7 ບ້ານເມືອງອາດສະພັງທອງ ຮັບການຢັ້ງຢືນ ບ້ານວັດທະນະທຳ

  ບ້ານປົ່ງ, ບ້ານໄລກະທະ, ບ້ານດົງຂວາງ, ບ້ານນາສະຫວ່າງ, ບ້ານໂພນງອຍ, ບ້ານໜອງໃສ ແລະ ບ້ານປ່າໄລ່ທີ່ຂຶ້ນກັບເມືອງອາດສະພັງທອງ ໄດ້ຮັບການຢັ້ງຢືນເປັນບ້ານວັດທະນະທຳສົມບູນ ຊຶ່ງພິທີປະກາດຮັບຮອງທັງ 7 ບ້ານດັ່ງກ່າວ ໄດ້ຈັດຂຶ້ນໃນວັນທີ 31 ມັງກອນ ຜ່ານມາທີ່ສະໂມສອນຫ້ອງວ່າການ ປົກຄອງເມືອງ  ໂດຍການເຂົ້າຮ່ວມຂອງທ່ານ ສຸລິໂຍ ສີລາວົງ ຮອງ ເຈົ້າເມືອງອາດສະພັງທອງ, ທ່ານ ຈັນຖະໜອມ ພິລາວົງ ຮອງຫົວໜ້າພະແນກ ຖວທ ແຂວງ, ມີການຈັດຕັ້ງກ່ຽວຂ້ອງຂັ້ນແຂວງ, ເມືອງຕະຫຼອດຮອດອຳນາດການປົກຄອງ  ແລະປະຊາຊົນທັງ 7 ບ້ານດັ່ງກ່າວເຂົ້າຮ່ວມ.

  ໃນພິທີ, ຕາງໜ້າໃຫ້ທັງ 7 ບ້້ານ ກໍ່ໄດ້ຂຶ້ນຜ່ານບົດສະຫຼຸບການກໍ່ສ້າງບ້ານວັດທະນະທຳ ຊຶ່ງໃນໄລຍະຜ່ານມາ, ການນຳເມືອງ, ອຳນາດ ການປົກຄອງບ້ານໄດ້ພ້ອມພຽງກັນ ນຳພາປະຊາຊົນບັນດາເຜົ່າຈັດຕັ້ງປະຕິບັດຕາມແຜນການກໍ່ສ້າງຄອບຄົວ ແລະບ້ານວັດທະນະທຳພ້ອມທັງເສີມຂະຫຍາຍແຜນດຳລົງຊີວິດ ຂອງຄົນວັດທະນະທຳໃໝ່ເຊື່ອໝັ້ນ ຕໍ່ການນຳພາຂອງພັກພ້ອມກັນສະ ກັດກັ້ນຕ້ານປະກົດການຫຍໍ້ທໍ້ຕ່າງໆ ພາຍໃນບ້ານຂອງໃຜລາວ, ລົບລ້າງຮ່ອງຮອຍບໍ່ດີ, ບໍ່ສອດຄ່ອງຕໍ່ແນວທາງນະໂຍບາຍຂອງພັກ, ບັນດາພຶດຕິກຳທີ່ຂັດຕໍ່ລະບຽບກົດໝາຍຂອງບ້ານເມືອງ, ອອກແຮງງານແຂ່ງຂັນກັນສ້າງສາພັດທະນາເສດຖະກິດ-ສັງຄົມກໍ່ຄືເສດຖະກິດຄອບຄົວເພື່ອໃຫ້ກາຍເປັນຄອບຄົວວັດທະນະທຳໃໝ່ໃນແຕ່ລະມາດຖານທີ່ວາງໄວ້. ຊຶ່ງຜ່ານການປະເມີນ ແລະກວດກາຂອງຄະນະຮັບຜິດຊອບແຕ່ລະຂັ້ນ, ແຕ່ລະໄລຍະ ແລະ ແຕ່ລະບ້ານແມ່ນສາມາດບັນລຸບັນດາມາດຖານຂອງການກໍ່ສ້າງດ້ານຕ່າງໆຈົນໄດ້ຮັບການຮັບຮອງເປັນບ້ານວັດທະນະທຳສົມບູນໃນຄັ້ງນີ້.

7 ບ້ານປະກອບມີ 861 ຄອບຄົວ, ມີປະຊາກອນທັງໝົດ 5.914 ຄົນ, ຍິງ 3 ພັນກວ່າຄົນ, ແຕ່ລະບ້ານມີການຈັດຕັ້ງຄົບຊຸດ ແລະແໜ້ນໜາ ຜ່ານມາພາຍໃນບ້ານໄດ້ຮັບນາມມະຍົດເປັນບ້ານແບບຢ່າງສາທາລະນະສຸກ, ບ້ານປອດຄະດີ, ບ້ານສະຫະພັນແມ່ຍິງ 3 ດີ ແລະບ້ານ ປ້ອງກັນຄວາມສະຫງົບດີ, ດ້ານການຜະລິດກະສິກຳ 7 ບ້ານມີເນື້ອທີ່ນາທັງໝົດ 2,2 ພັນກວ່າເຮັກຕາ, ມີຜົນຜະລິດເຂົ້າສະເລ່ຍໃສ່ຫົວຄົນໄດ້ 636,25 ກິໂລຕໍ່ຄົນຕໍ່ປີ, ນອກນັ້ນປະຊາຊົນກໍ່ຍັງໄດ້ປູກພືດສຳຮອງຕື່ມອີກໃນເນື້ອທີ່ 125 ກວ່າເຮັກຕາ.

  ໃນພິທີໄດ້ມີການມອບ-ຮັບໃບຢັ້ງຢືນບ້ານວັດທະນະທຳສົມບູນໃຫ້ 7 ບ້ານຢ່າງສົມກຽດຈາກນັ້ນ, ຄະນະປະທານພ້ອມດ້ວຍແຂກກໍ່ໄດ້ຮ່ວມກັນຕີຄ້ອງ 9 ບາດ ແລະເປີດແຜ່ນປ້າຍບ້ານວັດທະນະທຳສົມບູນຂອງທັງ 7 ບ້ານ.

แชร์