ສ້າງລາຍຮັບດ້ວຍການຕໍ່າຫູກພາຄອບຄົວພົ້ນທຸກ

  ການຕໍ່າຫູກທໍໄໝແມ່ນກິດຈະກຳໜຶ່ງຂອງແມ່ຍິງລາວທີ່ເຄີຍມີມາຕັ້ງແຕ່ດຶກດຳບັນຊຶ່ງໄດ້ຮັບການຖ່າຍຖອດພູມປັນຍາຈາກບັນພະບູລຸດຈາກຮຸ່ນສູ່ຮຸ່ນຕໍ່ກັນມາຈົນເຖິງປະຈຸບັນນີ້ ແລະເປັນຫຼັກສູດທີ່ບໍ່ມີສອນຢູ່ໃນໂຮງຮຽນໃດໆມາກ່ອນ, ເອື້ອຍນ້ອງແມ່ຍິງລາວຫຼາຍທ້ອງຖິ່ນໄດ້ຢຶດຖືເອົາການຕໍ່າຫູກທໍໄໝມາເປັນອາຊີບເພື່ອສ້າງລາຍຮັບເຂົ້າຄອບຄົວເຮັດໃຫ້ຊີວິດການເປັນຢູ່ຂອງຄອບຄົວມີການພັດທະນານັບມື້ດີຂຶ້ນດັ່ງຄອບຄົວ ນາງ ຜິວພອນ ທໍາມະຈັກ ປະຊາຊົນ ບ້ານໂຄ້ງ ເມືອງຊໍາເໜືອແຂວງຫົວພັນທີ່ໄດ້ຢຶດເອົາການຕໍ່າຫູກທໍໄໝເປັນອາຊີບສາມາດສ້າງລາຍຮັບເຂົ້າສູ່ຄອບຄົວໄດ້ 1 ຕື້ກວ່າກີບຕໍ່ປີ.

 ນາງ ຜິວພອນ ທຳມະຈັກ ໃຫ້ຮູ້ວ່າ: ພາຍໃນຄອບຄົວມີສະມາຊິກທັງໝົດ 7 ຄົນ, ຍິງ 4 ຄົນ, ໃນນີ້ແຮງງານຕົ້ນຕໍ 2 ຄົນ ແຕ່ກ່ອນຕົນເອງເປັນພະນັກງານຄູສອນສ່ວນຄອບຄົວມີອາຊີບເປັນ ຊາວນາເຫັນວ່າສະພາບຄອບຄົວ ແລະຊີວິດການເປັນຢູ່ໃນໄລຍະນັ້ນ ພຽງແຕ່ກຸ້ມຢູ່ກຸ້ມກິນ ສະນັ້ນຕົນ ເອງຈຶ່ງໄດ້ປຶກສານໍາຄອບຄົວຕັດສິນໃຈອອກຈາກຄູສອນຫັນມາ ເຮັດທຸລະກິດຄອບຄົວດ້ວຍການ ແລ່ນລົດເມ, ຄ້າຂາຍຍ່ອຍ ແລະ ເກັບຊື້ເຄື່ອງປ່າຂອງດົງໃນເບື້ອງ ຕົ້ນເຫັນວ່າທຸລະກິດແມ່ນດຳເນີນໄປດ້ວຍດີສົມຄວນແຕ່ພໍຫຼັງໆມາ ການແລ່ນລົດເມ ແລະເກັບຊື້ເຄື່ອງ ປ່າຂອງດົງໄດ້ຄ່ອຍໆຫຼຸດຈໍານວນ ລົງຍ້ອນເຄື່ອງປ່າຂອງດົງນັບມື້ຫຼຸດໜ້ອຍຖອຍລົງ ແລະຜູ້ໂດຍສານກໍບໍ່ຄ່ອຍມີຈຶ່ງໄດ້ຢຸດເຊົ່າ ຈົນມາຮອດປີ 2009 ຕົນເອງ ໄດ້ຫັນປ່ຽນອາຊີບມາຕ່ໍ່າຫູກສິ້ນຈໍານວນ 5 ກີ່, ຊຶ່ງໃຊ້ທຶນຂອງ ຄອບຄົວ 5 ລ້ານກີບ ເຫັນວ່າໄດ້ຂາຍດີ, ມີລູກຄ້າມາສັ່ງຊື້ເປັນຈໍານວນຫຼາຍຈຶ່ງໄດ້ຂະຫຍາຍກີ່ເພີ່ມຕາມການສັ່ງຂອງລູກຄ້າ.

