ຝຶກອົບຮົມກຳລັງ ປກສ ບໍລິການປະຊາຊົນ

  ວັນທີ 23-24 ມີນາ ຜ່ານມາ ທີ່ສະໂມສອນຫ້ອງການກຸ່ມກະດັນເມືອງໂຂງ ແຂວງຈຳປາສັກໄດ້ມີກອງປະຊຸມຝຶກອົບຮົມກຳລັງ ປກສ ບໍລິການປະຊາຊົນ ແລະ ປກສ ບ້ານໃນທົ່ວເມືອງຂຶ້ນຢ່າງເປັນທາງການ;ພາຍໃຕ້ການເປັນປະທານຂອງທ່ານ ນາງ ຄຳພູ ລິດທິສັກ ເຈົ້າເມືອງໆໂຂງ, ທ່ານ ສົມສະໜຸກ ພະໄຊສົມບັດ ຫົວໜ້າກອງບັນ ຊາການ ປກສ ເມືອງ, ມີທ່ານຮອງຫ້ອງຄຸ້ມຄອງສຳມະໂນຄົວ ແລະກໍ່ສ້າງຮາກຖານ ປກສ ແຂວງ, ເລຂາຄະນະພັກຮາກຖານກຸ່ມກະດັນ, ບັນດາທ່ານນາຍບ້ານ ແລະກຳລັງ ປກສ ບ້ານໃນທົ່ວກຸ່ມເຂົ້າຮ່ວມ.

 ໂອກາດນີ້ ທ່ານ ສົມສະໜຸກ ພະໄຊສົມບັດ ໄດ້ກ່າວເປີດກອງປະຊຸມ ແລະໃຫ້ຮູ້ເຖິງຄວາມໝາຍຄວາມສຳຄັນຂອງການຈັດຝຶກອົບຮົມຄັ້ງນີ້ວ່າ: ກອງປະຊຸມຄັ້ງນີ້ຈະເປັນ ການສະຫຼຸບຕີລາຄາຄືນການຈັດ ຕັ້ງປະຕິບັດນຳພາ, ການເຄື່ອນ ໄຫວຂອງ ປກສ ບໍລິການປະຊາ ຊົນພາຍໃນກຸ່ມກະດັນຕະຫຼອດ 1 ປີຜ່ານພ້ອມວາງທິດທາງແຜນການ ຕໍ່ໜ້າ, ກອງປະຊຸມຈະໄດ້ມີການ ແລກປ່ຽນບົດຮຽນປະກອບຄຳຄິດຄຳເຫັນຈາກບັນຜູ້ເຂົ້າຮັບການຍົກລະດັບ; ພ້ອມດຽວກັນນັ້ນກອງປະຊຸມຍັງຈະໄດ້ເຊື່ອມຊືມບັນດາເອກະສານເປັນຕົ້ນ: ຂໍ້ຕົກລົງເລກທີ 513 ແລະ514/ປກສ ວ່າດ້ວຍ ການຈັດຕັ້ງ ແລະການເຄື່ອນໄຫວຂອງ ປກສ ບໍລິການປະຊາຊົນ ແລະ ປກສ ບ້ານ, ວິທີການບັນທຶກເຂົ້າປື້ມ 5 ຊະນິດ, ດຳລັດ 136/ນຍ, ກົດໝາຍ 59 ວ່າດ້ວຍການຄຸ້ມ ຄອງຄົນຕ່າງປະເທດ, ກົດໝາຍ 198 ວ່າດ້ວຍການແຕ່ງງານກັບຄົນຕ່າງປະເທດ, ເອກະສານປ້ອງກັນສະຖານທີ່ເກີດເຫດ, ວຽກງານຄຸ້ມຄອງເປົ້າໝາຍ, ບາງມາດຕະການຂອງກົດໝາຍວ່າດ້ວຍຢາເສບຕິດ.

 

แชร์