ທນບ ໜ່ວຍບໍລິການ ນາກາຍສະໜອງສິນເຊື່ອເຂົ້າໃນການລ້ຽງສັດ

  ທ່ານ ນາງ ແຄນທະນູ ຈັນເພັງ ຫົວໜ້າທະນາຄານນະໂຍບາຍ (ທນບ) ໜ່ວຍບໍລິການເມືອງນາກາຍ ແຂວງຄໍາມ່ວນ ໄດ້ໃຫ້ການສຳພາດວ່າ: ໃນປີ 2019 ຜ່ານມາເບື້ອງຊັບສິນ, ໜີ້ສິນ-ທຶນໃນທ້າຍເດືອນທັນວາ 2019 ມີ4,52 ຕື້ກີບ ທຽບໃສ່ທ້າຍປີ2018 ຫຼຸດລົງ 1,16%; ເງິນສົດທ້າຍເດືອນທັນວາ ແລະ ລາຍຮັບໃນ ການດໍາເນີນທຸລະກິດ 12 ເດືອນ ຂອງປີ 2019 ມີລາຍຮັບຈໍານວນໜຶ່ງ ແລະ ໄດ້ສະໜອງສິນເຊື່ອໄລຍະສັ້ນເຂົ້າໃນເປົ້າໝາຍລ້ຽງໝູ 130 ລ້ານກີບ, ມີ 1ບ້ານ, 1 ກຸ່ມ,ມີ 6 ຄອບຄົວ ແລະສະເໜີທຶນເພີ່ມເປົ້າໝາຍລ້ຽງງົວຈໍານວນ 6 ຄອບຄົວ, ວົງເງິນ 330 ລ້ານກີບ, ລວມທັງໝົດ 11 ຄອບຄົວ, 2 ກຸ່ມ, ຈໍານວນ 460 ລ້ານກີບ (ໃນນີ້ມີລາຍບຸກຄົນ1 ລາຍ, ວົງເງິນ 200 ລ້ານກີບ);ເກັບຕົ້ນທຶນໃນປີ 2019 ໄດ້ 581,12 ລ້ານກີບ ທຽບໃສ່ແຜນເກັບຕົ້ນທຶນໃນປີ 2019 ຄືທຽບໃສ່ແຜນທຸລະກິດໝົດປີ 2019 ເທົ່າກັບ 17,50% (3,32 ຕື້ກວ່າກີບ) ທຽບໃສ່ແຜນຄາດໝາຍສູ້ຊົນປີ 2019 ເທົ່າກັບ 30,97% 1,87 ຕື້ກີບ); ທຽບໃສ່ແຜນເກັບສະບັບປັບປຸງໝົດປີ 2019 ເທົ່າກັບ 31,41% (1,85 ຕື້ກວ່າກີບ).

  ຍອດເງິນກູ້ທັງໝົດໃນທ້າຍເດືອນທັນວາ 2019 ເທົ່າກັບ 7,33 ຕື້ກີບ ກວມເອົາ 1 ແຂວງ, 1 ເມືອງ, 3 ກຸ່ມບ້ານ, 9 ບ້ານເທົ່າກັບ 29,03% ຂອງຈຳນວນ ບ້ານທັງໝົດພາຍໃນເມືອງ, ມີບ້ານທຸກຍາກຈໍານວນ 2 ບ້ານ, ມີສິນເຊື່ອເຂົ້າເຖິງຈຳນວນ126 ກຸ່ມ, 714 ຄອບຄົວ, ກວມອັດຕາສ່ວນ 11,87% ຂອງຄອບຄົວທັງໝົດພາຍໃນເມືອງຈຳນວນ 6.012 ຄອບຄົວ,ໃນນັ້ນມີລາຍບຸກຄົນຈຳນວນ 6 ລາຍ, ຍອດເຫຼືອ 831 ລ້ານກີບ ເທົ່າກັບ 11,33% ຂອງຍອດສິນເຊື່ອທັງໝົດ, ສຳລັບລູກຄ້າທີ່ຊໍາລະສູນ (0) ແມ່ນມີ 46 ບັນຊີເກັບຕົ້ນທຶນ 191,79 ລ້ານກີບ.

  ທ່ານຫົວໜ້າ ທນບ ໜ່ວຍບໍລິການ ເມືອງນາກາຍ ຍັງຊີ້ໃຫ້ເຫັນຂໍ້ຄົງຄ້າງຈໍານວນໜຶ່ງໃນນີ້ໄດ້ສົມທົບກັບຫ້ອງການປະສານງານໄກ່ເກ່ຍໜີ້ສິນທີ່ຕິດພັບກັບຜູ້ກູ້ເງິນ 1 ລາຍ ແລະໄດ້ເຮັດງານລາຍຂໍທິດຊີ້ນໍາຈາກຄະນະ ທນບ ສາຂາສະຫວັນນະເຂດ, ແກ້ໄຂໜີ້ກາຍສັນຍາ, ປາກົດການຫຍໍ້ທໍ້ເອົາເງິນກູ້ແທນກັນໃນເປົ້າໝາຍປູກຢາສູບທີ່ຕິດພັນກັບ 1 ບຸກຄົນ, ໃນໄລຍະຜ່ານມາໜ່ວຍບໍລິການສົມທົບກັບຄະນະສາຂາ ແລະຫົວໜ້າຫ້ອງການປະສານງານ ແຂວງຄຳມ່ວນ, ອຳນາດການປົກຄອງ ແລະຄະ ນະກໍາມະການຄຸ້ມຄອງສິນເຊື່ອແຕ່ລະຂັ້ນເຮັດບົດບັນທຶກການຊຳລະໜີ້ນຳຜູ້ທີ່ຕິດພັນການເອົາເງິນກູ້ແທນກັນໂດຍຫັນເອົາຫຼັກຊັບເຂົ້າມາຄໍ້າປະກັນໃນການຊຳລະໜີ້, ນັດໝາຍກໍານົດເວລາການຊຳລະໜີ້ຢ່າງຈະແຈ້ງ ແລະຫັນເຂົ້າສູ່ການນໍາໃຊ້ມາດຕະການຕໍ່ຜູ້ກ່ຽວ.

