ເຈົ້າເມືອງເຊໂປນ ລົງຕິດຕາມແຮງງານທີ່ເດີນທາງມາຈາກຕ່າງປະເທດ

  ເພື່ອຕິດຕາມການເຝົ້າລະວັງ ແລະໂຕ້ຕອບການລະບາດຂອງພະຍາດອັກເສບປອດຍ້ອນເຊື້ອຈຸລະໂລກສາຍພັນໃໝ່ໂຄວິດ-19 ບໍ່ໃຫ້ມີການແຜ່ລະບາດໄປກວ້າງໄກໃນວັນທີ 26 ມີນາ 2020 ນີ້ທ່ານ ວົງສະຫວັນ ວຽງມະນີ ເຈົ້າເມືອງເຊໂປນ ແຂວງສະຫວັນນະເຂດ ພ້ອມດ້ວຍຄະນະຮັບຜິດຊອບໄດ້ລົງເຄື່ອນໄຫວຕິດຕາມກວດກາ ແຮງງານລາວທີ່ເດີນທາງກັບຄືນປະເທດແລ້ວກັກກັນຊົ່ວຄາວເພື່ອປ້ອງກັນບຸກຄົນທີ່ມີຄວາມສ່ຽງທີ່ຕິດພັນກັບເຊື້ອພະຍາດໂຄວິດ-19.

 ສຳລັບບັນດາແຮງງານທີ່ໄດ້ກັບຄືນປະເທດຄັ້ງນີ້ແມ່ນໄດ້ມາ ທາງດ່ານສາກົນຂົວມິດຕະພາບ 2 ສະຫວັນນະເຂດ-ມຸກດາຫານ ຈຶ່ງໄດ້ກັກກັນຊົ່ວຄາວທີ່ໂຮງຮຽນ ມສ ເຊໂປນ ເພື່ອປະຕິບັດຕາມາດຕະການລັດວາງອອກ ແລະປ້ອງກັນຮອງຮັບບຸກຄົນທີ່ມີຄວາມສ່ຽງທີ່ຕິດພັນກັບເຊື້ອພະຍາດໂຄວິດ-19 ທັງໝົດມີ 11 ຄົນ, ຍິງ 8 ໂດຍໄດ້ມີການຕິດຕາມກວດກາ ດ້ານສຸຂະພາບຢ່າງໃກ້ຊິດຈາກພະນັກງານແພດໝໍປະຈຳສູນຈົນກວ່າຈະເຖິງກຳນົດ 14 ວັນຖ້າຫາກ ວ່າບໍ່ພົບກໍລະນີສົງໃສ ຫຼືເປັນໄຂ້ທາງສູນແມ່ນຈະອະນຸຍາດໃຫ້ບຸກຄົນດັ່ງກ່າວກັບຄືນບ້ານເຮືອນຂອງຕົນໄດ້.

  ພ້ອມນັ້ນທ່ານເຈົ້າເມືອງກໍ່ໄດ້ເນັ້ນໜັກໃຫ້ເຈົ້າໜ້າທີ່ສົມທົບປຶກສາຫາລືກັນໃນການຈັດສັນລົດເພື່ອຂົນສົ່ງແຮງງານລາວທີ່ມາຈາກປະເທດໄທນຳສົ່ງໄປຍັງສູນກັກກັນຊົ່ວຄາວຕາມມາດຕະການວ່າງອອກ ແລະຍັງໄດ້ເນັ້ນໃຫ້ພະນັກງານພ້ອມດ້ວຍພາກສ່ວນທີ່ກ່ຽວຂ້ອງຕ້ອງໄດ້ເອົາໃຈໃສ່ໂຄສະນາສຸຂະສຶກສາໃຫ້ປະຊາຊົນມີຄວາມຕື່ນຕົວເປັນເຈົ້າຕົນເອງໃນການເຝົ້າລະວັງ,ຮ່ວມກັນສືບຕໍ່ແກ້ໄຂທາງດ້ານຂໍ້ຫຍຸ້ງຍາກເປັນຕົ້ນແມ່ນອຸປະກອນການແພດ, ເຄື່ອງມືຮັບໃຊ້ຕ່າງໆ ພ້ອມທັງປຸກລະດົມການຊ່ວຍ ເຫຼືອຈາກສັງຄົມ ແລະເອົາໃຈໃສ່ສືບກຽມຮອງຮັບຕື່ມອີກເນື່ອງຈາກວ່າໄລຍະນີ້ຍັງມີຜູ້ເດີນທາງກັບຄືນປະເທດຢູ່ເລື້ອຍໆ.

 

แชร์