ເລັ່ງປັບປຸງເສັ້ນທາງຈະລາຈອນຖະໜົນສາຍຫຼັກ

  ເພື່ອສ້າງຂະບວນການຕ້ອນຮັບວັນສຳຄັນຕ່າງໆຂອງພັກ-ຂອງຊາດເປັນຕົ້ນວັນສ້າງຕັ້ງພັກຄົບຮອບ 65 ປີ, ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ແລະ ກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ, ທັງເປັນການສ້າງຄວາມຮັບປະກັນໃຫ້ແກ່ການສັນຈອນທີ່ມີຄວາມປອດໄພ ນະຄອນຫຼວງວຽງຈັນ (ນວ) ກໍຄືພະແນກໂຍທາທິການ ແລະຂົນສົ່ງ ນວ ພວມເລັ່ງປັບປຸງເສັ້ນຈະລາຈອນຖະໜົນສາຍຫຼັກ ທ່ານ ສີວອນ ຊັບທະວີ ຫົວໜ້າຂະແໜງຄຸ້ມຄອງການຂົນສົ່ງພະແນກໂຍທາທິການ ແລະຂົນສົ່ງ ນວ ໃຫ້ຮູ້ເມື່ອບໍ່ດົນມານີ້ວ່າ: ພະແນກໂຍທາທິການ ແລະຂົນສົ່ງ ນວ ໄດ້ມີໂຄງການປັບປຸງແຕ້ມເສັ້ນຈະລາຈອນ ໂດຍນຳໃຊ້ງົບປະມານຂອງລັດ “ກອງທຶນຄວາມປອດໄພທາງຖະໜົນປະຈຳປີ 2020” ມູນຄ່າ 7,4 ຕື້ກີບ, ປະຕິບັດຢູ່ 8 ເສັ້ນທາງຄື: ຖະໜົນໄກສອນພົມວິຫານຍາວ 10,7 ກິໂລແມັດ, ຖະໜົນໜອງບອນ 3,47 ກິໂລແມັດ, ຖະໜົນສາມແສນໄທ 3,2 ກິໂລແມັດ,ຖະໜົນເສດຖາທິຣາດ 2 ກິໂລແມັດ,ຖະໜົນເຈົ້າຟ້າງຸ່ມ 2,6 ກິໂລແມັດ, ຖະໜົນສຸພານຸວົງ 6 ກິໂລແມັດ, ຖະໜົນລ້ານຊ້າງ 1,2 ກິໂລແມັດແລະຖະໜົນທ່າເດື່ອ 10,5 ກິໂລແມັດ, ພາຍຫຼັງສຳເລັດປັບປຸງແຕ້ມເສັ້ນຈະລາຈອນ ແລ້ວຈະສືບຕໍ່ປັບປຸງໄຟອຳນາດບາງຈຸດຄາດວ່າຈະໃຫ້ສຳເລັດເດືອນສິງຫາ 2020.

ສະໜັບສະໜູນໂດຍ: HONDA

  ການປັບປຸງເສັ້ນຈະລາຈອນຄັ້ງນີ້, ໄດ້ມີການປັບປຸງ ແລະປັບປ່ຽນເຄື່ອງໝາຍຈະລາຈອນເປັນຕົ້ນເສັ້ນແບ່ງຊ່ອງທາງຈະລາຈອນຈາກເມື່ອກ່ອນເປັນສີຂາວໄດ້ປັບປ່ຽນມາເປັນສີເຫຼືອງ ແລະຄູກາງທາງຈາກເມື່ອກ່ອນເປັນຂາວ-ແດງປ່ຽນມາເປັນຂາວ-ດຳ ໂດຍອີງໃສ່ມາດຕະຖານຂອງກະຊວງ ຍທຂ ວາງອອກ, ດັ່ງນັ້ນຈຶ່ງໃຫ້ສັງຄົມເຂົ້າ ໃຈຕື່ມເນື່ອງຈາກການຈະລາຈອນໄລຍະໃໝ່ຈະບໍ່ເອົາສີຂອບທາງມາເປັນລະບຽບການຈອດລົດ (ບໍ່ແມ່ນເຫັນຂາວ-ດຳ ຈະຈອດລົດໄດ້), ໃຫ້ປະຕິບັດຕາມປ້າຍຫ້າມຈອດ ແລະບ່ອນໃດບໍ່ມີປ້າຍກໍປະຕິບັດຕາມລະບຽບເປັນຕົ້ນຕໍ່ໜ້າສຳນັກງານ-ອົງການ, ເຮືອນຊານ, ທາງໂຄງ, ທາງແຄບ, ໃກ້ຂົວ, ກາງຂົວ, ບ່ອນແອອັດ, ໃກ້ທາງສີ່ແຍກ, ສາມແຍກ ແລະ ອື່ນໆ, ຖ້າແຕ້ມສຳເລັດຈະຊ່ວຍໃຫ້ຜູ້ຂັບຂີ່ລົດສະດວກຫຼຸດຜ່ອນອຸບັດເຫດ, ການສັນຈອນກໍຈະມີຄວາມຄ່ອງຕົວຂຶ້ນໂດຍສະເພາະຜູ້ຂັບຂີ່ຈະເຫັນຊ່ອງທາງການສັນຈອນໄດ້ງ່າຍ ໂດຍໄດ້ແຍກລະອຽດທາງລົດໃຫຍ່ ແລະລົດຈັກ.

แชร์