ມອບເຄື່ອງຄອມພິວເຕີ ແລະລົດຈັກຕ້າໂມໂທ້ ໃຫ້ເມືອງຍອດອູ

  ໃນຕອນເຊົ້າຂອງວັນທີ 16 ມີນາ 2020 ນີ້, ທີ່ຫ້ອງວ່າການ ເມືອງຍອດອູ ທາງບໍລີສັດຈີງຈ່ຽງ ຢາງພາລາ ຈຳກັດຜູ້ດຽວ ໄດ້ນຳເອົາ ເຄື່ອງຄອມພິວເຕີຈຳນວນ 7 ຊຸດ ແລະລົດຈັກຕ້າໂມໂທ້ຈຳນວນ 2 ຄັນ ລວມມູນຄ່າ 51 ພັນຢວນ ມອບໃຫ້ກັບເມືອງຍອດອູ ໂດຍການກ່າວມອບຂອງ ທ່ານ ຊຸຍຊີງຊູນ ຜູ້ອຳນວຍການບໍລິສັດຈີງຈ່ຽງ ຢາງພາລາ ຈຳກັດຜູ້ດຽວ ແລະກ່າວຮັບໂດຍແມ່ນ ທ່ານ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງໆຜົ້ງສາລີ, ທ່ານ ສົມຫັງ ສຸມວິໄລ ກຳມະກຳພັກແຂວງ, ເລຂາພັກເມືອງ, ເຈົ້າເມືອງໆຍອດອູເຂົ້າຮ່ວມ.

  ສໍາລັບຄອມພິວເຕີຈໍານວນ 7 ເຄື່ອງນີ້ມອບໃຫ້ສະຫະພັນແມ່ຍິງເມືອງ 1 ເຄື່ອງ ແລະອີກ 6 ເຄື່ອງແມ່ນມອບໃຫ້ຫ້ອງວ່າການເມືອງ, ສ່ວນລົດຈັກ 2 ຄັນແມ່ນມອບໃຫ້ 2 ກຳລັງ ປກສ , ປກຊ ພາກສ່ວນລະ 1 ຄັນ.

--------------

ສະໜັບສະໜູນໂດຍ: HONDA

  ໂອກາດນີ້ ທ່ານ ສົມຫວັງ ສຸມວິໄລ ເຈົ້າເມືອງໆຍອດອູ ກໍໄດ້ກ່າວສະແດງຄວາມຂອບອົກຂອບໃຈມາຍັງ ທ່ານ ຊຸຍຊີງຊູນ ຜູ້ອຳນວຍການບໍລິສັດຈີງຈ່ຽງ ຢາງພາລາ ຈຳກັດຜູ້ດຽວທີ່ໄດ້ນຳເອົາຄອມພິວເຕີ ແລະລົດຈັກມາມອບໃຫ້ເມືອງຍອດອູໃນຄັ້ງນີ້ ແລະ ຂໍໃຫ້ສືບຕໍ່ຊຸກຍູ້ສົ່ງເສີມເມືອງຍອດອູໂດຍການມາສໍາຫຼວດຄວາມເປັນໄປໄດ້ ແລະລົງທຶນໃນການປູກການລ້ຽງທີ່ເຫັນວ່າເໝາະສົມທາງເປັນການແກ້ໄຂຄວາມທຸກຍາກຂອງປະຊາຊົນພາຍໃນເມືອງຍອດອູໃຫ້ມີຊີວີດການເປັນຢູ່ດີຂຶ້ນເທື່ອລະກ້າວ.

_____________

ໜັງສືພິມເສດຖະກິດ-ສັງຄົມ

แชร์