ສຶກສາເຊກອງ ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ

 ເມື່ອອາທິດຜ່ານມາ ພະແນກສຶກສາທິການ ແລະກີລາແຂວງ ເຊກອງ, ໄດ້ຈັດພິທີມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2019; ໂດຍການ ເຂົ້າຮ່ວມເປັນປະທານຂອງສະຫາຍ ພອນເພັດ ຄິວລະວົງ ຮອງ ເລຂາພັກແຂວງ, ປະທານສະພາປະຊາຊົນແຂວງເຊກອງ, ມີສະຫາຍ ອ້ວນຄໍາ ທຸງໄຊ ຫົວໜ້າຄະນະຈັດຕັ້ງແຂວງສະຫາຍ ຄໍາໄພ ສີມມາວັດ ວ່າການຫົວໜ້າພະແນກສຶກສາທິການ ແລະກີລາແຂວງເຊກອງ,ມີບັນດາພະແນກການທີ່ກ່ຽວ ຂ້ອງຈາກກຸ່ມວັດທະນະທໍາ-ສັງຄົມ ແຂກຖືກເຊີນພ້ອມດ້ວຍສະມາຊິກ ພັກໃນທົ່ວພະແນກສຶກສາທິການ ແລະກີລາເຂົ້າຮ່ວມຢ່າງຫຼວງຫຼາຍ.

 ກອງປະຊຸມໄດ້ຮັບຟັງການສະຫຼຸບລາຍງານການຕີລາຄາ-ປະເມີນໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ໂດຍຫຍໍ້ຈາກເລຂາ ຄະນະໜ່ວຍພັກທັງ 6 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກສຶກສາທິການ ແລະກີລາ ຊຶ່ງ ໄດ້ຍົກໃຫ້ເຫັນເນື້ອໃນ ແລະຂັ້ນຕອນສະຫຼຸບຕີລາຄາການຈັດຕັ້ງ ປະຕິບັດແຜນການກໍ່ສ້າງໜ່ວຍພັກປອດໃສ,ເຂັ້ມແຂງ, ໜັກແໜ້ນປະຈໍາປີ 2019 ແລະທິດທາງແຜນ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020; ຕີລາຄາການຊີ້ນໍາໆພາຢ່າງຮອບ ດ້ານຂອງໜ່ວຍພັກ ໂດຍແນໃສ່ບັນ ດາສະມາຊິກພັກທີ່ເປັນພະນັກງານ ຄູ-ອາຈານຢູ່ບັນດາໂຮງຮຽນຕ້ອງ ໄດ້ຖືສໍາຄັນໃນການສຶກສາອົບຮົມ ສິດສອນນັກຮຽນນັກສຶກສາເພື່ອ ຮັບປະກັນທັງປະລິມານ ແລະຄຸນ ນະພາບ.

 ສະຫາຍ ກາວິນ ແກ້ວຈັນທະວົງ ຫົວໜ້າຂະແໜງກໍ່ສ້າງພັກກໍ່ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 582/ຄຈພຂ; ສະບັບເລກທີ 583/ຄຈພຂ; ສະບັບເລກທີ 584/ຄຈພຂ; ສະບັບເລກທີ 585/ຄຈພຂ; ສະບັບເລກທີ 586/ຄຈພ; ສະບັບເລກ ທີ 587/ຄຈພຂ; ລົງວັນທີ 31 ທັນວາ 2019 ວ່າດ້ວຍຮັບຮອງ ໜ່ວຍ ພັກປອດໃສ, ເຂັ້ມແຂງ ແລະໜັກແໜ້ນປະຈໍາປີ 2019; ໃນພິທີຍັງ ໄດ້ມີການມອບບັດແດງໃຫ້ແກ່ສະມາຊິກພັກສົມບູນທີ່ໄດ້ມາດຖານ ຈຳນວນ 81 ສະຫາຍ, ຍິງ 43 ສະຫາຍ ໂດຍສະເພາະແມ່ນຜູ້ທີ່ມີ ຜົນງານດີເດັ່ນໃນການປະກອບ ສ່ວນປະຕິບັດໜ້າທີ່ວຽກງານທີ່ ການຈັດຕັ້ງພັກ-ລັດຂັ້ນເທິງມອບໝາຍໃຫ້ຢ່າງມີຜົນສໍາເລັດ.

 ຕອນທ້າຍຍັງໄດ້ຮັບຟັງການ ໂອ້ລົມຈາກສະຫາຍ ພອນເພັດ ຄິວລະວົງ, ຊຶ່ງໄດ້ເນັ້ນໜັກໃຫ້ບັນດາ ສະມາຊິກພັກ, ພາຍໃນໜ່ວຍດັ່ງ ກ່າວຈົ່ງສືບຕໍ່ສຸມໃສ່ປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ໂດຍຖືເອົາວຽກງານສຶກສາອົບຮົມການເມືອງ-ແນວຄິດ, ເຕົ້າໂຮມຄວາມສາມັກຄີ ຂອງສະມາຊິກພັກ-ພະນັກງານ, ດ້ວຍການຕໍານິສົ່ງຂ່າວພາຍໃນພັກ ແລະຊ່ວຍເຫຼືອເຊິ່ງກັນ ແລະກັນ, ປັບປຸງແບບແຜນວິທີເຮັດວຽກ, ເອົາໃຈໃສ່ຊີ້ນໍາໆພາ, ເພື່ອພ້ອມກັນ ປະຕິບັດໜ້າທີ່ວຽກງານໃຫ້ໄດ້ຮັບຜົນສໍາເລັດຢ່າງໃຫຍ່ຫຼວງກວ່າເກົ່າ.

--------

ໜັງສືພິມເສດຖະກິດ-ສັງຄົມ

แชร์