  ໂດຍປະຕິບັດຕາມມະຕິຂອງກອງປະຊຸມໃຫຍ່ຄັ້ງທີ 11 ຂອງອົງຄະນະພັກເມືອງຊໍາເໜືອ ໃນ ປີ 2014 ຍ້ອນເຫັນໄດ້ແນວທາງນະໂຍບາຍຂອງພັກ-ລັດ ທີ່ຖືກຕ້ອງ ແລະ ສອດຄ່ອງກັບສະພາບຕົວຈິງເພື່ອພັດທະນາຊີວິດການເປັນຢູ່ຂອງພໍ່ແມ່ປະຊາຊົນໃຫ້ຫຼຸດພົ້ນຈາກຄວາມທຸກຍາກດັ່ງນັ້ນຕົນເອງໄດ້ປຶກສາກັບຄອບຄົວຕົກລົງເອົາການຕໍ່າຫູກເປັນສິນຄ້າເພື່ອສ້າງລາຍຮັບເພີ່ມໃຫ້ແກ່ຄອບຄົວໂດຍໄດ້ກູ້ຢືມເງິນຈາກທະນາຄານນະໂຍບາຍຈໍານວນ 15 ລ້ານກີບ ສົມທົບກັບທຶນຂອງຄອບຄົວຂະຫຍາຍກີ່ຕ່ໍ່າຫູກອອກເປັນ 300 ກີ່ ໃນນີ້ຕໍ່າສີ້ນ 250 ກີ່, ໄດ້ 70 ຜືນຕໍ່ເດືອນ, ຂາຍອອກຜືນລະ 1,2 ລ້ານກີບ, ຕໍ່າແພຄິດຝ້າຍ 50 ກີ່, ໄດ້ 400 ແມັດຕໍ່ເດືອນ, ຂາຍອອກແມັດລະ 45 ພັນກີບ.

  ຕົກມາຮອດປີ 2015 ເຫັນວ່າທຸລະກິດດຳເນີນໄປດີຈຶ່ງໄດ້ກູ້ຢືມເງິນຈາກທະນາຄານນະໂຍບາຍອີກຈໍານວນ 25 ລ້ານກີບ, ຂະຫຍາຍກີ່ຈາກ 300 ມາເປັນ 400 ກີ່ ໃນນີ້ຕໍ່າສິ້ນ 320 ກີ່, ໄດ້ 100 ຜືນຕໍ່ເດືອນ,ຕໍ່າແພຄິດຝ້າຍ 80 ກີ່, ໄດ້ 600 ແມັດຕໍ່ເດືອນ,ພ້ອມທັງໄດ້ສົ່ງທຶນເງິນກູ້ໃນ 2 ປີຄືນໃຫ້ທະນາຄານຢ່າງຄົບຖ້ວນໃນທ້າຍປີ 2015, ເພື່ອຂະຫຍາຍທຸລະກິດແລະຕອບສະໜອງກັບຄວາມຕ້ອງການຂອງລູກຄ້າໃນທ້ອງຕະຫຼາດນັບມື້ເພີ່ມຂຶ້ນຮອດປີ 2016 ໄດ້ກູ້ເງິນຈາກ ທະນາ ຄານນະໂຍບາຍອີກ 400 ລ້ານກີບ ແລະໄດ້ຂະຫຍາຍກີ່ຕໍ່າຫູກອອກເປັນ 540 ກີ່ໃນນີ້ຕໍ່າສິ້ນ 445 ກີ່, ໄດ້ 175 ຜືນຕໍ່ເດືອນ, ຕໍ່າແພຄິດຝ້າຍ 95 ກີ່, ໄດ້ 680 ແມັດຕໍ່ເດືອນ, ປີ 2017 ລູກຄ້າທີ່ສັ່ງຊື້ເຫັນວ່າຫຼຸດລົງຍ້ອນເສດຖະກິດມີການທົດຖອຍຈຶ່ງໄດ້ຫຼຸດຈໍານວນກິ່ຈາກ 540 ກີ່, ລົງມາຍັງເຫຼືອ 310 ກີ່ຄື: ຕໍ່າສີ້ນ 257 ກີ່, ໄດ້ 96 ຜືນຕໍ່ເດືອນ, ຕໍ່າແພຄິດຝ້າຍ 53 ກີ່, ໄດ້ 370 ແມັດຕໍ່ເດືອນ, ຕົກມາຮອດປີ 2018 ຈົນເຖິງປະຈຸບັນໄດ້ເພີ່ມ ຈາກ 310 ກີ່ມາເປັນ 438 ກີ່ໃນ ນີ້ຕໍ່າສິ້ນ 382 ກີ່, ໄດ້ 87 ຜືນຕໍ່ເດືອນ, ຂາຍອອກຜືນລະ 1,2 ລ້ານກີບ, ຕໍ່າແພຄິດຝ້າຍ 26 ກີ່, ໄດ້ 125 ແມັດ ຕໍ່ເດືອນ, ຂາຍແມັດລະ 45 ພັນກີບ ແລະຕໍ່າຜ້າບ່ຽງ 30 ກີ່, ໄດ້ 17 ຜືນຕໍ່ເດືອນ, ຂາຍຜືນລະ 7 ແສນກີບ.