  ສໍາລັບວິທີແກ້ໄຂໃນຕໍ່ໜ້າແມ່ນສືບຕໍ່ເພີ່ມທະວີຄວາມເປັນເຈົ້າການໃນການສຶກສາອົບຮົມທາງດ້ານເມືອງແນວຄິດຂອງພະນັກງານພາຍໃນໜ່ວຍ, ຍົກສູງຄວາມຮັບຜິດ ຊອບໃນການປະຕິບັດວຽກງານຕາມໜ້າທີ່ຮັບຜິດຊອບຂອງຕົນ,ສືບຕໍ່ໃນການຕິດຕາມຕາມບົດບັນທຶກທີ່ໄດ້ລົງເຮັດໄວ້ໃນຊ່ວງເຄື່ອນໄຫວກວດກາປະເມີນໜີ້ສິນຂອງຍອດທ້າຍປີ 2018, ເພີ່ມທະວີຕິດຕາມກວດກາວຽກງານສິນເຊື່ອແຕ່ລະເປົ້າໝາຍໃຫ້ປົກກະຕິຕໍ່ເນື່ອງ, ເອົາໃຈໃສ່ການສົມທົບປະສານງານກັບອຳນາດການປົກຄອງ ແລະຄະນະກຳມະການຄຸ້ມຄອງສິນເຊື່ອແຕ່ລະຂັ້ນໃຫ້ມີຄວາມໜັກແໜ້ນເພື່ອສະດວກໃນການແກ້ໄຂບັນຫາວຽກງານຕ່າງໆ ແລະ ຂໍທິດຊີ້ນໍາຈາກສາຂາ ແລະ ຄະນະກຳມະ ການຄຸ້ມຄອງສິນເຊື່ອຂັ້ນເມືອງໃນການຈັດຕັ້ງປະຕິບັດໄກ່ເກ່ຍໜີ້ສິນໂດຍສະເພາະໜີ້ກາຍສັນຍາ.

ສະໜັບສະໜູນໂດຍ: HONDA

  ທິດທາງແຜນການປີ 2020 ໃນຕໍ່ໜ້າສືບຕໍ່ສະຫຼຸບສັງລວມລາຍງານຊັບສົມບັດ ແລະລາຍງານຕ່າງໆໃຫ້ສາຂາເປັນປົກກະຕິ, ສະຫຼຸບສັງລວມບັນຊີທົ່ວໜ່ວຍບໍລິການເພື່ອລາຍງານໃຫ້ກັບສາຂາໂດຍສະເພາະການປິດບັນຊີປະຈຳວັນ, ປະຈຳເດືອນ, ປະຈຳງວດໃຫ້ກັບສາຂາ, ສັງລວມຂໍ້ມູນຕາມການສະເໜີຂອງປະຊາຊົນເພື່ອສ້າງແຜນທຸລະກິດປະຈຳປີ 2020, ກະກຽມປ່ອຍເງິນກູ້ຕາມແຜນສິນເຊື່ອທີ່ກຳນົດໄວ້ໃນປີ 2020 ສືບຕໍ່ໃນການເຄື່ອນໄຫວເອົາຂໍ້ມູນສິນເຊື່ອຢູ່ເມືອງຄູນຄຳພ້ອມທັງກະກຽມ ປ່ອຍສິນເຊື່ອໃນປີ 2020, ສັງລວມແຜນທຸລະກິດປະຈຳປີ 2020, ສືບຕໍ່ປະ ຕິບັດລົງເຄື່ອນໄຫວຕິດຕາມເລັ່ງທວງຕາມການນັດໝາຍຂອງລູກຄ້າທີ່ເຮັດບົດບັນທຶກໄວ້ໃນການລົງກວດກາໜີ້ NPL ປີ 2018, ສືບຕໍ່ຕິດຕາມ,ແກ້ໄຂປາກົດການຫຍໍ້ທໍ້ຕ່າງໆທີ່ຍັງຄ້າງບໍ່ ແລະລົງເຄື່ອນໄຫວເກັບກໍ້າຂໍ້ມູນຢ່າງລະອຽດກ່ຽວກັບອັນທີ່ເກີດຂຶ້ນໃໝ່ເພື່ອລາຍງານໃຫ້ຫົວໜ້າສາຂາ, ສືບຕໍ່ສ້າງແຜນລົງທວງໜີ້ທີ່ກາຍສັນຍາພ້ອມທັງໄກ່ເກ່ຍໜີ້ສິນທີ່ມີບັນຫາທັງລາຍກຸ່ມ ແລະ ລາຍບຸກຄົນໃຫ້ໄດ້ຕາມຄາດໝາຍສູ້ຊົນໂດຍອີງໃສ່ຄູ່ມືແນະນຳກ່ຽວກັບການເກັບກູ້ໜີ້ສິນທີ່ມີບັນຫາເລກທີ 806/ທນບ.  

-------------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์