6 ໜ່ວຍພັກສາຂາທະນາຄານ ຈຳປາສັກເປັນໜ່ວຍພັກປອດໃສເຂັ້ມແຂງໜັກແໜ້ນ

   6 ໜ່ວຍພັກທີ່ຂຶ້ນກັບຄະນະພັກຮາກຖານສາຂາທະນາຄານ ແຂວງຈໍາປາສັກ ປະກອບມີໜ່ວຍພັກທະນາຄານ ແຫ່ງສປປ ລາວ (ທຫລ) ພາກໃຕ້, ທະນາຄານສົ່ງ ເສີມກະສິກຳ,ທະນາຄານພັດທະນາລາວ,ທະນາຄານການຄ້າຕ່າງປະເທດລາວມະຫາຊົນ,ທະນາຄານນະໂຍບາຍ ແລະໜ່ວຍພັກທະນາຄານຮ່ວມທຸລະກິດລາວ-ຫວຽດ ໄດ້ຮັບໃບຢັ້ງຢືນໜ່ວຍພັກປອດໃສເຂັ້ມແຂງໜັກແໜ້ນປະຈໍາປີ 2019 ຊຶ່ງຈັດຂຶ້ນ

 ໃນວັນທີ 13 ມີນາ 2020 ທີ່ຫ້ອງປະຊຸມ ທຫລ ພາກໃຕ້ແຂວງຈໍາປາສັກໂດຍການໃຫ້ກຽດມອບຂອງສະຫາຍ ບົວສອນ ວົງສອງຄອນ ກໍາມະການປະຈຳພັກແຂວງ, ຮອງເຈົ້າແຂວງຈຳປາສັກ, ສະຫາຍ ນວນຕາ ແກ້ວມະນີ ເລຂາຄະນະພັກຮາກຖານສາຂາທະນາຄານແຂວງຈໍາປາສັກ, ວ່າການຫົວໜ້າ ທຫລ ພາກໃຕ້ແຂວງຈໍາປາ ສັກ, ພ້ອມນີ້, ກໍ່ມີຄະນະຈັດຕັ້ງແຂວງຈໍາປາສັກ, ຄະນະໜ່ວຍພັກ 6 ໜ່ວຍ ແລະພາກສ່ວນກ່ຽວຂ້ອງເຂົ້າຮ່ວມ.

   ປະຕິບັດຕາມແຜນການກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນປະຈຳປີ 2019 ຂອງບັນດາໜ່ວຍພັກກໍ່ຄືປະຕິບັດຕາມຄຳສັ່ງແນະນຳຂອງຄະນະປະຈຳພັກແຂວງ ເລກທີ 03/ຄຈພຂ.ຈສ ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນ, ຄະນະພັກຮາກຖານສາຂາທະນາຄານໄດ້ເພີ່ມທະວີຊຸກຍູ້ຊີ້ນຳໆພາວຽກງານກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນຢູ່ແຕ່ລະໜ່ວຍພັກດ້ວຍຄວາມເອົາໃຈໃສ່,ບັນດາໜ່ວຍພັກ,ສະມາຊິກພັກ-ພະນັກງານໄດ້ເປັນເຈົ້າການຈັດຕັ້ງປະຕິບັດຢ່າງເຂັ້ມງວດ, ໄດ້ເຊື່ອມຊືມແນວທາງນະໂຍບາຍ, ມະຕິ-ຄຳສັ່ງ, ກົດລະບຽບຂອງພັກ, ກົດໝາຍຂອງລັດ ແລະ ຈັດຕັ້ງເຊື່ອມຊືມເອກະສານ-ປາຖະກະຖາວັນ ສໍາຄັນຕ່າງໆຂອງພັກ,ຂອງຊາດເປັນປົກກະຕິ, ພ້ອມນັ້ນຍັງຮັກສາໄດ້ຄວາມສາມັກຄີເປັນເອກະພາບພາຍໃນພັກ ແລະຕອບຕ້ານສິ່ງຫຍໍ້ທໍ້ທີ່ເກີດຂຶ້ນຢູ່ພາຍໃນພັກ, ຕ້ານແນວຄິດສວຍໂອກາດ, ສວຍໃຊ້ໜ້າທີ່ຕຳແໜ່ງ, ພະຍາດອາຍາສິດ, ເອກະຊົນ, ສໍ້ລາດບັງຫຼວງ, ຕ້ານແນວຄິດຫຼາຍກຸ່ມກ້ອນ.

