ລາວຮັບທຶນໄລຍະໃໝ່ປັບປຸງການເຂົ້າເຖິງການບໍລິການສຸຂະພາບ ແລະໂພຊະນາການ

 ເມື່ອອາທິດຜ່ານມາສະພາບໍລິຫານຂອງທະນາຄານໂລກໄດ້ອະນຸມັດເງິນຈໍານວນ 23 ລ້ານໂດລາ ໃຫ້ແກ່ ສປປ ລາວ ເພື່ອດໍາເນີນໂຄງການເຂົ້າເຖິງການບໍລິການສຸຂະ ພາບ ແລະໂພຊະນາການ (HANSA),ໂຄງການດັ່ງກ່າວແມ່ນແນໃສ່ເພື່ອສ້າງຄວາມ ເຂັ້ມແຂງໃຫ້ແກ່ລະບົບສາທາລະນະສຸກຂອງ ສປປ ລາວ ແລະປັບປຸງຄຸນນະພາບ ແລະການປົກຄຸມຂອງບໍລິການສາທາລະນະສຸກໂດຍການສະໜອງທຶນໃຫ້ແກ່ສຸກສາລາ, ພະແນກສາທາແຕ່ລະຂັ້ນ ແລະກົມວິຊາການຕ່າງໆໃນກະຊວງສາທາ, ຊຶ່ງການສະໜອງ ທຶນແມ່ນອີງໃສ່ຜົນງານການຈັດຕັ້ງປະຕິບັດທີ່ຜ່ານການກວດກາສົມທຽບໃສ່ມາດຕະຖານທີ່ກະຊວງສາທາວາງອອກ, ໂຄງການນີ້ຈະເພີ່ມຄວາມຍືນຍົງບັນດາ ແຜນງານສາທາລະນະສຸກ, ຊຶ່ງລວມທັງວຽກງານສຸຂະພາບແມ່ ແລະເດັກ,ການຊັກຢາກັນພະຍາດ,ວັນນະໂລກ ແລະການປ້ອງກັນເຊື້ອເອສໄອວີ, ໂດຍສະເພາະແມ່ນແນໃສ່ການຫຼຸດຜ່ອນການ ຂາດສານອາຫານຢູ່ໃນບັນດາ ແຂວງພາກເໜືອຂອງ ສປປ ລາວ.

ໃນບັນດາຕົວຊີ້ບອກດ້ານການ ຈັດຕັ້ງປະຕິບັດຕ່າງໆຂອງໂຄງການ HANSA ແມ່ນກ່ຽວກັບ ການໃຫ້ມີຢາ ແລະເຄື່ອງໃຊ້ພື້ນຖານພຽງພໍ ແລະການບັນຈຸພະນັກ ງານແພດຢູ່ບັນດາສຸກສາລາ, ພ້ອມທັງແມ່ ແລະເດັກນ້ອຍຈຳ ນວນລາຍໃຫ້ໄດ້ຮັບການບໍລິການ ຮັກສາສຸຂະພາບທີ່ມີຄຸນນະພາບ ໃນສະຖານທີ່ໃຫ້ບໍລິການສາທາລະນະສຸກຂອງລັດ.

ສະໜັບສະໜູນໂດຍ: HONDA

“ອັດຕາການຕາຍຂອງແມ່ ແລະເດັກ ແລະ ການຂາດສານອາຫານຊໍາເຮື້ອຂອງ ສປປ ລາວ ຍັງຢູ່ໃນລະດັບສູງສຸດໃນບັນດາປະເທດອາຊີຕາເວັນອອກສຽງໃຕ້ ແລະປາຊີ ຟິກ, ໂດຍຜ່ານໂຄງ ການນີ້, ທະນາຄານໂລກ ແລະບັນດາຄູ່ຮ່ວມພັດທະນາຈະເຮັດວຽກ ຮ່ວມກັນເພື່ອປັບປຸງສາທາລະນະສຸກຂັ້ນພື້ນຖານສໍາລັບແມ່ຍິງ ແລະເດັກ, ຊຶ່ງຈະເປັນການຊ່ວຍ ຍົກລະດັບມາດຕະຖານການດຳລົງຊີວິດ ແລະຕັດວົງຈອນຄວາມ ທຸກຍາກ”, ທ່ານ ນິໂກລາ ປອນ ຕາຣາ ຫົວໜ້າຫ້ອງການທະນາຄານໂລກປະຈໍາ ສປປ ລາວ ກ່າວ.

