ໂພນທອງ ປະກາດຈົບຊັ້ນມັດທະຍົມຕົ້ນບໍາລຸງ

  ເມືອງໂພນທອງ ແຂວງຫຼວງພະບາງ ຖືເປັນເມືອງສຸດທ້າຍ (ທີ 12) ຂອງແຂວງທີ່ໄດ້ປະກາດຈົບຊັ້ນມັດທະຍົມຕົ້ນບໍາລຸງທົ່ວເມືອງຊຶ່ງໄດ້ສໍາເລັດການຈັດຕັ້ງປະຕິບັດການຮຽນ-ການສອນຊັ້ນມັດທະຍົມຕອນຕົ້ນບໍາລຸງໃຫ້ປະຊາຊົນ ແລະໄດ້ຈັດພິທີປະກາດຢ່າງເປັນທາງການໃນວັນທີ 20 ຜ່ານມາ ທີ່ສະໂມສອນເມືອງດັ່ງກ່າວໂດຍການໃຫ້ກຽດເຂົ້າຮ່ວມຂອງ ທ່ານ ບົວລານ ສີລິປັນຍາ ຮອງລັດຖະມົນຕີກະຊວງສຶກສາທິການ ແລະກີລາ, ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ມີທ່ານເຈົ້າເມືອງ-ຮອງເຈົ້າເມືອງ, ຄະນະນຳຈາກກະຊວງ, ແຂວງ, ເມືອງ, ພະນັກງານ, ທະຫານຕຳຫຼວດ, ນາຍບ້ານ, ຄູ-ອາຈານ, ນັກນຽນ-ນັກສຶກສາພ້ອມດ້ວຍພໍ່ແມ່ປະຊາຊົນຊາວເມືອງໂພນທອງເຂົ້າຮ່ວມ.

 ທ່ານ ສົມແພດ ພົມມະຈັນ ຮັກສາການຫົວໜ້າຫ້ອງການສຶກສາ ທິການ ແລະກີລາເມືອງໂພນທອງ ໄດ້ລາຍງານຜົນການຈັດຕັ້ງປະຕິບັດການຮຽນ-ການສອນໃຫ້ຮູ້ວ່າ: ທົ່ວເມືອງປະກອບມີ 5 ກຸ່ມພັດທະນາ, ມີ 40 ບ້ານ, ມີຄອບຄົວທັງ ໝົດ 3.178 ຄອບຄົວ, ມີພົນລະເມືອງທັງໝົດ 20.445 ຄົນ, ຍິງ 10.147 ຄົນ, ເມືອງໂພນທອງມີ ເນື້ອທີທັງໝົດ 241.880 ແຮັກຕາ,ເນື້ອທີ່ສ່ວນໃຫຍ່ເປັນເຂດພູດອຍ ສູງຊັນກວມເອົາ 64%,ປະຊາຊົນ     ສ່ວນໃຫຍ່ມີອາຊີບຖືເອົາການເຮັດ ໄຮ່ໝູນວຽນ, ປູກຝັງລ້ຽງສັດເປັນຕົ້ນຕໍ ແລະຄ້າ-ຂາຍຈຳນວນໜຶ່ງ, ມາເຖິງປະຈຸບັນອັດຕາເຂົ້າຮຽນ ລວມຊັ້ນປະຖົມກວມເອົາ 102,4%, ມັດທະຍົມຕົ້ນ ກວມ 67,88%, ມັດທະຍົມປາຍ ກວມ 35,44%, ລົບລ້າງຄວາມບໍ່ຮູ້ໜັງສືຂອງປະຊາຊົນໃນກຸ່ມເປົ້າໝາຍບັນລຸໄດ້ 98,57% ທຽບໃສ່ຄາດໝາຍປີ 2015 ແມ່ນບັນລຸຕາມຄາດໝາຍ,ອັນໄດ້ເຮັດໃຫ້ຫຼາຍຄອບຄົວ, ຫຼາຍ ບ້ານ, ກຸ່ມບ້ານສາມາດຫຼຸດພົ້ນອອກຈາກຄວາມທຸກຍາກ, ສາມາດສ້າງ ຄອບຄົວຕົວແບບ ແລະສ້າງບ້ານ ເປັນບ້ານພັດທະນາ, ຊຶ່ງເປັນການ ປະກອບສ່ວນອັນສຳຄັນໃນການ ພັດທະນາເສດຖະກິດ-ສັງຄົມຂອງ ເມືອງນັບດີຂຶ້ນເທື່ອລະກ້າວ, ພ້ອມນີ້ໄດ້ຜ່ານຂໍ້ຕົກລົງຂອງກະຊວງສຶກສາທິການ ແລະກີລາວ່າດ້ວຍ ການປະກາດເມືອງໂພນທອງ ແຂວງ ຫຼວງພະບາງ ເປັນເມືອງຈົບຊັ້ນມັດທະຍົມຕອນຕົ້ນບໍາລຸງ, ຂໍ້ຕົກລົງ ຂອງທ່ານເຈົ້າແຂວງຫຼວງພະບາງ ວ່າດ້ວຍການອານຸມັດໃຫ້ເມືອງ ໂພນທອງ ແຂວງຫຼວງພະບາງ ຈັດຕັ້ງພິທີປະກາດຈົບການສຶກສາ ຊັ້ນມັດທະຍົມຕົ້ນບຳລຸງ.