  ຜ່ານການກໍ່ສ້າງ ແລະປັບປຸງການຈັດຕັ້ງພັກ-ລັດແມ່ນຮັບປະກັນໃຫ້ມີການຊີ້ນຳໆພາຂອງພັກໃນທຸກຂົງເຂດວຽກງານ, ປະຕິບັດລະບອບຕິດຕາມກວດກາ, ດຳເນີນຊີວິດການເມືອງປະຊຸມສ່ອງແສງພາຍໃນພັກ ແລະຕີລາຄາຄຸນນະພາບຂອງສະມາຊິກພັກ, ໜ່ວຍ ພັກເປັນປົກກະຕິຊຶ່ງຜ່ານມາສາມາດຕີລາຄາແບ່ງປະເພດສະມາຊິກພັກຢູ່ແຕ່ ລະໜ່ວຍພັກເພດແຂງກວມເອົາ 95% ຂອງສະມາຊິກພັກທັງໝົດ ແລະຈັດປະເພດໜ່ວຍພັກໄດ້ປະເພດແຂງທັງໝົດ 6 ໜ່ວຍພັກ; ກໍ່ສ້າງມະຫາຊົນກ້າວໜ້າ ຂະຫຍາຍເຂົ້າເປັນສະມາຊິກພັກໄດ້ 14 ສະຫາຍ, ຍິງ 7 ສະຫາຍ, ຄຽງຄູ່ກັນນັ້ນກໍ່ໄດ້ເອົາໃຈໃສ່ສັບຊ້ອນໝູນວຽນພະນັກງານຕາມຄວາມຮູ້ຄວາມສາມາດ ເຮັດໃຫ້ວຽກງານມີຄວາມຄ່ອງຕົວມີປະສິດທິພາບ,ປະສິດທິຜົນສູງ ແລະຈັດຕັ້ງຕີລາຄາຈັດປະເພດພະນັກງານຢ່າງຕໍ່ເນື່ອງໃນທຸກປີ, ປະຈຸບັນພະນັກງານ-ລັດຖະກອນສົມບູນໃນ 6 ໜ່ວຍພັກມີທັງໝົດ 295 ຄົນ; ຍິງ143 ຄົນ, ໄດ້ຕີລາຄາຈັດປະເພດພະນັກງານປະເພດດີຫຼາຍກວມ 38%, ປະເພດດີກວມ 53%, ປະເພດກາງ 9%, ປະເພດອ່ອນບໍ່ມີ.

  ພ້ອມນີ້ຍັງໄດ້ນຳພາໃນການສະໜອງສິນເຊື່ອສະໜັບສະໜູນພັດທະນາເສດຖະກິດ-ສັງຄົມຂອງທ້ອງຖິ່ນຢ່າງຕັ້ງໜ້າ, ຊຸກຍູ້ຊ່ວຍເຫຼືອບັນດາສະຖາບັນການເງິນຈຸລະພາກ ແລະທະນາຄານບ້ານໃຫ້ມີຄວາມເຂັ້ມແຂງດ້ານການຄຸ້ມຄອງແລະວິຊາການ, ພັດທະນາລະບົບທະນາຄານໃຫ້ມີຄວາມທັນສະໄໝຢ່າງຕໍ່ເນື່ອງ ແລະຮັບປະກັນສະຖຽນລະພາບທາງດ້ານເງິນຕາຢູ່ທ້ອງຖິ່ນມີຄວາມໝັ້ນຄົງ; ຊີ້ນຳໆພາ ແລະ ອຳນວຍຄວາມສະດວກໃຫ້ແກ່ບັນດາອົງການຈັດຕັ້ງມະຫາຊົນເຄື່ອນໄຫວຕາມພາລະບົດ ບາດ ແລະໜ້າທີ່ຂອງຕົນ, ໃຫ້ມີການຮ່ວມຊີວິດການເມືອງສຳຫຼວດກວດກາເປັນປົກກະຕິ, ສ້າງກິດຈະກຳເຄື່ອນໄຫວໂດຍຕິດພັນກັບວຽກງານວິຊາສະເພາະ, ຊຸກຍູ້ ການຈັດຕັ້ງປະຕິບັດຫົວຂໍ້ແຂ່ງຂັນຂອງແຕ່ລະອົງການຈັດຕັ້ງ ແລະສາມາດຕີລາຄາປະເມີນຜົນກຳມະບານຮາກຖານ 5 ເປັນເຈົ້າ, ໜ່ວຍຊາວໜຸ່ມ 4 ບຸກ ແລະ ແມ່ຍິງ 3 ດີ ໄດ້ຮັບໃບຢັ້ງຢືນຄົບທຸກຮາກຖານ ແລະໜ່ວຍ.

