ນາຍົກ ແນະນຳໃຫ້ປິດຊົ່ວຄາວໂຮງຮຽນລ້ຽງເດັກ ແລະອະນຸບານ ເພື່ອຕ້ານໂຄວິດ-19

  ວັນທີ 16 ມີນາ 2020 ນີ້ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະໄດ້ລົງເຄື່ອນໄຫວຕິດຕາມການເຝົ້າລະວັງ, ປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໄວຣັດໂຄວິດ-19 ຢູ່ດ່ານສາກົນຂົວມິດຕະພາບລາວ-ໄທ 1, ສະໜາມບິນສາກົນວັດໄຕ, ໂຮງໝໍສູນກາງ 103 ແລະໂຮງໝໍມິດຕະພາບ 150 ຕຽງນະຄອນຫຼວງວຽງຈັນ.

 ໃນການລົງເຄື່ອນໄຫວເຮັດວຽກໃນຄັ້ງນີ້,ທ່ານ ທອງລຸນ ສີສຸລິດ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດມາດຕະການຕ້ານ ແລະຄວບຄຸມການແຜ່ລະບາດຂອງເຊື້ອໄວຣັດໂຄວິດ-19 ຈາກພາກສ່ວນທີ່ກ່ຽວຂ້ອງຈາກນັ້ນ, ທ່ານນາຍົກລັດຖະມົນຕີກໍ່ໄດ້ຖະແຫຼ່ງຂ່າວຕໍ່ສື່ມວນຊົນໂດຍທ່ານໄດ້ຢືນຢັນວ່າປະຈຸ ບັນ ສປປ ລາວ ໄດ້ມີຄວາມພ້ອມໃນທຸກດ້ານເພື່ອຮອງຮັບການລະບາດຂອງພະຍາດນີ້ທີ່ອາດຈະແຜ່ລະບາດຢູ່ ສປປ ລາວ ເປັນຕົ້ນໄດ້ມີຄວາມພ້ອມທາງດ້ານບຸກຄະລາກອນ, ອຸປະກອນທາງການແພດ, ສະຖານທີ່ຮອງຮັບຄົນເຈັບໂດຍໄດ້ກຳນົດເອົາໂຮງໝໍມິດຕະພາບ150 ຕຽງ ແລະໂຮງໝໍສູນກາງ 103 ເປັນສູນການປິ່ນປົວຊຶ່ງໂຮງ ໝໍດັ່ງກ່າວ, ກໍມີຄວາມພ້ອມທາງດ້ານອຸປະກອນທີ່ທັນສະໄໝ, ຫ້ອງປິ່ນປົວ ແລະອື່ນໆ.

  ພ້ອມນັ້ນທ່ານນາຍົກລັດຖະມົນຕີຍັງໄດ້ຮຽກຮ້ອງໃຫ້ພາກສ່ວນທີ່ກ່ຽວຂ້ອງໂດຍສະເພາະຢູ່ບັນດາດ່ານເຂົ້າ-ອອກ ເມືອງຕ່າງໆໃຫ້ເພີ່ມທະວີເອົາໃຈໃສ່ກວດຄົນເຂົ້າ-ອອກເມືອງຢ່າງເຄັ່ງຄັດພ້ອມທັງ, ໃຫ້ປະຊາຊົນລາວບັນດາເຜົ່າເປັນເຈົ້າການເຝົ້າລະວັງ ແລະຈັດຕັ້ງປະຕິບັດຕາມບັນດາມາດຕະການທີ່ລັດຖະບານວາງອອກ ແລະຕິດຕາມຂ່າວກ່ຽວກັບການແຜ່ລະບາດຂອງພະຍາດນີ້ເປັນປະຈຳ, ເພື່ອສະກັດກັ້ນປ້ອງກັນພະຍາດນີ້ບໍ່ໃຫ້ແຜ່ລະບາດໃນ ສປປ ລາວ ລັດຖະບານໄດ້ອອກມາດຕະການຕ່າງໆເພື່ອປ້ອງກັນເປັນຕົ້ນໄດ້ສັ່ງໂຈະການໂຮມຊຸມນຸມຕ່າງໆ, ໂຈະການສະຫຼອງວັນສຳຄັນຂອງຊາດ, ໂຈະການແຂ່ງຂັນກີລາຊຽງຂວາງເກມ,ງານດອງ, ງານສ້າງສັນ ອື່ນໆ ນອກນັ້ນຍັງໄດ້ແນະນຳຄະນະສະເພາະກິດຫາລືກັບກະຊວງສຶກສາເພື່ອໂຈະການຮຽນ-ການສອນໂຮງຮຽນລ້ຽງເດັກ ແລະ ໂຮງຮຽນອະນຸບານໃນຂອບເຂດທົ່ວປະ ເທດນັບແຕ່ວັນທີ 17 ມີນາເປັນຕົ້ນໄປຫຼັງປີໃໝ່ລາວຈຶ່ງຄ່ອຍມາຫາລືກັນໃໝ່.

  ໂອກາດດຽວກັນທ່ານ ພັອ ຄຳພອນ ເທບພະວົງ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບລາວ-ໄທ 1 ລາຍງານໃຫ້ຮູ້ວ່າ: ດ່ານສາກົນຂົວມິດຕະພາບລາວ-ໄທ 1 ໄດ້ສົມທົບກັບກະຊວງສາທາລະນະສຸກຕັ້ງຈຸດກວດກາຢູ່ 4 ຈຸດເພື່ອກວດຜູ້ສົງໄສ ແລະວັດແທກອຸນຫະພູມຂອງຜູ້ເຂົ້າ-ອອກ ເມືອງທຸກຄົນ, ແນະນຳການລ້າງມື, ອອກໃບຢັ້ງຢືນ(ຈີກເປັນຄືປີ້) ໃຫ້ຜູ້ທີ່ໄດ້ຜ່ານການກວດການທາງແພດໃນກໍລະນີບໍ່ມີການຢັ້ງຢືຈາກ ການແພດຈະບໍ່ໃຫ້ເຂົ້າ-ອອກເມືອງເດັດຂາດໂດຍແນະນຳໃຫ້ຜູ້ກ່ຽວໄປກວດກາທາງການແພດກ່ອນພ້ອມທັງ, ໂຄສະນາເຜີຍແຜ່ການປ້ອງກັນພະຍາດນີ້ໃຫ້ພະນັກງານ, ຜູ້ປະກອບການ, ຜູ້ເຂົ້າອອກດ່ານຮັບຮູ້ ແລະເຂົ້າໃຈກ່ຽວກັບພະຍາດດັ່ງກ່າວ.

 

แชร์