ຟຟລ ເຊກອງຮັບໃບຢັ້ງຢືນ ໜ່ວຍພັກປອດໃສເຂັ້ມແຂງໜັກແໜ້ນ

 ວັນທີ 12 ມີນາ 2020 ຢູ່ລັດວິສາຫະກິດໄຟຟ້າລາວ (ຟຟລ) ສາຂາແຂວງເຊກອງ ໄດ້ມີພິທີມອບ-ຮັບໃບຢັ້ງຢືນໜ່ວຍພັກປອດໃສເຂັ້ມແຂງໜັກແໜ້ນໂດຍໃຫ້ກຽດເຂົ້າຮ່ວມຂອງສະຫາຍ ອ້ວນຄໍາ ທຸງໄຊ ກໍາມະການພັກແຂວງ, ຫົວໜ້າຄະນະຈັດຕັ້ງແຂວງ,  ສະຫາຍ ຫີນເພັດ ແກ້ວຫົງສາ ຮອງປະທານກວດກາພັກແຂວງ; ກໍມີສະຫາຍ ໃນຄະນະພັກຮາກຖານ, ເລຂາ-ຮອງເລຂາໜ່ວຍພັກ, ສະມາຊິກພັກ ແລະແຂກຖືກເຊີນເຂົ້າຮ່ວມ.

 ສະຫາຍ ວິໄຊ ໄຍຍາສານ ເລຂາໜ່ວຍພັກ ຟຟລ ສາຂາເຊກອງ ໄດ້ຂຶ້ນຜ່ານບົດສະຫຼຸບຕີລາຄາຜົນຂອງການປະເມີນໜ່ວຍພັກປອດໃສເຂັ້ມ ແຂງໜັກແໜ້ນປະຈໍາປີ 2019 ໂດຍໄດ້ຍົກໃຫ້ເຫັນ: ດ້ານເນື້ອໃນ ແລະ ຂັ້ນຕອນສະຫຼຸບຕີລາຄາການຈັດຕັ້ງປະຕິບັດແຜນການກໍ່ສ້າງໜ່ວຍພັກ ປອດໃສເຂັ້ມແຂງໜັກແໜ້ນ; ຕີລາຄາການຊີ້ນໍາໆພາຮອບດ້ານຂອງ ໜ່ວຍພັກ ຟຟລ ສາຂາເຊກອງ, ຜົນການປະເມີນຕີລາຄາແບ່ງປະເພດ ໜ່ວຍພັກ ແລະສະມາຊິກພັກ.

 ສະຫາຍ ນາງ ຂວັນໃຈ ສີສຸວົງ ຮອງຫົວໜ້າຂະແໜງກໍ່ສ້າງພັກແຂວງໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງເຊກອງເລກ ທີ 579/ຄຈພຂ, ລົງວັນທີ 31 ທັນວາ 2019 ວ່າດ້ວຍການຮັບຮອງ ເອົາໜ່ວຍພັກລັດວິສາຫະກິດໄຟຟ້າລາວສາຂາ ແຂວງເຊກອງທີ່ຂຶ້ນກັບຄະນະພັກຮາກຖານພະແນກພະລັງງານ ແລະບໍ່ແຮ່ແຂວງເປັນໜ່ວຍພັກປອດໃສເຂັ້ມແຂງໜັກແໜ້ນປະຈໍາປີ2019.

 ໃນພິທີດັ່ງກ່າວໄດ້ມອບໃບຢັ້ງຢືນໜ່ວຍພັກປອດໃສເຂັ້ມແຂງໜັກແໜ້ນໂດຍໃຫ້ກຽດມອບຂອງສະຫາຍ ອ້ວນຄໍາ ທຸງໄຊ ກໍາມະການພັກແຂວງ, ຫົວໜ້າຄະນະຈັດຕັ້ງແຂວງ, ພ້ອມທັງມີຄຳເຫັນ ເນັ້ນໃຫ້ຄະນະພັກ ແລະສະມາຊິກພັກພາຍໃນໜ່ວຍຈົ່ງສຸມໃສ່ຜັນຂະຫຍາຍແນວຄິດການເມືອງຕາມແນວທາງນະໂຍບາຍຂອງພັກ, ສືບຕໍ່ຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີ, ຮັກສາມູນມູນເຊື້ອນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຕິດພັນກັບການນໍາພາຈັດຕັ້ງປະຕິ ບັດໜ້າທີ່ວິຊາສະເພາະຂອງຕົນໃຫ້ບັນລຸຕາມຄາດໝາຍໂດຍສະເພາະຕ້ອງຍົກສູງຄວາມຮັບຜິດຊອບດ້ານການສະໜອງການບໍລິການກະແສໄຟຟ້າໃຫ້ປະຊາຊົນໄດ້ຊົມໃຊ້ຢ່າງທົ່ວເຖິງ.

__________

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์