ຄະນະພັກຮາກຖານພະແນກສຶກສາທິການ ແລະກີລາແຂວງເຊກອງສໍາເລັດກອງປະຊຸມໃຫຍ່

   ກອງປະຊຸມໃຫຍ່ຄັ້ງທີ  VII ຄະນະພັກຮາກຖານພະແນກສຶກສາທິການ ແລະກີລາແຂວງເຊກອງ, ໄດ້ໄຂຂຶ້ນ ແລະສໍາເລັດລົງໃນວັນທີ 25 ມີນາ 2020 ທີ່ສະໂມ ສອນພະແນກດັ່ງກ່າວໂດຍການເປັນປະທານຂອງສະຫາຍ ຄໍາໄພ ສິມມາວັດ ເລຂາຄະນະພັກຮາກຖານ, ວ່າການຫົວໜ້າພະແນກສຶກສາທິການ ແລະກີລາແຂວງ ແລະເຂົ້າຮ່ວມມີສະຫາຍ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນແຂວງ, ພ້ອມນີ້ກໍມີກໍາມະການພັກແຂວງ, ເລຂາ-ຮອງເລຂາຄະນະພັກຮາກ ຖານ, ເລຂາ-ຮອງເລຂາໜ່ວຍພັກ, ແຂກຖືກເຊີນ ແລະສະມາຊິກພັກສົມບູນ-ສໍາຮອງເຂົ້າຮ່ວມ.

 ໃນກອງປະຊຸມບັນດາຜູ້ແທນທີ່ເຂົ້າຮ່ວມໄດ້ຮັບຟັງການຜ່ານບົດລາຍງານການເມືອງ ຊຶ່ງໄດ້ສະຫຼຸບ ຕິລາຄາຄືນການນຳພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ຂອງຕົນໃນ 5 ປີ (2015-2019) ຜ່ານມາ, ໂດຍສະເພາະແມ່ນດ້ານການເມືອງແນວຄິດ, ການຈັດຕັ້ງ, ແບບແຜນວິທີເຮັດວຽກ, ນໍາພາປັບປຸງກໍ່ສ້າງພັກ-ພະ ນັກງານ,ວຽກງານອົງການຈັດຕັ້ງມະຫາຊົນ,ວຽກງານກວດກາພັກ,ວຽກງານປ້ອງກັນພັກ, ວຽກງານວິຊາສະເພາະ ແລະ ວຽກງານການຕ່າງປະເທດເຫັນວ່າມີບາດ ກ້າວຂະຫຍາຍຕົວດີຂຶ້ນ, ພ້ອມນີ້ກອງປະຊຸມຍັງໄດ້ຮັບຟັງການຜ່ານທິດທາງແຜນການຂອງຄະນະພັກຮາກຖານແຕ່ນີ້ຮອດປີ 2024, ທັງນີ້ກໍເພື່ອແນໃສ່ປະກອບສ່ວນເຂົ້າໃນການຈັດຕັ້ງຜັນຂະຫຍາຍແນວທາງການປ່ຽນແປງໃໝ່ຂອງພັກເວົ້າລວມເວົ້າສະເພາະກໍຄືການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ  VII ຂອງຄະນະພັກຮາກຖານພະແນກສຶກສາທິການ ແລະກີລາແຂວງໃຫ້ປະກົດຜົນເປັນຈິງ.

ກອງປະຊຸມຍັງໄດ້ໃຊ້ສິດປ່ອນບັດຄັດເລືອກເອົາຄະນະພັກຊຸດໃໝ່, ຊຶ່ງມີຜູ້ສະໝັກ 9 ສະຫາຍ, ຍິງ 1 ສະຫາຍ ໂດຍກອງປະຊຸມເຫັນດີເລືອກເອົາສະຫາຍ ຄຳໄພ ສິມມາວັດ ເປັນເລຂາຄະນະພັກຮາກຖານ, ສະຫາຍ ນາງ ວັນເພັງ ທອງສີ ເປັນຮອງເລຂາ, ແລະ ສະຫາຍ ບຸນເຫຼືອ ແກ້ວມະນີໄລ ເປັນປະທານກວດກາພັກ, ສ່ວນສະ ຫາຍ ໄຊຍະເພັດ ຊາພິຈິດ, ສະຫາຍ ມະໄລເພັດ ມາດມະນີວົງ, ສະຫາຍ ບຸນເທືອງ ທ່ອນທອງ, ສະຫາຍ ສຸລິຄຳ ພອນທະລາ ເປັນຄະນະ, ຄະນະດຽວກັນນັ້ນກໍຍັງໄດ້ປ່ອນບັດເລືອກເອົາຜູ້ແທນສົມບູນ ແລະສໍາຮອງເພື່ອເຂົ້າຮ່ວມກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງເຊກອງທີ່ຈະໄຂຂຶ້ນໃນຕໍ່ໜ້າຈໍານວນ 4 ສະຫາຍ ,ຍິງ 1 ສະຫາຍ ແລະສໍາຮອງ 1 ສະຫາຍ.

 ໃນໂອກາດນີ້ສະຫາຍ ພອນເພັດ ຄິວລະວົງ ກໍໄດ້ມີຄຳເຫັນໂອ້ລົມ ແລະໃຫ້ທິດຊີ້ນຳຕໍ່ກອງປະຊຸມໂດຍໄດ້ເນັ້ນໃຫ້ຄະນະພັກຊຸດໃໝ່ສືບຕໍ່ສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ-ພະນັກງານຢ່າງເປັນປົກກະຕິຕໍ່ເນື່ອງ,ປະຕິບັດຫຼັກການລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບ, ປັບປຸງແບບແຜນການນໍາ ພາໃຫ້ສອດຄ່ອງກັບໜ້າທີ່ການເມືອງຂອງພັກໃນໄລຍະໃໝ່,ຊີ້ນໍາ-ນຳພາປະຕິບັດໜ້າທີ່ວຽກງານວິຊາສະເພາະຕິດພັນກັບການວຽກງານກໍ່ສ້າງພັກ ແລະກໍ່ສ້າງພະນັກ ງານໃຫ້ໄດ້ທັງປະລິມານ ແລະຄຸນນະພາບ ແລະສືບຕໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ.

 

แชร์