 ປະມານ 33 ເປີເຊັນ ຂອງເດັກທີ່ມີອາຍຸຕໍ່າກວ່າ 5 ປີ ຢູ່ ສປປ ລາວ ແມ່ນຂາດສາອາຫານຊໍາເຮື້ອ,ການຂາດສານອາຫານໃນລະດັບສູງທີ່ມີຢູ່ໃນໄວເດັກໝາຍເຖິງການສູນເສຍຄວາມອາດສາມາດບົ່ມຊ້ອນຂອງປະຊາຊົນ ແລະເສດຖະກິດສໍາລັບປະເທດ, ໂຄງການດັ່ງກ່າວສະໜັບສະໜູນວິທີການເຮັດວຽກແບບເປັນໜຶ່ງດຽວຂອງຫຼາຍຂະ ແໜງການດ້ານໂພຊະນາການ, ຊຶ່ງເລີ່ມຂຶ້ນຢ່າງເປັນທາງການໃນເດືອນພະຈິກ 2019 ໂດຍລັດຖະບານແຫ່ງ ສປປ ລາວ ເພື່ອຫຼຸດຜ່ອນສະພາບການຂາດສານອາ ຫານໃນ 4 ແຂວງ ພາກເໜືອ-ອຸດົມໄຊ, ຜົ້ງສາລີ, ຫົວພັນ ແລະຊຽງຂວາງ, ໂຄງການໃໝ່ນີ້ຍັງຈະປັບປຸງການກວດພົບ ແລະ ປິ່ນປົວວັນນະໂລກ ແລະເພີ່ມການປົກຄຸມຂອງການກວດຫາເຊື້ອເອສໄອວີໃນບັນດາປະຊາກອນ ແລະກຸ່ມຄົນທີ່ມີຄວາມສ່ຽງໂດຍຜ່ານການໃຫ້ບໍລິການສຸຂະພາບແບບເຊື່ອມສານຫຼາຍກວ່າເກົ່າ.

“ການສະໜອງທຶນດັ່ງກ່າວ ບໍ່ພຽງແຕ່ເປັນການປະກອບສ່ວນ ເຂົ້າໃນການລົງທຶນໃສ່ການສ້າງ ທຶນມະນຸດຂອງ ສປປ ລາວ ແຕ່ ມັນຍັງເປັນຮັກສາຊີວິດ ໂດຍການ ໃຫ້ການປິ່ນປົວ ແລະຮັກສາສຸຂະພາບພື້ນຖານໃຫ້ບາງຊຸມຊົນທີ່ ດ້ອຍໂອກາດທີ່ສຸດໃນປະເທດ”, ຄໍາກ່າວຂອງທ່ານ ໂຊມີລ ນາກ ປານ ຊ່ວຍຊານສາທາລະນະສຸກ ອາວຸໂສ ແລະຫົວໜ້າທີມຂອງໂຄງ ການດັ່ງກ່າວນີ້.

ໂຄງການດັ່ງກ່າວນອກຈາກ ຈະໄດ້ຮັບການສະໜອງທຶນຈໍານວນ 23 ລ້ານໂດລາ ຈາກສະມາຄົມເພື່ອການພັດທະນາສາກົນ (IDA) ແລ້ວຍັງຄາດວ່າຈະໄດ້ ຮັບການສະໜອງທຶນຊ່ວຍເຫຼືອ ລ້າເສີມຕື່ມ ຈໍານວນ 10 ລ້ານໂດລາ ແລະ 3 ລ້ານໂດລາ ຈາກກອງ ທຶນໂລກ ແລະກອງທຶນຮ່ວມກັນ ຂອງບັນດາຜູ້ໃຫ້ທຶນຫຼາຍພາກສ່ວນ (IDFHP) ເພື່ອກ້າວໄປຫາການປົກຄຸມສຸຂະພາບທຸກຖ້ວນໜ້າຕາມລໍາດັບ, ໂດຍການອະນຸມັດແມ່ນຂຶ້ນກັບລະບຽບການ ພາຍໃນຂອງທັງສອງກອງທຶນ, ລັດຖະບານຂອງປະເທດອົດສະຕາລີ ແມ່ນຜູ້ໃຫ້ທຶນໃຫ່ຍສຸດໃນກອງທຶນຮ່ວມ IDFHP ແລະ ຮ່ວມກັບຄູ່ຮ່ວມງານທີ່ແມ່ນມູນນິທິ ທ່ານ ບິລ ແລະທ່ານ ນາງ ເມລິດາ ເກສ (Bill and Melinda Gates) ແລະກາວີອາລາຍອັນ (Gavi Alliance), ອົງການ IDA ຂອງທະນາຄານໂລກຖືກສ້າງຕັ້ງຂຶ້ນ ໃນປີ 1960 ແມ່ນຊ່ວຍເຫຼືອປະເທດທີ່ທຸກຍາກທີ່ສຸດ ໃນໂລກ ໂດຍການສະໜອງທຶນຊ່ວຍເຫຼືອລ້າ ແລະເງິນກູ້ໃນອັດຕາດອກເບ້ຍຕໍ່າ ແລະດອກເບ້ຍ ສູນເປີເຊັນສໍາລັບໂຄງການ ແລະ ແຜນງານຕ່າງໆທີ່ກະຕຸ້ນການເຕີບໂຕທາງເສດຖະກິດ, ຫຼຸດຜ່ອນ ຄວາມທຸກຍາກ ແລະປັບປຸງຊີ ວິດການເປັນຢູ່ຂອງປະຊາຊົນ.

---------

ໜັງສືພິມເສດຖະກິດ-ສັງຄົມ

แชร์