  ການຜະລິດແມ່ນໄດ້ປ່ອຍໃຫ້ເອື້ອຍນ້ອງແມ່ຍິງຕໍ່າຢູ່ກັບບ້ານ ແລະບາງບ້ານທີ່ຂຶ້ນກັບເມືອງຊໍາເໜືອ ເມືອງຊໍາໃຕ້ວຽງໄຊ, ເມືອງຫົວເມືອງ ແລະຢູ່ນະຄອນຫຼວງວຽງ ຈັນສ່ວນຕະຫຼາດຈໍາໜ່າຍແມ່ນຕະຫຼາດຊໍາເໜືອ ແລະໄປຂາຍສົ່ງຢູ່ນະຄອນຫຼວງວຽງຈັນ, ສະເລ່ຍລາຍຮັບຈາກການຕ່ໍ່າຫູກໃນໜຶ່ງປີໄດ້ 1,76 ຕື້ກີບ, ຫັກຕົ້ນທຶນ ແລະຄ່າແຮງງານການຜະລິດອອກຍັງກໍາໄລຕົວຈິງ 305 ລ້ານກີບ, ສະເລ່ຍລາຍຮັບໄດ້ 43 ລ້ານກວ່າກີບຕໍ່ຄົນຕໍ່ປີອັນໄດ້ເຮັດໃຫ້ຊີວິດການເປັນຢູ່ຂອງຄອບຄົວນັບມື້ດີຂຶ້ນ, ສາມາດນຳພາຄອບຄົວຫຼຸດພົ້ນອອກຈາກຄວາມທຸກຍາກ, ເງິນຈໍານວນດັ່ງກ່າວໄດ້ນໍາມາພັດທະນາຄອບຄົວ ແລະຊື້ເຄື່ອງຮັບໃຊ້ຄົວເຮືືອນຈຳນວນໜຶ່ງຄື: ຊື້ລົດວີໂກ 1 ຄັນ, ລົດຈັກ 5 ຄັນ, ລົດໄຖນາ 1 ຄັນ, ໂຮງສີເຂົ້າ 1 ເຄື່ອງ, ມີເຮືອນຖາວອນ 3 ຫຼັງ, ດິນປຸກສ້າງມີ 7 ຕອນ, ມີເງິນສົ່ງໃຫ້ລູກຮຽນຕໍ່ວິຊາຊີບຢູ່ພາຍໃນປະ ເທດ ແລະຕ່າງປະເທດ, ມີເງິນແຮໄວ້ເປັນທຶນມູນວຽນຈໍານວນໜຶ່ງ.

ສະໜັບສະໜູນໂດຍ: HONDA

   ພ້ອມນີ້ເອື້ອຍນ້ອງແມ່ຍິງຢູ່ພາຍໃນບ້ານໂຄ້ງຍັງໃຫ້ຮູ້ວ່າ: ການຕໍ່າຫູກທໍໄໝແມ່ນວຽກໜຶ່ງທີ່ເອື້ອຍນ້ອງແມ່ຍິງເຄີຍປະຕິບັດກັນມາຖືໄດ້ວ່າເປັນອາຊີບເສີມໃນການສ້າງລາຍຮັບໃຫ້ແກ່ຄອບຄົວ, ບຸກຄົນ ແລະຊອກວຽກເຮັດງານທຳໃຫ້ແກ່ເອື້ອຍນ້ອງແມ່ຍິງມີຊີວິດດີຂຶ້ນ.

  ສຳລັບທິດທາງໃນຕໍ່ໜ້າຄອບຄົວຂອງນາງຈະສືບຕໍ່ຂະຫຍາຍກິດຈະການຕ່ໍ່າຫູກນີ້ໃຫ້ກວ້າງຂວາງ ແລະຮຽກຮ້ອງມາຍັງເອື້ອຍນ້ອງແມ່ຍິງທຸກທົ່ວໜ້າຜູ້ໃດຫາກມີຈິດ ໃຈຮັກມັກໃນການຕໍ່າຫູກທໍໄໝແຕ່ບໍ່ມີຄວາມຮູ້ມາກ່ອນກໍສາມາດເຂົ້າມາເບິ່ງ ແລະຖອດຖອນບົດຮຽນນຳໄດ້ ຫຼືທ່ານໃດຕ້ອງການຢາກຊື້ຜະລິດຕະພັນຜ້າໄໝສຳເລັດຮູບໃຫ້ພົວພັນໄດ້ໂດຍກົງກັບໂທລະສັບ 020 5544 2526, ວັອດແອັບ 020 5412 2799.

แชร์