ອັດຕະປື ເຄັ່ງຄັດເຝົ້າລະວັງ ແລະປ້ອງກັນພະຍາດໂຄວິດ-19

  ເພື່ອປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ທີ່ກຳລັງມີການລະບາດຂະຫຍາຍ ແລະມີຜົນກະທົບເປັນວົງກວ້າງຕໍ່ເສດຖະກິດ-ສັງຄົມໃນທົ່ວໂລກນັ້ນໃນປະຈຸບັນແຂວງອັດຕະປືເຖິງຈະແມ່ນວ່າພະຍາດນີ້ບໍ່ທັນເກີດຂຶ້ນເທື່ອຍ້ອນເຈົ້າໜ້າທີ່ກ່ຽວຂ້ອງໄດ້ວາງມາດຕາການກວດກາກັນກອງຢ່າງເຄັ່ງຄັດຢູ່ຕາມຈຸດດ່ານຊາຍແດນ ແລະເປົ້າໝາຍຫຼໍ່ເເຫຼມຕ່າງໆແຕ່ໃນອະນາຄົດຖ້າບໍ່ພ້ອມກັນເອົາໃຈໃສ່ຕອບໂຕ້ແຕ່ຫົວທີ ຫຼືເຝົ້າລະວັງໃຫ້ເຄັ່ງຄັດຂຶ້ນນັ້ນກໍ່ເປັນເຫດອາດເຮັດໃຫ້ສັງຄົມໃນທ້ອງຖິ່ນຕົກເປັນເຍື່ອຕໍ່ການຕິດເຊື້ອພະຍາດດັ່ງກ່າວນີ້ໄດ້ຢ່າງບໍ່ຕ້ອງສົງໄສເພາະວ່າ ແຂວງອັດຕະປື ນອກຈາກເປັນຈຸດຄົບຄ້າພົວພັນດ້ານເສດຖະກິດ-ສັງຄົມ ແລະການທ່ອງທ່ຽວແລ້ວຍັງມີຊາຍແດນຕິດກັບປະເທດເພື່ອນບ້ານໃກ້ຄຽງທີ່ມີກໍລະນີ້ອາການຕິດເຊື້ອຕາມນິຍາມນັ້ນຫຼາຍຢູ່.

  ທ່ານ ນາງ ອອນຜິວ ໂພທິລາດ ຫົວໜ້າພະແນກສາທາລະນະສຸກແຂວງອັດຕະປື ເປີດເຜີຍວ່າ: ເລີ່ມແຕ່ທ້າຍເດືອນມັງກອນມາຮອດປະຈຸບັນໃຕ້ການຊີ້ນຳຢ່າງໃກ້ຊິດຈາກກະຊວງສາທາລະນະສຸກ ແລະອຳນາດການປົກຄອງແຂວງກໍ່ໄດ້ມີຄະນະກຳມະການຄວບຄຸມພະຍາດຕິດຕໍ່ຂັ້ນແຂວງປຶກສາຫາລືວາງມາດຕາການຢ່າງເຄັ່ງຂັດ,ເອົາໃຈໃສ່ຜັນຂະຫຍາຍບັນດາມະຕິ, ຄຳສັ່ງຂອງຂັ້ນເທິງກ່ຽວກັບການປ້ອງກັນ ແລະ ສະກັດກັ້ນໃນທົ່ວແຂວງອັດຕະປື, ໄດ້ພ້ອມກັນຈັດຕັ້ງພະນັກງານແພດໝໍໄປປະຈຳ ການ ແລະຕັ້ງຈຸດກັນກອງຄົນເຂົ້າອອກເມືອງສົມທົບກັບເຈົ້າໜ້າທີ່ຢູ່ຊາຍແດນດ່ານສາກົນພູເກືອໂດຍມີການລາຍງານສະພາບທຸກໆວັນ, ໃຫ້ສຸຂະສຶກສາຄວາມຮູ້ກ່ຽວກັບການປ້ອງກັນພະຍາດໃນແຕ່ລະເມືອງ, ເຂດຊຸມຊົນໄພພິບັດເມືອງສະໝາມໄຊ ແລະໃນງານຕ່າງໆ, ໄດ້ຕິດປ້າຍໂປຼເຕີໃນຈຸດຊຸມຊົນ,ຕະຫຼາດ,ຄີວລົດ,ໂຮງຮຽນ,ໂຮງໝໍ, ສຳນັກງານປົກຄອງແຂວງ ແລະຈຸດອື່ນໆ.

ສະໜັບສະໜູນໂດຍ: HONDA

  ແນວໃດກໍ່ດີຕໍ່ກັບການປ້ອງກັນການຕິດເຊື້ອດັ່ງນີ້ຂໍຮຽກຮ້ອງມາຍັງບັນດາພາກລັດ-ເອກະຊົນ, ນັກທຸລະກິດ ແລະປະຊາຊົນບັນດາເຜົ່າທຸກຊັ້ນຄົນຈົ່ງໃຫ້ເປັນເຈົ້າການໃນການປະຕິບັດການປ້ອງກັນພະຍາດເປັນຕົ້ນຕໍ່ ແລະຖືການປິ່ນປົວພະຍາດເປັນບັນຫາສຳຄັນຕໍ່ການດຳລົງຊີວິດທີ່ດີຂອງທ່ານໂດຍປະຕິບັດຕາມຫຼັກຢ່າງລະອຽດຕາມແພດໝໍໄດ້ຊີ້ນຳທຸກຄັ້ງສິ່ງສຳຄັນຖ້າມີອາການໄຂ ຫຼືຫັນໃຈຍາກ, ເຈັບຄໍ, ໄອຕ້ອງການໄປເບິ່ງແຍງບຸກຄົນທີ່ມີອາການສະແດງອອກດັ່ງກ່າວນັ້ນຄວນໃສ່ຜ້າອັດປາກ-ດັງໃຫ້ຖືກຕ້ອງກັບວິທີທີ່ໄດ້ແນະນຳ ແລະ ຕ້ອງໃຫ້ຖິ້ມລົງໃສ່ຖັງຂີ້ເຫຍື້ອເທົ່ານັ້ນ, ຖ້າມີອາການເຈັບເປັນແຮງໃຫ້ໄປປິ່ນປົວຢູ່ໂຮງໝໍຕາມເງື່ອນໄຂ ແລະ ຫ້າມບໍ່ໃຫ້ຊື້ຢາກິນເອງ.

แชร์