ກາແດງເຢຍລະມັນມອບລົດໃຫ້ສູນເລືອດຜົ້ງສາລີ

 ອົງການກາແດງເຢຍລະມັນ ໄດ້ນຳເອົາລົດຕູ້ ຈຳນວນ 1 ຄັນ ມອບໃຫ້ສູນເລືອດຜົ້ງສາລີ ຊຶ່ງມີພິທີມອບ-ຮັບ ດັ່ງກ່າວຂຶ້ນໃນວັນທີ 19 ມີນາ 2020 ທີ່ນະຄອນຫຼວງວຽງຈັນ, ມອບໂດຍ ທ່ານ ທິມ ເບຣ ຜູ້ຕາງໜ້າອົງການກາແດງເຢຍລະມັນ ແລະຮັບໂດຍທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວ, ມີຫົວໜ້າອົງການກາແດງລາວແຂວງຜົ້ງສາລີເຂົ້າຮ່ວມ.

  ທ່ານ ທິມ ເບຣ ກ່າວວ່າ: ໃນໄລຍະ 10 ປີ ຜ່ານມາອົງການກາແດງເຢຍລະມັນໄດ້ສະໜອງພາຫະນະລົດຕູ້ສຳລັບອອກຮັບບໍລິຈາກເລືອດ 12 ຄັນ, ລົດຈັກ 36 ຄັນ ໃຫ້ເຫລືອສູນເລືອດແຫ່ງຊາດກໍຄືອົງການການແດງລາວໂດຍສະເພາະຢູ່ຂັ້ນແຂວງແລະຂັ້ນເມືອງ,ການຊ່ວຍເຫຼືອຂອງອົງການກາແດງເຢຍລະມັນແມ່ນສຸມໃສ່ວຽກງານເລືອດຂອງລາວເປົ້າໝາຍກໍຄືໃຫ້ມີເລືອດພຽງພໍທັງປະລິມານ ແລະຄຸນນະພາບຕາມມາດຕະຖານແຫ່ງຊາດ ແລະທິດຊີ້ນຳຂອງອົງການອະນາໄມໂລກ.

  ໂອກາດດຽວກັນ, ທ່ານ ຄຳຮຸ່ງ ເຮືອງວົງສີ ໄດ້ສະແດງຄວາມຂອບໃຈຕໍ່ອົງການກາແດງເຢຍລະມັນທີ່ໃຫ້ການສະໜັບສະໜູນຊ່ວຍເຫຼືອໃນຄັ້ງນີ້ຊຶ່ງລົດຕູ້ດັ່ງກ່າວຈະຖືກນຳໃຊ້ເຂົ້າໃນວຽກງານປຸກລະດົມບໍລິຈາກເລືອດຕາມສະຖານທີ່ຕ່າງໆພາຍໃນແຂວງແນໃສ່ຮັບປະກັນໃຫ້ມີການຕອບສະໜອງເລືອດພຽງພໍປອດໄພແລະທັນເວລາພ້ອມທັງ ເຮັດໃຫ້ເລືອດມີຄວາມປອດໄພ ແລະການເກັບຮັກສາອຸນຫະພູມໄດ້, ການຂົນສົ່ງເລືອດ, ເລືອດຕົວຢ່າງ, ນໍ້າຢາ ແລະ ນໍ້າຢາກວດເລືອດໂດຍບັນຈຸໃສ່ຖັງນໍ້າ ກ້ອນຈາກແຂວງຫາເມືອງ ແລະຈາກແຂວງຫາສູນກາງມີປະສິດທິພາບຫຼາຍຂຶ້ນກວ່າເກົ່າ.

แชร์