ສະໜັບສະໜູນໂດຍ: HONDA

 ບັນດາຄະນະໜ່ວຍພັກຍັງເອົາໃຈໃສ່ນຳພາວຽກງານປ້ອງກັນຄວາມສະຫງົບໂດຍມີກຳລັງເຈົ້າໜ້າທີ່ຕຳຫຼວດປະຈໍາການຢູ່ສຳນັກງານ, ພະນັກງານບໍລິສັດຮັກສາຄວາມປອດໄພຕະຫຼອດ 24 ຊົ່ວໂມງ, ຈັດຕັ້ງຄະນະປ້ອງກັນ ແລະກວດກາພາຍໃນຂອງຕົນ, ຈັດຕັ້ງພະນັກງານເວນຍາມສັບປ່ຽນໝູນວຽນທຸກວັນ ແລະເວນຍາມໃນວັນສຳ ຄັນຂອງຊາດ, ຂອງພັກ, ວັນບຸນປະເພນີ; ຕິດຕັ້ງລະບົບກ້ອງວົງຈອນປິດພາຍໃນ-ພາຍນອກອາຄານ ແລະກວດກາເຄື່ອງປ້ອງກັນອັກຄີໄພໃຫ້ຢູ່ໃນສະພາບການໃຊ້ງານໄດ້ຕະຫຼອດເວລາ, ຜ່ານການຈັດຕັ້ງປະຕິບັດເຫັນວ່າ: ທະນາຄານມີຄວາມສະຫງົບປອດໄພດີ.

  ເພື່ອເຮັດໃຫ້ວຽກງານການກໍ່ສ້າງໜວ່ຍພັກປອດໃສເຂັ້ມແຂງໜັກແໜ້ນໄດ້ຮັບການຈັດຕັ້ງປະຕິບັດຢ່າງຖືກຕ້ອງຊັດເຈນ, ມີເນື້ອໃນໜັກແໜ້ນຄົບຖ້ວນ, ມີປະສິດທິຜົນ,ຖືກຕ້ອງຕາມຂັ້ນຕອນ ແລະທັນກັບກຳນົດເວລາພ້ອມທັງສອດຄ່ອງກັບຄຳແນະນຳຂອງຄະນະຈັດຕັ້ງສູນກາງພັກ ແລະຄຳສັ່ງແນະນຳຂອງຄະນະປະຈຳພັກແຂວງ, ໃນຕໍ່ໜ້າຈຶ່ງສະເໜີມາຍັງຄະນະພັກຂັ້ນເທີງກໍ່ຄືຄະນະຮັບຜິດຊອບກໍ່ສ້າງໜ່ວຍພັກປອດໃສເຂັ້ມແຂງໜັກແໜ້ນໃຫ້ການຊີ້ນຳ ແລະ ຕິດຕາມຢ່າງໃກ້ສິດທັງເປັນການແລກປ່ຽນ ແລະຖອດຖອນບົດຮຽນໃຫ້ແກ່ຄະນະພັກຮາກຖານກໍ່ຄືບັນດາໜ່ວຍພັກຮາກຖານຕ່າງໆ ເພື່ອສືບຕໍ່ຮັກສາມູນເຊື້ອອັນດີງາມ ແລະຜົນງານອັນໂດດເດັ່ນໃນການປະເມີນຄັ້ງຕໍ່ໄປ.

_______________

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์