ສຶກສາເມືອງທ່າແຕງ ຮັບສະມາຊິກພັກສຳຮອງ ຂຶ້ນເປັນສົມບູນ

 ໃນວັນທີ 17 ມີນາ ຜ່ານມາ ທີ່ສະໂມສອນຫ້ອງປະຊຸມຫ້ອງການສຶກສາທິການ ແລະກີລາເມືອງ ທ່າແຕງ ແຂວງເຊກອງ ໄດ້ມີພິທີ ເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ໂດຍ ການເປັນປະທານຂອງສະຫາຍ ອຸດົມໄຊ ດອມສະຫວັນ ຮອງເລຂາຄະນະພັກຮາກຖານຫ້ອງການສຶກສາທິການ ແລະກີລາເມືອງທ່າແຕງ, ມີໜ່ວຍພັກອ້ອມຂ້າງພ້ອມດ້ວຍສະມາຊິກພັກສົມບູນ ແລະສຳຮອງ ເຂົ້າຮ່ວມ.

   ສະມາຊິກພັກສຳຮອງ 1 ສະຫາຍ, ຢູ່ໜ່ວຍພັກຮາກຖານຫ້ອງການສຶກສາທິການ ແລະກີລາເມືອງ ທ່າແຕງ ແມ່ນໄດ້ຜ່ານການຝຶກຝົນ ຫຼໍ່ຫຼອມ, ຕິດຕາມ ແລະປະເມີນຈາກຄະນະພັກ, ສະມາຊິກພັກສົມບູນເຫັນໄດ້ວ່າຜູ້ກ່ຽວເປັນຜູ້ທີ່ມີ ຄຸນສົມບັດສິນທຳປະຕິວັດ,ມີຄວາມຮູ້, ຄວາມສາມາດ,ຄວາມສາມັກຄີພາຍໃນ ແລະພາຍນອກຢ່າງ ກວ້າງຂວາງ, ມີແບບແຜນວິທີເຮັດວຽກ, ມີຄວາມຫ້າວຫັນສູ້ຊົນ ແລະ ເຮັດສໍາເລັດໜ້າທີ່ວຽກງານທີ່ການຈັດຕັ້ງໄດ້ມອບໝາຍ, ພ້ອມທັງມີ ຄວາມຮັບຜິດຊອບສູງ ແລະມີຜົນ ສໍາເລັດຫຼາຍດ້ານ  ຈຶ່ງໄດ້ເລື່ອນຂຶ້ນ ເປັນສະມາຊິກພັກສົມບູນຢ່າງເປັນ ທາງການ.

   ໃນໂອກາດນີ້ສະຫາຍ ອຸດົມໄຊ ດອມສະຫວັນ ຮອງເລຂາຄະນະພັກຮາກຖານຫ້ອງການສຶກສາທິການ ແລະກີລາເມືອງທ່າແຕງ ກໍໄດ້ສະແດງຄວາມຍ້ອງຍໍຊົມເຊີຍ ຕໍ່ສະຫາຍສະມາຊິກພັກໃໝ່ທີ່ມີຄວາມຫ້າວຫັນ, ດຸໝັ່ນ, ອົດທົນເຮັດສຳເລັດໜ້າທີ່ວຽກງານທີ່ມອບ ໝາຍໃຫ້ຈົນສາມາດເລື່ອນຂຶ້ນເປັນສະມາຊິກພັກສົມບູນໃໝ່ໄດ້,ຈາກນັ້ນກໍໄດ້ແນະນຳໃຫ້ສະມາຊິກພັກໃໝ່ໄດ້ຮັບຮູ້ເຂົ້າໃຈກ່ຽວກັບຄວາມໝາຍຂອງທຸງພັກ,ທຸງຊາດ,ສິດ,ໜ້າທີ່,ພັນທະແລະຜົນປະໂຫຍດ ໃນການປະຕິບັດເນື້ອໃນພື້ນຖານກົດລະບຽບຂອງພັກເພື່ອນຳໄປຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກທີ່ດີໃນຕໍ່ໜ້າ.

------

ໜັງສືພິມເສດຖະກິດ-ສັງຄົມ

• 20/03/2020