ຈັບເປົ້າໝາຍ 5 ຄົນພ້ອມຢາບ້າ ພັນກວ່າເມັດ

  ພາຍຫຼັງເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງໄຊຍະບູລີ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ໄດ້ມີພາກສ່ວນເຄື່ອນໄຫວມົ້ວສຸມຄ້າ-ຂາຍ ແລະເສບຢາເສບຕິດຢູ່ບ້ານທ່ານາ, ເມືອງໄຊຍະບູລີ ແຂວງໄຊຍະບູລີ ບໍລິເວນຄິວລົດສາຍເໜືອໂດຍຜ່ານການລົງກວດກາແຫຼ່ງຂ່າວເຫັນວ່າມີມູນຄວາມຈິງຕົກມາຮອດເວລາ 21 ໂມງ ຂອງວັນທີ 10 ມີນາ 2020 ຈຶ່ງໄດ້ນໍາໃຊ້ກໍາລັງວິຊາສະເພາະເຂົ້າຈັບກຸມຜູ້ຕ້ອງສົງໄສຄື: ທ້າວ ເຍຍເຢີ ເຮີ ອາຍຸ 43 ປີ ແລະ ນາງເບົ້າຢ່າງ ອາຍຸ 40 ປີ ທັງ ສອງຄົນປະກອບອາຊີບຄ້າ-ຂາຍ, ຢູ່ບ້ານທ່າກົກໄຮ ເມືອງປາກງື່ມ ນະຄອນຫຼວງວຽງຈັນ ພົບເຫັນວັດຖຸຂອງກາງຢາບ້າຈຳນວນ 30 ພັນເມັດ, ໂທລະສັບ 2 ເຄື່ອງ.

  ຕໍ່ມາວັນທີ 16 ມີນາ 2020 ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງໄດ້ສືບຕໍ່ລົງເຄື່ອນໄຫວແກ້ໄຂເປົ້າໝາຍຄ້າ-ຂາຍຢາເສບຕິດຢູ່ບໍລິເວນເຂື່ອນໄຟຟ້ານໍ້າຮຸ່ງ 1 ແລະໄດ້ເຂົ້າກັກຕົວ ນາງ ຂັນທະລີ ເພັດດີອາຊີບປະຊາຊົນບ້ານແກ້ງ, ເມືອງໄຊຍະບູລີ ແຂວງໄຊຍະບູລີ ທີ່ຕົກເປັນເປົ້າໝາຍຕ້ອງສົງ ໄສ ພ້ອມຂອງກາງຢາເສບຕິດ 51 ເມັດ, ໂທລະສັບ 1 ເຄື່ອງ, ໂມງໃສ່ແຂນ 1 ໜ່ວຍ,ຕ້າງຫູຄ້າຍຄືເງິນ 2 ວົງ, ແຫວນເຫຼດ 2 ວົງ ແລະລົດຈັກ 1 ຄັນ ບໍ່ມີໝາຍເລກທະບຽນເຈົ້າໜ້າທີ່ຈຶ່ງໄດ້ຮີບໂຮມວັດຖຸຂອງກາງທີ່ກ່ຽວຂ້ອງກັບການກະທໍາຜິດພ້ອມດ້ວຍຜູ້ກ່ຽວຂ້ອງມາດໍາເນີນການສືບສວນ-ສອບສວນຕາມຂັ້ນຕອນຂອງກົດໝາຍ.

  ຂ່າວຍັງໃຫ້ຮູ້ຕື່ມວ່າໃນເວລາ 15 ໂມງ ຂອງວັນທີ 19 ມີນາ 2020 ເຈົ້າ ໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງໄຊຍະບູລີ ໄດ້ຮັບແຫຼ່ງຂ່າວວ່າມີພາກ ສ່ວນມົ້ວສຸມຢາເສບຕິດກໍາລັງນໍາເອົາຢາບ້າເຄື່ອນໄຫວຊື້-ຂາຍຢູ່ບໍລິເວນຂ້າງຂອງເດີ່ນບິນເຂດບ້ານນາເລົາ ເມືອງໄຊຍະບູລີ ແຂວງໄຊຍະບູລີ ຈຶ່ງໄດ້ນໍາກໍາລັງອອກຕິດຕາມ, ກວດກາ ແລະໄດ້ເຂົ້າກັກຕົວທ້າວ ເລີດ ອາຍຸ 50 ປີ ແລະນາງ ສີ ອາຍຸ 38 ປີ ທັງສອງຄົນເປັນປະຊາຊົນບ້ານນາໄຮ ເມືອງໄຊຍະບູລີ ແຂວງ ໄຊຍະບູລີ ພ້ອມຂອງກາງຢາບ້າ 40 ເມັດ, ໂທລະສັບ 3 ເຄື່ອງ, ເງິນກີບ 5,62 ແສນກີບ, ລົດຈັກ 1 ຄັນ ບໍ່ມີໝາຍເລກທະບຽນ, ໃນເວລາດຽວກັນສາມາດກັກຕົວພາກສ່ວນເສບໄດ້ 1 ຄົນ ຄື: ທ້າວ ບຸນທັນ ມອງ ອາຍຸ 38 ປີ ອາ ຊີບປະຊາຊົນບ້ານແກ້ງ ເມືອງໄຊຍະບູລີ ພ້ອມລົດຈັກ 1 ຄັນ, ໂທລະສັບ 1 ເຄື່ອງ ແລະເງິນກີບ 4 ແສນກີບ ມາດໍາເນີນການສືບສວນ-ສອບສວນ ເພື່ອຂະຫຍາຍຜົນຫາກຸ່ມແກ້ງພັກພວກທີ່ມົ້ວສຸມຢາເສບຕິດມາລົງໂທດຕາມກົດໝາຍ.

____________

ຂຽນໂດຍ: ສາຄອນ ໄຊສົມຮັກສາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์