ຊຽງຂວາງ ຮັບທຶນຊ່ວຍເຫຼືອລ້າດ້ານພາສາອັງກິດ

     ພິທີເຊັນບົດບັນທຶກຄວາມເຂົ້າໃຈ (MOU) ລະຫ່ວາງກະຊວງສຶກສາທິການ ແລະກີລາ ຕາງໜ້າໂດຍພະແນກສຶກສາທິການ ແລະ ກີລາແຂວງຊຽງຂວາງ ແລະ ມູນນິທິໂລນບັບຟາໂລ ໃນວັນທີ 4 ກຸມພາ 2019 ທີ່ພະແນກສຶກສາທິການ ແລະກີລາແຂວງຊຽງຂວາງ ກ່ຽວກັບໂຄງການສ້າງໂອກາດໃຫ້ແກ່ຊາວໜຸ່ມແຂວງຊຽງຂວາງ ໂດຍຜ່ານການຮຽນ-ການສອນພາສາອັງກິດ.

ທ່ານ ຄຳໝັ້ນ ແສງທຸມມີ ອຳນວຍການສູນພາສາອັງກິດໂລນບັບຟາໂລກໍ່ໄດ້ລາຍງານແຜນການຈັດຕັ້ງປະຕິບັດຂອງໂຄງການ ຊຶ່ງໂຄງການດັ່ງກ່າວໄດ້ຮັບທຶນຫຼັກ ໂດຍມູນນິທິໂລນບັບຟາໂລ,  ທຶນສຳຮອງໂດຍສະຖານສະຫະລັດອາເມລິກາປະຈຳ ສປປ ລາວ, ສະຖານທູດລາຊະອານາຈັກອັງກິດປະຈຳ ສປປ ລາວ, ໂຮງຮຽນນາໆຊາດປັນຍາທິບ, ອົງການທ່ອງທ່ຽວນາກາຮັດ, ອົງການທ່ອງທ່ຽວເອັກສ໌ໂອ (XO),  ອົງການເກັບກູ້ລະເບີດແມັກ ສປປ ລາວ ແລະອົງການ  ອື່ນໆເລີ່ມຈັດຕັ້ງໂຄງການແຕ່ເດືອນກຸມພາ 2019 ເຖິງເດືອນກຸມພາ  2021 ໂຄງການຈະນຳໃຊ້ງົບປະ ມານທັງໝົດ 2,66 ແສນໂດລາ.

ຈຸດປະສົງເປົ້າໝາຍຫຼັກຂອງໂຄງການມີຍົກລະດັບທັກສະພາສາອັງກິດທົ່ວໄປໃຫ້ກັບຊາວໜຸ່ມໃນເຂດຕົວເມືອງໂພນສະຫັວນ,  ຊ່ວຍຍົກລະດັບຫຼັກວິທີການສອນພາສາອັງກິດໃຫ້ຄູສອນທີ່ສອນໃນມູນນິທິ ແລະຄູຝຶກສອນ, ຊ່ວຍສອນພາສາອັງກິດໃຫ້ພາກເອກະຊົນໂດຍການສ້າງຄວາມອາດສາມາດ, ຮັບປະກັນໃຫ້ນັກຮຽນຍິງມີໂອກາດເຂົ້າເຖິງການສຶກສາ ແລະສັງຄົມເທົ່າທຽມກັບນັກຮຽນຊາຍ, ຊຸກຍູ້ໃຫ້ນັກຮຽນເຂົ້າຮ່ວມກິດຈະກຳກີລາເພື່ອເປັນການສົ່ງເສີມການມີສຸຂະພາບເພື່ອຕ້ານບັນຫາຢາເສບຕິດ ແລະພຶດຕິກຳສ່ຽງຕໍ່ສັງຄົມ,  ກະຕຸກຊຸກຍູ້ນັກຮຽນເຂົ້າຮ່ວມເຮັດກິດຈະກຳທີ່ເປັນແນວຄິດສ້າງສັນເພື່ອສົ່ງເສີມໃຫ້ປະພຶດຕົວດີໃນສັງຄົມ ແລະຊຸມຊົນ, ຊ່ວຍນັກຮຽນກຽມພ້ອມເຂົ້າຮຽນໂຮງຮຽນວິຊາຊີບວິທະຍາໄລ ຫຼື ມາຫາວິທະຍາໄລ, ພັດທະນາພື້ນຖານທາງດ້ານທຸລະກິດ ແລະທັກສະຄວາມເປັນຜູ້ນຳໃຫ້ແກ່ນັກຮຽນທັງໝົດນີ້ເປັນການຊ່ວຍເຫຼືອລ້າແກ່ແຂວງຊຽງຂວາງ .

ພິທີເຊັນບົດບັນທຶກຄວາມເຂົ້າໃຈຄັ້ງນີ້ມີທ່ານ ບົວລີ ພັນນາວົງ ຫົວໜ້າພະແນກສຶກສາທິການ  ແລະກີລາແຂວງຂຶ້ນເຊັນຕາງໜ້າກະຊວງສຶກສາທິການ   ແລະກີລາ,  ທ່ານ ມາກສະເຕດແມນ (Mark Stead man) ຫົວໜ້າມູນນິທິໂລນບັບຟາໂລປະຈຳ ສປປ ລາວ ໂດຍຊ້ອງໜ້າພະນັກງານ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

แชร์