 ຈາກນັ້ນທ່ານ ບົວລານ ສີລິ ປັນຍາ ໄດ້ໃຫ້ກຽດຂຶ້ນມອບໃບຢັ້ງຢືນຈົບຊັ້ນມັດທະຍົມຕອນຕົ້ນບຳລຸງໃຫ້ເມືອງໂພນທອງ ແລະກ່າວ ຮັບໂດຍທ່ານ ບຸນຈັນ ປານຟອງ ເຈົ້າເມືອງໂພນທອງ ແລະໂອກາດ ດຽວກັນນີ້ທ່ານຮອງລັດຖະມົນຕີ ກະຊວງສຶກສາທິການ ແລະກີລາກໍໄດ້ມີຄຳເຫັນໂອ້ລົມຕໍ່ພິທີກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະພັກ, ອົງການປົກຄອງທຸກຂັ້ນ, ຜູ້ບໍລິຫານ ການສຶກສາ, ຄູ-ອາຈານນັກຮຽນ-ນັກສຶກສາຕະຫຼອດຮອດພໍ່ແມ່ປະ ຊາຊົນບັນດາເຜົ່າທີ່ໄດ້ພ້ອມກັນປະ ກອບສ່ວນທາງດ້ານສະຕິປັນຍາ, ເຫື່ອແຮງ ແລະສາມາດປະກາດຈົບຊັ້ນມັດທະຍົມຕົ້ນບໍາລຸງໄດ້ຢ່າງສົມກຽດ ແລະຮຽກຮ້ອງມາຍັງຄະນະພັກ, ອົງການປົກຄອງເມືອງ ທຸກຂັ້ນ, ທຸກຂະແໜງການ, ຜູ້ບໍລິຫານການສຶກສາທຸກຂັ້ນຈົ່ງໄດ້ພ້ອມກັນສືບຕໍ່ຊີ້ນຳ-ນຳພາໃຫ້ການຮ່ວມມືສະໜັບສະໜູນສ້າງເງື່ອນໄຂ ແລະອຳນວຍຄວາມສະດວກ ໃຫ້ແກ່ວຽກງານການສຶກສາ,ພ້ອມກັນສຶກສາອົບຮົມຊຸກຍູ້ລູກຫຼານຂອງຕົນເອງໃຫ້ໄດ້ເຂົ້າຮຽນ, ຮຽນໃຫ້ສູງຂຶ້ນ, ມີອາຊີບໝັ້ນຄົງພ້ອມກັນພັດທະນາທຸກວຽກງານຂອງເມືອງໃຫ້ມີທ່າກ້າວຂະຫຍາຍຕົວຢ່າງບໍ່ຢຸດຢັ້ງ.

  ສຳລັບການປະກາດຈົບຊັ້ນມັດທະຍົມຕົ້ນບໍາລຸງທົ່ວເມືອງຄັ້ງນີ້ ແມ່ນເປັນເມືອງທີ 12  ຂອງແຂວງ ຫຼວງພະບາງ ແລະເປັນເມືອງທີ 145 ໃນຂອບເຂດທົ່ວປະເທດ, ຕອນທ້າຍພິທີທ່ານຄະນະປະທານພ້ອມດ້ວຍແຂກຖືກເຊີນໄດ້ຮ່ວມກັນລັນຄ້ອງເກົ້າບາດເພື່ອເປັນສິລິມຸງຄຸນ ແລະເປີດປ້າຍປະກາດຈົບຊັ້ນມັດທະຍົມຕົ້ນບຳລຸງທົ່ງເມືອງ ໂພນທອງຢ່າງເປັນທາງການ

 

แชร์