ມອບ-ຮັບໂຮງຮຽນປະຖົມຫຼັງໃໝ່ບ້ານດົງກິໂລ

 ເມື່ອບໍ່ດົນມານີ້ທີ່ໂຮງຮຽນປະຖົມບ້ານດົງກິໂລ ໄດ້ຈັດພິທີມອບ-ຮັບໂຮງຮຽນປະຖົມຫ້ອງ ປ1 ແລະ ປ2 ຫຼັງໃໝ່ຂຶ້ນຢ່າງເປັນທາງການ ໂດຍພາຍໃຕ້ການເຂົ້າຮ່ວມຂອງທ່ານ ຄໍາຮູ້ ພູມມະລາດ ຫົວໜ້າຫ້ອງການສຶກສາ ທິການ ແລະກີລາເມືອງອາດສະພັງທອງ, ມີທ່ານ ພັທ ຄໍາຜຸຍ ພັນດານຸວົງ ຕາງໜ້າຜູ້ປະກອບ ສ່ວນກໍ່ສ້າງໂຮງຮຽນ, ມີອໍານາດ ການປົກຄອງອ້ອມຂ້າງເມືອງ, ອໍານາດການປົກຄອງທ້ອງຖິ່ນ, ຜູ້ອໍານວຍການໂຮງຮຽນຕະຫຼອດ ຮອດຄູ-ອາຈານ ແລະນ້ອງນັກ ຮຽນກໍ່ໄດ້ເຂົ້າຮ່ວມ.

  ໃນການກໍ່ສ້າງໂຮງຮຽນປະຖົມຫ້ອງປ1 ແລະ ປ2 ໃນຄັ້ງນີ້ ແມ່ນເລີ່ມລົງມືກໍ່ສ້າງມາແຕ່ວັນທີ 14 ມິຖຸນາ 2018 ມາເຖິງວັນທີ 28 ສິງຫາ 2019 ແມ່ນໄດ້ສໍາເລັດສົມບູນຕາມລໍາດັບຄາດໝາຍ ໂດຍໄດ້ຮັບແຫຼ່ງທຶນຈາກການປະກອບສ່ວນມາຈາກສິດເກົ່າ, ນິຕິ ບຸກຄົນ, ບຸກຄົນ ແລະນັກທຸລະກິດພາຍໃນເມືອງເປັນຜູ້ປະກອບສ່ວນເຂົ້າໃນການກໍ່ສ້າງ, ສ່ວນຂະໜາດຄວາມກວ້າງແມ່ນ 8X12 ແມັດ ແບ່ງອອກເປັນ 2 ຫ້ອງ ຮຽນ, ໂຄງສ້າງກໍ່ດ້ວຍດິນຈີ່ເສີມ ເຫຼັກມຸງດ້ວຍສັງກະສີ, ຊຶ່ງຄິດເປັນ ມູນຄ່າທັງໝົດໃນການກໍ່ສ້າງແມ່ນ 56,14 ລ້ານກີບ.

 ຈາກນັ້ນໃນພິທີກໍ່ໄດ້ມີການມອບໂຮງຮຽນຫຼັງດັ່ງກ່າວເປັນກຽດມອບໂດຍທ່ານ ພັທ ຄໍາຜຸຍ ພັນດານຸວົງ ຕາງໜ້າຜູ້ປະກອບສ່ວນກໍ່ສ້າງໂຮງຮຽນ ແລະກ່າວ ຮັບໂດຍທ່ານ ຄໍາຮູ້ ພູມມະລາດ ຫົວໜ້າຫ້ອງການສຶກສາທິການ ແລະກິລາເມືອງ ໂດຍຊ້ອງໜ້າກັບ ບັນດາແຂກທີ່ເຂົ້າຮ່ວມເພື່ອເປັນ ສັກຂີພິຍານນໍາດ້ວຍ, ຫຼັງຈາກນັ້ນ ຫົວໜ້າຫ້ອງການສຶກສາທິການ ແລະກີລາເມືອງກໍ່ໄດ້ມອບຕໍ່ໃຫ້ຜູ້ອໍານວຍການໂຮງຮຽນປະຖົມດົງກະໂລ ເປັນຜູ້ຊົມໃຊ້ພ້ອມທັງມອບໝາຍສິດນໍາໃຊ້ໃຫ້ແກ່ພາກສ່ວນທີ່ ກ່ຽວຂ້ອງພ້ອມກັນນໍາໃຊ້ເຂົ້າໃນ ການສຶກສາຮໍ່າຮຽນອົບຮົມບົ່ມຊ້ອນລູກຫຼານຂອງຊຸມຊົນບ້ານດັ່ງ ກ່າວໃຫ້ໄດ້ຮັບການສຶກສາຕໍ່ໄປ.

-----------

ໜັງສືພິມເສດຖະກິດ-ສັງຄົມ

แชร์