ເຊກອງ ຈະເລັ່ງໃສ່ພັດທະນາການທ່ອງທ່ຽວ ທີ່ເປັນທ່າແຮງຢູ່ບັນດາເມືອງ

 ທ່ານ ບຸນທົງ ຖິ່ນດອນໂຂ ຮອງຫົວໜ້າພະແນກ ຖວທ ແຂວງເຊກອງ ລາຍງານໃຫ້ຮູ້ວ່າປີ 2020 ຄະນະພັກ-ຄະນະພະແນກພວກເຮົາຈະເອົາໃຈໃສ່ສືບຕໍ່ພັດທະນາແຫຼ່ງທ່ອງທ່ຽວທີ່ເປັນທ່າແຮງຂອງແຂວງ, ບັນດາເມືອງຄື: ເມືອງລະມາມ ເລັງໃສ່ພັດທະນາແຫຼ່ງທ່ອງທ່ຽວທໍາມະຊາດແກ້ງຫຼວງໃຫ້ເປັນສະຖານທີ່ທ່ອງທ່ຽວທີ່ໜ້າ ທ່ຽວຊົມ, ແກ້ໄຂບັນຫາທີ່ດິນທີ່ຖືກຜົນກະທົບກັບຂະແໜງການກ່ຽວຂ້ອງໃຫ້ສຳເລັດເພື່ອເອື້ອອຳນວຍຄວາມສະດວກໃຫ້ຜູ້ປະກອບການມີຄວາມໜັ້ນໃຈໃນການລົງທຶນສ້າງຜະລິດຕະພັນຈັກສານໃບລານໃຫ້ກາຍເປັນຜະລິດຕະພັນການທ່ອງທ່ຽວຂອງເມືອງ; ເມືອງທ່າແຕງສົ່ງເສີມການທ່ອງທ່ຽວບຸນປະເພນີຂອງບັນດາເຜົ່າເປັນຕົ້ນບ້ານກັນດອນ, ບ້ານປຣາຍ ແລະບ້ານອື່ນໆ ໃຫ້ຕິດພັນກັບການທ່ອງທ່ຽວ, ປັບປຸງ ແລະພັດທະນາແຫຼ່ງທ່ອງທ່ຽວຕາດໄຟໄໝ້ໃຫ້ກາຍເປັນແຫຼ່ງທ່ອງທ່ຽວທຳມະຊາດທີ່ມີທັດສະນີຍະພາບສວຍງາມ, ສົ່ງເສີມຜະລິດຕະພັນກາເຟ ແລະເຫຼົ້າໝາກຂາມປ້ອມໃຫ້ເປັນຜະລິດຕະພັນການທ່ອງທ່ຽວຂອງເມືອງ.

   ເມືອງດາກຈຶງສົ່ງເສີມການທ່ອງທ່ຽວບຸນປະເພນີຊົນເຜົ່າ, ພັດທະນາຖໍ້າພູຫູຊ້າງໃຫ້ເປັນສະຖານທີ່ທ່ອງທ່ຽວຂອງເມືອງ ແລະຜະລິດຕະພັນຈາກໂສມເປັນປະເພດ ສິນຄ້າຂາຍໃຫ້ນັກທ່ອງທ່ຽວເປັນຕົ້ນ: ໂສມສົດ, ໂສມແຫ້ງ, ຊາໂສມ, ກາເຟໂສມໃຫ້ມີການຫຸ້ມຫໍ່ສວຍງາມ, ມີສະຕິກເກີຕິດຢ່າງຄັກແນ່ ເພື່ອໃຫ້ມີຄຸນນະພາບສ້າງຄວາມເຊື່ອໜັ້ນໃຫ້ຜູ້ບໍລິໂພກ; ເມືອງກະລືມດຶງດູດນັກລົງທຶນເຂົ້າມາພັດທະນາແຫຼ່ງທ່ອງທ່ຽວທຳມະຊາດບໍ່ນໍ້າອຸ່ນບ້ານປະຕຣາງ ແລະປັບປຸງຖໍ້າຈະກຳອົງແກ້ວບ້ານຈິງໃຫ້ສາມາດເປີດບໍລິການທ່ອງທ່ຽວ, ກຳນົດເອົາຜະລິດຕະພັນຕໍ່າແຜ່ນປະເພດສີ້ນໂຣມຂອງເຜົ່າກຣຽງ ແລະເຜົ່າກະຕູເປັນຜະລິດຕະພັນການທ່ອງທ່ຽວ ແລະ ສົ່ງ ເສີມການທ່ອງທ່ຽວບຸນປະເພນີຊົນເຜົ່າມີພາເຂົ້າໂດຍສານເປັນເອກະລັກວັດທະນະທຳທີ່ມີມາແຕ່ດັ້ງເດີມ.

   ພ້ອມທັງແກ້ໄຂປະກົດການຫຍໍ້ທໍ້ທີ່ເກີດຂຶ້ນກ່ຽວກັບບັນດາຮ້ານກິນດື່ມ, ບັນເທີງໃຫ້ວ່ອງໄວທັນການ ແລະຄຸ້ມຄອງຫົວໜ່ວຍຜູ້ປະກອບການໃຫ້ເຄື່ອນໄຫວຖືກຕ້ອງຕາມລະບຽບ, ຫຼັກການ, ວາງແຜນຄົ້ນຄວ້າ, ຈັດສັນເຂດການການບໍລິການໃຫ້ເໝາະສົມຫ່າງໄກຈາກຊຸມຊົນ, ສະຖານການສຶກສາຕາມດຳລັດ 315/ນຍ, ປັບປຸງລະບົບການເກັບກຳສະຖິຕິນັກທ່ອງທ່ຽວໃຫ້ເປັນລະບົບທັນສະໄໝວ່ອງໄວທັງຮັບປະກັນມີຄວາມລະອຽດຊັດເຈນທັນສະພາບການ, ປັບປຸງຫ້ອງຂໍ້ມູນຂ່າວສານການທ່ອງ ທ່ຽວ,ການໂຄສະນາແຫຼ່ງທ່ອງທ່ຽວ ແລະລາຍການທ່ອງທ່ຽວຂອງແຂວງ, ປັບປຸງວິທີການ ແລະ ຮູບແບບການຝຶກອົບຮົມໃຫ້ຫົວໜ່ວຍທຸລະກິດການທ່ອງທ່ຽວໃຫ້ມີປະສິດທິຜົນ, ເສີມຂະຫຍາຍການພົວພັນຮ່ວມມືກັບຕ່າງປະເທດ, ອົງການຈັດຕັ້ງສາກົນໃນການພັດທະນາບຸກຄະລາກອນໃນຂະແໜງການທ່ອງທ່ຽວໃຫ້ມີຄຸນນະພາບ.

__________

ຂຽນໂດຍ: ພຸດທະສອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 30/03/2020