ຕົວເລກຜູ້ຕິດເຊື້ອໂຄວິດ-19 ຢູ່ລາວເພີ່ມຂື້ນເປັນ 9 ກໍລະນີ ຜູ້ລ່າສຸດມີປະຫວັດເດີນມາແຕ່ໄທ

  ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກຜູ້ປະຈໍາການຄະນະສະເພາະກິດການເຝົ້າລະວັງ COVID-19 ປະຈຳດ່ານໃນ ສປປ ລາວ ແຈ້ງໃນວັນທີ 30 ມີນາ 2020 ໃຫ້ຊາບວ່າ: ຮອດ 17:00 ໂມງແລງຂອງວັນທີ 29 ມີນາ 2020 ຕາມດ່ານຊາຍແດນ ແລະສະໜາມບິນສາກົນຈໍານວນຜູ້ເດີນທາງເຂົ້າມາທັງໝົດ 3.112 ຄົນໃນນັ້ນຈໍານວນຜູ້ເດີນທາງຜ່ານສະໜາມບິນມີທັງໝົດ 42 ຄົນ ຈໍານວນຜູ້ເດີນທາງຜ່ານທາງດ່ານຂົວມິດຕະພາບລາວ-ໄທ ທັງ ໝົດ 2.141 ຄົນ ມີຄົນເປັນໄຂ້ 4 ຄົນ ທັງໝົດແມ່ນຢູ່ແຂວງຈຳປາສັກ ໄດ້ຮັບການຕິດຕາມຢູ່ໂຮງໝໍເມືອງ ໂພນທອງ ແລະຈະເກັບຕົວຢ່າງສົ່ງມາແຂວງ.

  ໂດຍໃນວັນທີ 29 ມີນາ 2020 ມີກໍລະນີສົງໄສ 64 ກໍລະນີທີ່ຕິດຕາມຢູ່ໂຮງໝໍໃນແຕ່ລະແຂວງຄື: ນະຄອນຫຼວງວຽງຈັນ 49 ກໍລະນີ, ແຂວງຫຼວງພະບາງ 11 ກໍລະນີ, ແຂວງສາລາວັນ 2 ກໍລະນີ, ແຂວງໄຊຍະບູລີ ແລະຜົ້ງສາລີ ແຂວງລະ 1 ກໍລະນີ.

ແຕ່ຜ່ານຜົນກວດວິເຄາະ 63 ກໍລະນີ ເປັນລົບ,ມີ 1 ກໍລະນີຕິດເຊື້ອເປັນເພດຍິງ ອາຍຸ 22 ປີ ບ້ານໂພນພະເນົາ ເມືອງໄຊເສດຖາ ນະຄອນຫຼວງວຽງຈັນ ຜູ້ກ່ຽວມີປະ ຫວັດການເດີນທາງມາແຕ່ປະເທດໄທ.

ສະໜັບສະໜູນໂດຍ: HONDA

  ປະຈຸບັນໄດ້ເອົາເຂົ້ານອນປິ່ນປົວຢູ່ໂຮງໝໍມິດຕະພາບດ້ວຍອາການເບົາບາງ, ມີໄຂ້, ໄອ, ນໍ້າມູກ, ຍ່າງໄປ-ມາ ແລະຊ່ວຍເຫຼືອຕົນເອງໄດ້.

  ສປປ ລາວ ກວດພົບຜູ້ຕິດເຊື້ອໂຄວິດ-19 ໃນວັນທີ 24 ມີນາ ມາຮອດວັນທີ 30 ມີນາ ລວມຕົວເລກຜູ້ຕິດເຊື້ອແລ້ວຈຳນວນ 9 ກໍລະນີ ຢູ່ນະຄອນຫຼວງ 6 ກໍລະນີ ແລະຢູ່ແຂວງຫຼວງພະບາງ 3 ກໍລະນີ ຈາກຈຳນວນທີ່ໄດ້ກວດວິເຄາະກໍລະນີສົງໄສທັງໝົດມີ 364 ກໍລະນີ.

แชร์