ໜ່ວຍພັກທະນາຄານສົ່ງເສີມກະສິກຳແຂວງຄຳມ່ວນ ໄດ້ຮັບການຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ

  ພິທີມອບໃບຢັ້ງຢືນເອົາໜ່ວຍພັກທະນາຄານສົ່ງເສີມກະສິກຳສາຂາແຂວງຄຳມ່ວນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2019 ໄດ້ຈັດຂຶ້ນໃນວັນທີ 25 ມີນາ 2020 ໂດຍເປັນກຽດເຂົ້າຮ່ວມຂອງ ສະຫາຍ ແກ້ວ ວົງພະຈັນ ຮອງຫົວໜ້າຄະນະຈັດຕັ້ງແຂວງ, ສະຫາຍ ບຸນອ້ອມອິນທະວົງສາເລຂາໜ່ວຍພັກຫົວໜ້າທະນາຄານສົ່ງເສີມສາຂາຄຳມ່ວນ, ມີຄະນະເລຂາໜ່ວຍພັກທະນາຄານອ້ອມຂ້າງຕະຫຼອດເຖິງສະມາຊິກພັກສົມບູນເຂົ້າຮ່ວມ.

  ສະຫາຍ ບຸນອ້ອມ ອິນທະວົງສາ ໄດ້ຕີລາຄາການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຂອງໜ່ວຍພັກປະຈຳປີ 2019 ໜ່ວຍພັກທະນາຄານສົ່ງເສີມກະສິກຳສາຂາຄຳມ່ວນມີຄະນະໜ່ວຍພັກ 3 ສະຫາຍ, ມີສະມາຊິກພັກ ໝົດ 39 ສະຫາຍ, ປະກອບມີ 4 ຂະແໜງຄື: ຂະແໜງຈັດຕັ້ງ-ຫ້ອງການ, ກວດກພາຍໃນ ແລະຄຸ້ມ ຄອງຄວາມສ່ຽງ, ສິນເຊື່ອ ແລະຂະແໜງບັນຊີ-ໄອທີ, ມີ 5 ໜ່ວຍບໍລິການຄື: ໜອງບົກ,ມະຫາໄຊ,ນາກາຍ,ເຊບັ້ງໄຟ ແລະຫີນບູນ. ສຳລັບການນຳພາທາງດ້ານການເມືອງຂອງໜ່ວຍພັກແມ່ນໄດ້ເອົາໃຈໃສ່ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກຳນົດກົດລະບຽບຕ່າງໆໃຫ້ສະມາຊິກພັກຢ່າງເປັນປົກ ກະຕິ, ສຶກສາອົບຮົບການເມືອງ-ແນວຄິດເຮັດໃຫ້ພະນັກງານສະມາຊິກພັກເພີ່ມທະວີການປະຕິບັດໜ້າທີ່ການເມືອງ, ຢຶດໝັ້ນຕໍ່ອຸດົມການສັງຄົມນິຍົມຂອງພັກ, ສະ ມາຊິກພັກມີ ຄວາມໜັກແໜ້ນ, ໂປ່ງໃສ, ຍຸຕິທຳ ແລະເປັນແບບຢ່າງທີ່ດີໃຫ້ແກ່ມະຫາຊົນ, ມີສະຕິເຄົາລົບຕໍ່ການຈັດຕັ້ງ, ປະຕິບັດລະບຽບຫຼັກການ, ກົດລະບຽບຂອງພັກ ແລະກົດໝາຍຂອງລັດຢ່າງເຂັ້ມງວດ, ຮັກສາໄດ້ ຄວາມສາມັກຄີພາຍໃນ, ພາຍນອກໄດ້ຢ່າງກວ້າງຂວາງ.

  ສະຫາຍ ນິກອນ ພົມວົງສາ ຕາງໜ້າຄະນະຈັດຕັ້ງແຂວງກໍ່ໄດ້ຜ່ານຂໍ້ຕົກລົງຂອງຄະນະປະຈຳພັກແຂວງວ່າດ້ວຍການຮັບຮອງເອົາໜ່ວຍພັກທະນາຄານສົ່ງເສີມກະສິກໍາສາຂາແຂວງຄຳມ່ວນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ.

__________

ໜັງສືພິມເສດຸະກິດ-ສັງຄົມ

แชร์