ຈີນ ສົ່ງຊ່ຽວຊານ ແລະອຸປະກອນການແພດ ຊ່ວຍລາວຕ້ານໂຄວິດ-19

  ຈາກສະພາບລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ໄດ້ລະບາດແຜ່ລາມອອກໄປທົ່ວໂລກຢ່າງກວ້າງຂວາງໃນທຸກມື້, ຢູ່ ສປປ ລາວ ເຮົາກໍໄດ້ພົບຜູ້ຕິດເຊື້ອເປັນຜົນບວກເຖິງ 8 ຄົນ ແລ້ວນັ້ນ, ເພື່ອສືບຕໍ່ການຮ່ວມມືລະຫວ່າງສອງປະເທດເພື່ອນມິດຍຸດທະສາດ ແລະຄູ່ຮ່ວມຊະຕາກຳລາວ-ຈີນ, ລັດຖະບານແຫ່ງ ສປ ຈີນ ໄດ້ປະກາດຊ່ວຍເຫຼືອ ສປປ ລາວ ໃນການຕ້ານ ແລະສະກັດກັ້ນກັບພະຍາດດັ່ງກ່າວໂດຍໄດ້ສົ່ງຄະນະແພດ ແລະຊ່ຽວຊານຈຳນວນ 12 ທ່ານພ້ອມດ້ວຍອຸປະກອນການແພດເພື່ອມາຊ່ວຍ ສປປ ລາວ, ຊຶ່ງການຊ່ວຍເຫຼືອດັ່ງກ່າວໄດ້ເດີນທາງມາເຖິງສະໜາມບິນສາກົນວັດໄຕ ທີ່ນະຄອນຫຼວງວຽງຈັນ ໃນເວ ລາ 10:30 ໂມງຂອງວັນທີ 29 ມີນາ 2020.

 ທີ່ສະໜາມບິນສາກົນວັດໄຕໄດ້ຈັດພິທີຕ້ອນຮັບຄະນະແພດ ແລະຊ່ຽວຊານຢ່າງເປັນທາງການ ແລະສົມກຽດ, ໂດຍແມ່ນທ່ານ ສົມດີ ດວງດີ ຮອງນາຍົກ ລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ (COVID-19) ແລະທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ, ພ້ອມດ້ວຍຄະນະ ແລະ ເຈົ້າໜ້າທີ່ຈາກສະຖານເອກອັກຄະລັດຖະ ທູດ ແຫ່ງ ສປ ຈີນ ປະຈໍາ ນະຄອນຫຼວງວຽງຈັນ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ສຳລັບບັນຍາກາດໃນການຕ້ອນຮັບຄະນະແພດ ແລະຊ່ຽວຊານດັ່ງກ່າວແມ່ນເຕັມໄປດ້ວຍໄມຕີຈິດມິດຕະພາບອັນອົບອຸ່ນພາຍໃຕ້ຄຳຂວັນຮ່ວມກັນຂອງສອງປະເທດລາວ-ຈີນ ຄື: “ຮ່ວມມືກັນຕ້ານພະຍາດໂຄວິດ-19 ຮ່ວມທຸກຮ່ວມຍາກ”.

  ສຳລັບແຜນການເຮັດວຽກຢູ່ ສປປ ລາວ ຂອງຄະນະແພດ ແລະຊ່ຽວຊານແມ່ນຈະດຳເນີນໄປໃນໄລຍະເວລາ 14 ວັນ, ໂດຍຈະແບ່ງປັນປະສົບການກັບຝ່າຍລາວໃນການປ້ອງກັນ ແລະຄວບຄຸມພະຍາດດັ່ງກ່າວ, ກວດຄັດກອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ ແລະປິ່ນປົວຄົນເຈັບ, ພ້ອມທັງຈະແລກປ່ຽນບົດ ຮຽນກັບກະ ຊວງສາທາລະນະສຸກ ແລະໂຮງໝໍສູນກາງຂອງ ສປປ ລາວ.

____________

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์