ມສ ສາລະວັນ ຈັດງານປະກວດສິ່ງປະດິດ ແລະສື່ການຮຽນ-ການສອນ

 ໃນວັນທີ 13 ມີນາ ຜ່ານມາ ໂຮງຮຽນ ມສ ສາລະວັນ ໄດ້ຈັດງານປະກວດສິ່ງປະດິດ ແລະ ສື່ການຮຽນ-ການສອນ ຄັ້ງທີ II ປະຈໍາສົກຮຽນ 2019-2020 ທີ່ສະໂມສອນຂອງໂຮງຮຽນ, ໂດຍ ການເຂົ້າຮ່ວມເປັນປະທານຂອງ ທ່ານ ອູທອນ ລັດຖະສົມບັດ ຮອງຫົວໜ້າຫ້ອງການສຶກສາທິການ-ກີລາເມືອງ, ທ່ານ ບຸນທຽມ ຈັນທະຈອນ ຫົວໜ້າຂະແໜງມັດທະຍົມ, ທ່ານ ຈັນທະວີ ອິນທະດວງຈິດ ຜູ້ອຳນວຍການໂຮງຮຽນ ມສ ສາລະວັນ, ມີທ່ານຄະນະອຳນວຍ ໂຮງຮຽນ ແລະແຂກຖືກເຊີນພ້ອມ ດ້ວຍນ້ອງນັກຮຽນເຂົ້າຮ່ວມ.

 ການຈັດງານໃນຄັ້ງນີ້ທ່ານ ຈັນທະວີອິນທະດວງຈິດ ຜູ້ອຳນວຍ ການໂຮງຮຽນ ມສ ສາລະວັນ ໃນ ນາມປະທານພິທີໄດ້ຂຶ້ນກ່າວເປີດງານປະກວດສິ່ງປະດິດ ແລະສື່ປະກອບການຮຽນ-ການສອນ ຄັ້ງທີ II ປະຈຳສົກຮຽນ 2019-2020 ຢ່າງເປັນທາງການ,ທັງນີ້ກໍ່ເພື່ອ ເປັນການສົ່ງເສີມພູມປັນຍາ,ການຄົ້ນຄິດປະດິດສ້າງທີ່ສ້າງສັນ ແລະ ເພື່ອເປັນການປະເມີນຄືນການສຶກສາຄົ້ນຄວ້າຂອງນ້ອງໆນັກຮຽນ ໃນແຕ່ລະຂັ້ນນັບແຕ່ ມ1-ມ7, ພ້ອມ ທັງນຳເອົາຜົນງານດີເດັ່ນທີ່ສ້າງ ສັນມາຈັດວາງສະແດງ ແລະນຳ ໄປປັບປຸງແກ້ໄຂເພື່ອໝູນໃຊ້ໃຫ້ ເກີດປະໂຫຍດໃນຊີວິດປະຈຳວັນ, ທັງເປັນການຄັດເລືອກສະສົມຜົນງານທີ່ໂດດເດັ່ນເພື່ອນຳໃຊ້ເຂົ້າໃນ ການຈັດຕັ້ງການຮຽນ-ການສອນໃຫ້ມີປະສິດທິພາບດີຂຶ້ນເປັນກ້າວໆ, ສຳລັບການປະກວດໃນຄັ້ງນີ້ປະ ກອບມີ: ສື່ການຮຽນ-ການສອນ, ການຈັດວາງສະແດງ, ການປະກວດສິ່ງປະດິດເຊັ່ນ: ພັດລົມອາຍ ນໍ້າ, ເຄື່ອງຕອງນໍ້າ, ແມ່ເຫຼັກໄຟ ຟ້າ, ປັກສຽບມະຫັດສະຈັນ, ກ້ອງ ສ່ອງດາວອັງຄານ ແລະອື່ນໆ.

  ຈາກນັ້ນໃນກິດຈະກຳດັ່ງກ່າວ ຄະນະທ່ານປະທານ,ແຂກຖືກເຊີນ,ກຳມະການກໍ່ໄດ້ລົງກວດກາ ແລະ ຮັບຊົມສື່ການຮຽນ-ການສອນ, ສິ່ງປະດິດ, ການຈັດວາງສະແດງ, ຜ່ານການກວດກາຂອງກຳມະການໃນແຕ່ລະຂັ້ນຮຽນຂັ້ນ ມ1- ຂັ້ນ ມ7 ສາມາດເລືອກໄດ້ຜູ້ຊະນະເລີດຄື: ການປະກວດຜະລິດຕະພັນ ສິ່ງປະດິດ ຊະນະເລີດໄດ້ແກ່ຂັ້ນ ມ4 ແລະຂັ້ນ ມ7, ທີ 2 ໄດ້ແກ່ຂັ້ນ ມ3 ແລະຂັ້ນ ມ5, ທີ 3 ໄດ້ແກ່ ຂັ້ນ ມ2 ແລະຂັ້ນ ມ6, ການປະກວດສື່ການຮຽນ-ການສອນຊະນະເລີດ ໄດ້ແກ່: ຂັ້ນ ມ3 ແລະຂັ້ນ ມ6, ທີ 2 ໄດ້ແກ່ ຂັ້ນ ມ4 ແລະ ຂັ້ນ ມ7, ທີ 3 ໄດ້ແກ່ ຂັ້ນ ມ1 ແລະຂັ້ນ ມ5 ແລະການປະກວດ ການຈັດວາງສະແດງຊະນະເລີດ ໄດ້ແກ່ ຂັ້ນ ມ4 ແລະຂັ້ນ ມ7, ທີ 2 ໄດ້ແກ່ ຂັ້ນ ມ3 ແລະຂັ້ນ ມ5, ທີ 3 ໄດ້ແກ່ ຂັ້ນ ມ1 ແລະຂັ້ນ ມ6.

--------

ໂດຍ: ວົງມະນີ

 

แชร์