2025 ແຂວງສະຫວັນນະເຂດ ຕ້ອງສຳເລັດການອອກໃບຕາດິນໃຫ້ໄດ້ໂດຍພື້ນຖານ

   ພະແນກຊັບພະຍາກອນທຳມະຊາດ ແລະສິ່ງແວດລ້ອມ (ຊສ) ແຂວງສະຫວັນນະເຂດ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານປີ 2019 ແລະວາງທິດທາງແຜນການໃນຕໍ່ໜ້າຂອງວຽກງານທີ່ດິນໃນທົ່ວແຂວງພາຍໃຕ້ການເຂົ້າຮ່ວມເປັນປະທານຂອງທ່ານ ພູທອນ ຍອດບຸນເຮືອງ ຫົວໜ້າພະແນກ ຊສ ແຂວງ, ຈາກນີ້ກໍ່ມີບັນດາຂະແໜງການອ້ອມຂ້າງພະແນກ ແລະຫ້ອງການ ຊສ ໃນ 14 ເມືອງ 1 ນະຄອນເຂົ້າຮ່ວມຢ່າງພ້ອມພຽງ.

ທ່ານ ພູທອນ ຍອດບຸນເຮືອງ ກ່າວວ່າ: ການຈັດໃນກອງປະຊຸມຄັ້ງນີ້ ເພື່ອປຶກສາຫາລື ແລະພ້ອມກັນວາງ ແຜນການໃນການຈັດຕັ້ງປະຕິບັດວຽກງານໃນຕໍ່ໜ້າ ໂດຍສະເພາະແມ່ນກ່ຽວກັບວຽກງານການອອກໃບຕາດິນ ຊຶ່ງຕາມແຜນການທີ່ລັດຖະບານມອບໝາຍໃຫ້ແມ່ນຮອດປີ 2025 ແຂວງສະຫວັນນະເຂດຕ້ອງອອກໃບຕາດິນໃຫ້ສຳເລັດໂດຍພື້ນຖານ (426.760 ຕອນ) ແລະມາໃນປະຈຸບັນຍັງມີໂຕເລກທີ່ຕ້ອງສູ້ຊົນທັງໝົດຈຳນວນ 229.749ຕອນ ໂດຍໃນປີ 2020 ນີ້,ແມ່ນມອບໃຫ້ຈັດຕັ້ງປະຕິບັດຢູ່ເມືອງໄຊພູທອງໃຫ້ສຳເລັດ 80% ຂຶ້ນໄປທັງນີ້ກໍເພື່ອເຮັດໃຫ້ການຈັດເກັບລາຍຮັບເຂົ້າງົບປະມານໃນຂະແໜງທີ່ດິນເພີ່ມຂຶ້ນ.

ສະໜັບສະໜູນໂດຍ: HONDA

  ທ່ານ ບູລິກາ ອິນທິລາດ ຫົວໜ້າຂະແໜງທີ່ດິນກໍ່ໄດ້ລາຍງານໃຫ້ຮູ້ເຖິງການຈັດຕັ້ງປະຕິບັດວຽກງານໃນ 1 ປີຜ່ານມາ ດ້ານວຽກງານສຳຫຼວດ-ວັດແທກພິສູດຫຼັກ ຖານອອກໃບຕາດິນຢ່າງເປັນລະບົບໃນ 14 ເມືອງ, 1 ນະຄອນໃນປີ 2019 ຊຶ່ງພະແນກ ຊສ ມີໂຕເລກສູ້ຊົນທີ່ແຂວງມອບໃຫ້ແມ່ນ20.000 ຕອນ ແລະໂຕເລກທີ່ກະຊວງ ຊສ ມອບໃຫ້ຈຳນວນ 13.000 ຕອນ; ຜ່ານການຈັດຕັ້ງປະຕິບັດຕົວຈິງສາມາດປະຕິບັດໄດ້ທັງໝົດ 20.141 ຕອນ, ເທົ່າກັບ 100,71% ຂອງໂຕເລກທີ່ແຂວງມອບໃຫ້ ແລະເທົ່າກັບ 154,93% ຂອງໂຕເລກທີ່ກະຊວງມອບໃຫ້ແຂວງຈັດຕັ້ງປະຕິບັດ, ເຮັດໃຫ້ມາຮອດປະຈຸບັນທົ່ວແຂວງສາມາດຂຶ້ນທະບຽນອອກໃບຕາ ດິນໄດ້ 197.011 ຕອນ, ທຽບໃສ່ສະຖິຕິສຳມະໂນທີ່ດິນໃນຂອບເຂດທົ່ວແຂວງຈຳນວນ 426.760 ຕອນ, ເທົ່າກັບ 45,8%, ທາງດ້ານການຈັດເກັບລາຍຮັບຈາກການຈົດທະບຽນທີ່ດິນໃນປີ 2019 ສາມາດບັນລຸໄດ້ທັງໝົດ 1,62 ຕື້ກວ່າກີບ.

 ສຳລັບປີ 2020 ຂະແໜງທີ່ດິນຈະໄດ້ເອົາໃຈໃສ່ເນັ້ນໜັກໃຫ້ພະນັກງານວິຊາການສືບຕໍ່ຊຸກຍູ້ວຽກງານສໍາຫຼວດວັດແທກທີ່ດິນແບບເປັນລະບົບເພື່ອໃຫ້ບັນລຸຕາມແຜນ ການທີ່ກະຊວງ ແລະ ແຂວງມອບໃຫ້ກໍ່ຄືມີ 15.000 ຕອນ, ເຊັນໃບຕາດິນ 13.000 ຕອນ, ຈ່າຍໃບຕາດິນຈໍານວນ 10.500 ຕອນ ໂດຍຮອດທ້າຍປີ 2020 ທົ່ວແຂວງຈະອອກໃບຕາດິນໃຫ້ໄດ້ທັງໝົດ 200.000 ຕອນ ໃນນີ້ ຈະສ້າງຈຸດບໍລິການດ້ານທີ່ດິນຢູ່ 3 ຈຸດຄື: ຢູ່ກັບພະແນກ ຊສ, ຢູ່ເມືອງອາດສະພັງທອງ, ເມືອງສອງຄອນ ພ້ອມນີ້ກໍ່ຈະສ້າງທີມງານຂຶ້ນທະບຽນອອກໃບຕາດິນປະຈໍາຢູ່ເມືອງອຸທຸມພອນ, ພີນ,ສອງຄອນ, ຈໍາພອນ, ຊົນນະບູລີ, ອາດສະພອນ ແລະເມືອງໄຊພູທອງ.

---------

ໜັງສືພິມເສດຖະກິດ-ສັງຄົມ

แชร์