ໂຮງໝໍແຂວງສະຫວັນນະເຂດ ກຽມກວດພະຍາດດ້ວຍລະບົບທັນສະໄໝ

 ວັນທີ 24 ມີນາຜ່ານມາທີ່ໂຮງໝໍແຂວງສະຫວັນນະເຂດ ໄດ້ຈັດພິທີເຊັນບົດບັນທຶກໃນການຮ່ວມມືດ້ານວິຊາການບໍລິການກວດດ້ວຍເຄື່ອງ CT scanner ລະຫວ່າງໂຮງໝໍແຂວງສະຫວັນນະເຂດ ແລະ ບໍລິສັດໄຊມັງກອນການຢາຈຳກັດຜູ້ດຽວໂດຍການເຂົ້າຮ່ວມຂອງ ທ່ານ ດຣ ແສງດາວ ສີດາໄລ ຮອງຫົວໜ້າພະແນກສາທາລະນະສຸກແຂວງ, ທ່ານ ດຣ ພູວິໄລ ແກ້ວມຸງຄຸນ ຜູ້ອຳນວຍການໂຮງໝໍແຂວງ, ທ່ານນາງ ແສງວອນ ຖັງ ຜູ້ອຳນວຍການບໍລິສັດໄຊມັງກອນການຢາຈຳກັດ,ທ່ານ ດຣ ຄຳປິງ ລາວ ຖັງ ຜູ້ອຳນວຍການໂຮງໝໍໄຊມັງກອນຕະຫຼອດເຖິງພະນັກງານ-ແພດໝໍທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.

  ການຮ່ວມມືກັນຄັ້ງນີ້ກໍ່ເພື່ອແນໃສ່ເຮັດໃຫ້ການບໍລິການກວດ ແລະປິ່ນປົວຄົນເຈັບມີຄວາມສະດວກສະບາຍ, ມີຄວາມຊັດເຈນ ແລະທັນສະໄໝຂຶ້ນກວ່າເນື່ອງຈາກວ່າໃນໄລຍະຜ່ານມາເຄື່ອງ CT scanner ຂອງທາງໂຮງໝໍແຂວງແມ່ນໄດ້ເປ່ເພສຳລັບເຄື່ອງ CT scanner ທີ່ຈະນຳມາໃຫ້ບໍລິການໃນໂຮງໝໍແຂວງສະຫວັນນະເຂດນີ້ທາງບໍລິສັດໄຊມັງກອນການຢາຈຳກັດໄດ້ລົງທຶນ100% ໃນການປະກອບ ແລະຕິດຕັ້ງເຄື່ອງດັ່ງກ່າວພ້ອມເຄື່ອງອຸປະກອນຄົບຊຸດຄິດເປັນມູນຄ່າທັງໝົດ 4,55ແສນໂດລາ ຊຶ່ງປະກອບມີ: 1. ເຄື່ອງ CT scanner ລຸ້ນ neuviz 16ຈຳນວນ 1 ເຄື່ອງ, 2. ເຄື່ອງ Laser Imager printer ຍີ່ຫໍ້ Lucky ລຸ້ນ Drymate 1901 ຈຳນວນ 1 ເຄື່ອງ, 3. ເຄື່ອງສີດຢາແສງ Injection 1 ເຄື່ອງ, 4. ຕູ້ໄຟອ່ານຟີມລະບົບ LED 1 ເຄື່ອງ, 5. ໝໍ້ຍົກໄຟຟ້າສຳລັງເຄື່ອງ CT 1 ເຄື່ອງ, 6. ໝໍ້ເກັບໄຟຟ້າສຸກເສີນກໍລະນີໄຟຟ້າບໍ່ມາສຳລັບCT 1 ເຄື່ອງ.

  ໂດຍບໍລິສັດແມ່ນຮັບຜິດຊອບຕໍ່ເຄື່ອງ CT scanner ແລະເຄື່ອງມືໃນການປະກອບໃນການຝຶກອົບຮົມທາງດ້ານວິ ຊາການເຕັກນິກການນຳໃຊ້ເຄື່ອງ, ການບຳລຸງຮັກ ສາ, ການສ້ອມແປງ ແລະກາປ່ຽນຖ່າຍອາໄຫຼ່ຕ່າງໆຢູ່ໃນໄລຍະການເຊັນສັນຍາຮ່ວມກັນ;ສ່ວນໂຮງໝໍແຂວງແມ່ນຮັບຜິດຊອບທາງດ້ານການຊຸກຍູ້ທາງດ້ານວິຊາການ, ການໂຄສະນາຂອງທ່ານໝໍທີ່ກ່ຽວຂ້ອງຕໍ່ການບໍລິການກວດຄົນເຈັບ.

 ສຳລັບລາຄາກວດຊ່ອງ CT ທົ່ວໄປ 1 ຈຸດ ແມ່ນ 8 ແສນກີບຕໍ່ເທື່ອຕໍ່ຈຸດ (ບໍ່ລວມອາກອນ), ລາຄາຊ່ອງ CT ໃສ່ຢາກັນແສງ 1 ຈຸດ 1 ລ້ານກີບຕໍ່ເທື່ອຕໍ່ຈຸດ (ບໍ່ລວມອາກອນ), ໃນການແບ່ງປັນຜົນປະໂຫຍດນີ້, ທາງບໍລິສັດຈະແບ່ງຜົນປະໂຫຍດໃຫ້ແກ່ໂຮງໝໍແຂວງຫຼັງຈາກສັງລວມ ແລະສະຫຼຸບລາຍຮັບ-ລາຍຈ່າຍໃນແຕ່ລະເດືອນໃນທຸກໆວັນທີ 5 ຂອງເດືອນຖັດໄປໂດຍໂຮງໝໍຈະໄດ້ 30% ຂອງມູນຄ່າລາຍຮັບລວມຫຼັງຈາກຫັກລາຍຈ່າຍທັງໝົດອອກຈາກນີ້ໂຮງໝໍຍັງຈະໄດ້ຄ່າບໍລິຫານໂຮງໝໍ 1,25 ແສນກີບຕໍ່ຄັ້ງຕໍ່ຄົນເຈັບ 1 ຄົນ ແລະ ຄ່າໄຟຟ້າໃຫ້ສະເພາະຫ້ອງ CT ເດືອນລະ 1 ລ້ານກີບຕໍ່ເດືອນ, ສ່ວນຝ່າຍໂຮງໝໍແມ່ນຈ່າຍເງິນໃຫ້ບໍລິສັດໄຊມັງກອນຕາມສັດສ່ວນທີ່ໄດ້ສະຫຼຸບໃນແຕ່ລະເດືອນໂດຍອີງໃສ່ການຮັບເງິນຈາກກອງທຶນປະກັນສຸຂະພາບ(ກປຊ)ທີ່ບໍ່ສາມາດກຳນົດເວລາອັນແນ່ນອນໄດ້ຊຶ່ງການໃຫ້ບໍລິການກວດດ້ວຍເຄື່ອງ CT scanner ແມ່ນຈະເລີ່ມຈັດຕັ້ງປະຕິບັດນັບແຕ່ເດືອນມິຖຸນາເປັນຕົ້ນໄປຊຶ່ງສັນຍາສະບັບດັ່ງກ່າວມີອາຍຸ 10ປີ (1ມິຖຸນາ2020-1 ມິຖຸນາ2030).

แชร์