ສະຫຼຸບຖອດບົບຮຽນການຈັດຕັ້ງປະຕິບັດ ການອອກອາກາດລະບົບ FM 102 MHz

  ວັນທີ 24 ມີນາຜ່ານມານີ້ທີ່ຫ້ອງປະຊຸມສະໂມສອນເມືອງບົວລະພາ ຫ້ອງການຖະແຫຼງຂ່າວວັດທະນະທຳ ແລະທ່ອງທ່ຽວເມືອງໄດ້ເປີດກອງປະຊຸມສະຫຼຸບເພື່ອຖອດ ຖອນບົດຮຽນການກະຈາຍສຽງຜ່ານລະບົບວິທະຍຸກະຈາຍສຽງ FM 102 MHz ຂອງເມືອງບົວລະພາຂຶ້ນໂດຍພາຍໃຕ້ການເປັນປະທານຂອງ ທ່ານ ສຸກກະເສີມ ແກ້ວຈັນທະລາ ຫົວໜ້າຫ້ອງການຖະແຫຼງຂ່າວວັດທະນະທຳ ແລະ ທ່ອງທ່ຽວ, ມີທ່ານ ບຸນກວ້າງ ແກ້ວບຸນຍົງ ເຈົ້າເມືອງບົວລະພາ ແລະ ມີບັນດາຫົວໜ້າ, ຮອງຫົວໜ້າຫ້ອງພະນັກງານວິຊາການທີ່ກ່ຽວຂ້ອງເຂົ້າຮ່ວມ.

  ທ່ານ ໄຊສະຫວັນ ສິງຈຳປາໄຊ ຮອງຫົວໜ້າຫ້ອງການຖະແຫຼງ ຂ່າວ, ວັດທະນະທຳ ແລະທ່ອງທ່ຽວ ເມືອງກໍ່ໄດ້ຜ່ານບົດສະຫຼຸບການ ເຄື່ອນໄຫວການຈັດຕັ້ງປະຕິບັດວຽກງານການກະຈາຍສຽງຜ່ານ ລະບົບວິທະຍຸກະຈາຍສຽງ FM 102 ເມືອງບົວລະພາ ໃນໄລຍະ 3 ເດືອນ ເດືອນ 1-3 ປະຈຳປີ 2020. ນອກນັ້ນໃນກອງປະຊຸມດັ່ງກ່າວ ໄດ້ເພື່ອຄົ້ນຄວ້າປຶກສາຫາລືແລກປ່ຽນບົດຮຽນເຊິ່ງກັນ ແລະກັນຈາກບັນດາຂະແໜງການຕ່າງໆທີ່ຮັບຜິດຊອບລາຍການອອກອາກາດປະຈຳວັນເພື່ອເຮັດໃຫ້ວິທະຍຸ FM 102 MHZ ເມືອງບົວລະພາເປັນກະບອກສຽງອັນແຫຼມຄົມໃຫ້ແກ່ພັກ-ລັດໃນການໂຄສະນາ ປຸກລະດົມຂະແໜງການໃຫ້ທົ່ວເຖິງ ແລະກວ້າງຂວາງ, ພ້ອມນັ້ນໄດ້ຜ່ານຂໍ້ຕົກລົງຂອງທ່ານເຈົ້າ ເມືອງໆບົວລະພາ ສະບັບເລກທີ 061/ຈມ,ບພ, ລົງວັນທີ 6/3/ 2020 ວ່າດ້ວຍການແຕ່ງຕັ້ງຄະນະຊີ້ນໍາ, ບັນນາທິການ, ກອງເລຂາຮັບຜິດຊອບການອອກອາກາດວິທະຍຸ FM 102 MHZ ເມືອງບົວລະພາ.

ສະໜັບສະໜູນໂດຍ: HONDA

  ທ່ານ ບຸນກວ້າງ ແກ້ວບຸນຍັງ ໄດ້ສະແດງຄວາມຍ້ອງຍໍຊົມເຊີຍຕໍ່ທຸກພາກສ່ວນທີ່ເຫັນໄດ້ເຖິງຄວາມໝາຍສຳຄັນຂອງວິທະຍຸ FM 102 MHZ ຂອງເມືອງບົວລະພາ ທີ່ພ້ອມກັນຄົ້ນຄວ້າຊອກຫາຈຸດດີຈຸດອ່ອນເພື່ອມາຖອດຖອນໃຫ້ເປັນບົດຮຽນໃນການຈັດຕັ້ງປະຕິບັດໃນຂັ້ນຕອນຕໍ່ໄປເພື່ອໂຄສະນາໃຫ້ຖືກຕ້ອງຕາມແນວທາງປ່ຽນ ແປງໃໝ່ຂອງພັກ ແລະແຜນພັດທະນາເສດຖະກິດສັງຄົມຂອງລັດໃຫ້ທົ່ວເຖິງແກ່ກຸ່ມເປົ້າໝາຍ ແລະເຮັດໃຫ້ສັງຄົມໄດ້ມີບາດກ້າວທີ່ຂະຫຍາຍຕົວດີຂຶ້ນເລື້ອຍໆ ພ້ອມ ກັນນັ້ນກໍ່ຕ້ອງໄດ້ຮັກສາລະບົບເຄື່ອງສົ່ງ ແລະອຸປະກອນຕ່າງໆໃຫ້ສາມາດນຳໃຊ້ໄດ້ຢ່າງເປັນປົກກະຕິ.

--------------

ຂຽນໂດຍ: ບຸນປະພາດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 30/03/2020