ ແຕ່ລະຂັ້ນຕິດຕາມຄົນເຂົ້າ-ອອກເມືອງ, ເຈົ້າໜ້າທີ່ພາສີຕິດຕາມການຈໍລະຈອນສິນຄ້າທັງນີ້ກໍເພື່ອຕອບສະໜອງໃຫ້ແກ່ສັງຄົມກໍຄືປະຊາຊົນໄດ້ຮັບຄວາມສະດວກໃນແຕ່ລະດ້ານ.

  ທ່ານ ພັນຕີ ສະໝານ ອ່ອນໄຊວຽງ ຮັກສາການ ຫົວໜ້າຕໍາຫຼວດກວດຄົນເຂົ້າ-ອອກເມືອງ (ຕມ) ດ່ານສາກົນວັງເຕົ່າກ່າວວ່າ: ການປະຕິບັດໜ້າທີ່ຂອງເຈົ້າໜ້າທີ່ ຕມ ແມ່ນວາງກໍາລັງຕາມຈຸດສໍາຄັນເພື່ອກວດກາຄົນເຂົ້າ-ອອກເມືອງຢ່າງລະອຽດຊຶ່ງຖືສໍາຄັນຜູ້ທີ່ຈະກັບບ້ານຕ້ອງມີໃບຢັ້ງຢືນຜ່ານການກວດກາຈາກແພດຈິ່ງອະນຸຍາດໃຫ້ກັບບ້ານພ້ອມນີ້ກໍປະສານສົມທົບກັບພາກສ່ວນກ່ຽວຂ້ອງທັງຝ່າຍລາວ ແລະ ເຈົ້າໜ້າທີ່ຝ່າຍໄທກ່ຽວກັບການອໍານວຍຄວາມສະດວກໃຫ້ແກ່ປະຊາຊົນລາວທີ່ເດີນທາງກັບປະເທດຜ່ານດ່ານສາກົນວັງເຕົ່າ-ຊ່ອງເມັກ ຊາຍແດນລາວ-ໄທ.

ສະໜັບສະໜູນໂດຍ: HONDA

  ທ່ານ ວິເລືອງ ວໍລະບຸດ ຫົວໜ້າພາສີດ່ານສາກົນວັງເຕົ່າຢືນຢັນວ່າ: ການນໍາເຂົ້າສິນຄ້າຜ່ານດ່ານຍັງປົກກະຕິ, ສາມາດຕອບສະໜອງສິນຄ້າປະເພດຕ່າງໆແກ່ສັງຄົມໄດ້ຢ່າງພຽງພໍ ແລະຮຽກຮ້ອງຜູ້ຄ້າຂາຍຢ່າກັກຕຸນສິນຄ້າໄວ້, ຢ່າສວຍໂອກາດຂຶ້ນລາຄາສິນຄ້າຊຶ່ງຈະເປັນການສ້າງຄວາມສັບສົນແກ່ສັງຄົມໃນໄລຍະທີ່ບ້ານເມືອງກໍາລັງປະເຊີນກັບການແຜ່ລະບາດຂອງພະຍາດ, ທ່ານ ວິເລືອງ ວໍລະບຸດ ກ່າວຕື່ມວ່າ: ໃນໄລຍະເກີດການລະບາດຂອງພະຍາດ ໂຄວິດ-19 ເຮັດໃຫ້ນັກທຸລະກິດ, ບໍລິສັດຈໍານວນໜຶ່ງຢຸດສະຫງັກບໍ່ກ້າສັ່ງສິນຄ້າເພື່ອນໍາເຂົ້າສົ່ງຜົນໃຫ້ການນໍາເຂົ້າສິນຄ້າບາງປະເພດມີຈໍານວນຫຼຸດລົງເລັກນ້ອຍຖ້າທຽບໃສ່ໄລຍະສະພາບປົກກະຕິ.

แชร์