ລັດເຜີຍແຜ່ການຄວບຄຸມໂຄວິດ-19 ໃຫ້ບັນດາທູດຢູ່ລາວ

  ກະຊວງການຕ່າງປະເທດໄດ້ນຳເອົາຄຳສັ່ງຂອງນາຍົກລັດຖະມົນຕີເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ-19 ມາເຜີຍແຜ່ໃຫ້ບັນດາທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນປະຈຳ ສປປ ລາວ ເພື່ອໃຫ້ທຸກພາກສ່ວນຈັດຕັ້ງປະຕິບັດຢ່າງເປັນເອກະພາບ ແລະປະສິດທິຜົນ.

  ພິທີຖະແຫຼງຂ່າວໄດ້ຈັດຂຶ້ນວັນທີ 30 ມີນາ 2020 ທີ່ນະຄອນຫຼວງວຽງຈັນ ໂດຍເປັນປະທານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ພ້ອມກັນນັ້ນກໍໄດ້ແຈກຢາຍຄຳສັ່ງດັ່ງກ່າວຊຶ່ງເປັນສະບັບພາສາອັງກິດໃຫ້ບັນດາຜູ້ເຂົ້າຮ່ວມເພື່ອໃຫ້ສາມາດເຂົ້າໃຈລາຍລະອຽດຂອງຄຳສັ່ງ ແລະນຳໄປຈັດຕັ້ງປະຕິບັດຢ່າງເຄັ່ງຄັດ.

  ໂອກາດນີ້, ທ່ານ ສະເຫຼີມໄຊ ກົມມະສິດ ກ່າວວ່າ: ຄຳສັ່ງດັ່ງກ່າວຈະເລີ່ມປະຕິບັດຕັ້ງແຕ່ມື້ນີ້ເປັນຕົ້ນໄປ, ພ້ອມໄດ້ເນັ້ນບາງປະເດັ່ນທີ່ສຳຄັນຂອງຄຳສັ່ງເປັນຕົ້ນແມ່ນ: ລັດຖະບານລາວຈະໄດ້ສືບຕໍ່ປິດດ່ານປະເພນີ ແລະດ່ານທ້ອງຖິ່ນຢ່າງເຂັ້ມງວດເດັດຂາດ ແລະປິດດ່ານສາກົນທັງໝົດນັບຕັ້ງແຕ່ມື້ນີ້ຮອດວັນທີ 19 ເມສາ 2020 ສໍາ ລັບການເຂົ້າອອກຂອງບຸກຄົນລວມທັງຜູ້ທີ່ໄດ້ຮັບອະນຸຍາດແລ້ວແຕ່ບໍ່ທັນໄດ້ອອກ ຫຼືເຂົ້າມາກະລຸນານຳເອົາຂໍ້ມູນດັ່ງກ່າວໄປແຈ້ງໃຫ້ປະຊາຊົນ ແລະ ປະເທດຂອງຕົນຮັບຊາບໂດຍດ່ວນໂດຍສະເພາະຕໍ່ຜູ້ທີ່ມີຈຸດປະສົງເດີນທາງມາ ສປປ ລາວ ກະຊວງການຕ່າງປະເທດຍິນດີໃຫ້ປະສານສົມທົບກັບພາກສ່ວນທີ່ກ່ຽວຂ້ອງເພື່ອອໍານວຍຄວາມສະດວກໃຫ້ແກ່ຊາວຕ່າງປະເທດຢູ່ໃນ ສປປ ລາວ ທີ່ມີຈຸດປະສົງຢາກເດີນທາງກັບຄືນປະເທດຂອງຕົນ.

  ນອກນັ້ນກອງປະຊຸມຍັງໄດ້ແຈ້ງກ່ຽວກັບການຢຸດມາເຮັດວຽກຢູ່ຫ້ອງການຂອງພະນັກງານ, ລັດຖະກອນແຕ່ວັນທີ 1-11 ເມສາ 2020 ແລະສືບຕໍ່ພັກບຸນປີໃຫມ່ລາວ ຮອດວັນທີ 19 ເມສາ 2020 ຫ້າມປະຊາຊົນ, ພະນັກງານ, ລັດຖະກອນ, ທະຫານ, ຕໍາຫຼວດ, ກໍາມະກອນ, ນັກຮຽນ, ນັກສຶກສາ, ຜູ້ປະກອບການ, ຊາວຕ່າງດ້າວ, ຜູ້ບໍ່ມີສັນຊາດ ແລະຊາວຕ່າງປະເທດທີ່ຢູ່ ສປປ ລາວ ອອກຈາກເຮືອນ ຫຼືທີ່ພັກອາໄສຂອງຕົນ, ຍົກເວັ້ນກໍລະນີທີ່ຈໍາເປັນ, ຫ້າມບຸກຄົນເດີນທາງໄປທ້ອງຖິ່ນອື່ນຢູ່ໃນເຂດທີ່ມີການຕິດເຊື້ອ ແລະເຂດທີ່ມີຄວາມສ່ຽງຍົກເວັ້ນຜູ້ທີ່ໄດ້ຮັບອະນຸຍາດຈາກອົງການປົກຄອງທ້ອງຖິ່ນ, ລວມທັງການໂຈະຊົ່ວຄາວການບໍລິການຂົນສົ່ງຜູ້ໂດຍ ສານ.

ສະໜັບສະໜູນໂດຍ: honda

   ພ້ອມດຽວກັນນີ້ກໍຫ້າມຈັດກິດຈະກໍາ, ປະຊຸມ, ໂຮມຊຸມນຸມຕ່າງໆທີ່ມີຜູ້ເຂົ້າຮ່ວມຫຼາຍກວ່າ 10 ຄົນສຳລັບທະນາຄານ, ສະຖາບັນການເງິນທີ່ບໍ່ແມ່ນທະນາຄານ, ຕະຫຼາດຫຼັກຊັບ, ບໍລິສັດຫັກຊັບໂຮງໝໍ, ສູນການແພດ, ຮ້ານຂາຍຢາ, ໜ່ວຍກູ້ ໄພ, ກິດຈະການໄປສະນີ, ໂທລະຄົມມະນາຄົມ, ໄຟຟ້າ, ນໍ້າປະປາ, ການບໍລິການ ເກັບ ແລະຖິ້ມຂີ້ເຫຍື້ອ, ຕະຫຼາດກະສິກໍາ, ຮ້ານຂາຍເຄື່ອງຍ່ອຍ, ຮ້ານຄ້າ, ປໍ້ານໍ້າມັນ, ຮ້ານອາຫານ ແລະຮ້ານກາເຟ, ລວມທັງໂຮງແຮມທີ່ໃຫ້ບໍລິການທີ່ພັກ ແລະຮ້ານອາຫານແມ່ນຍັງອະນຸຍາດໃຫ້ສືບຕໍ່ດຳເນີນກິດຈະການແຕ່ຕ້ອງປະຕິບັດມາດຕະການປ້ອງກັນຢ່າງເຂັ້ມງວດ.

________

ໜັງສືພິມເສດຖະກິດ-ສັງຄົມ

แชร์