ບຶງວະສະຖານທີ່ທຳມະຊາດທີ່ສວຍງາມ

  ແຂວງສະຫວັນນະເຂດ ມີສະຖານທີ່ທ່ອງທ່ຽວທີ່ໜ້າສົນໃຈຫຼາຍແຫ່ງໂດຍສະເພາະແມ່ນສະຖານທີ່ທ່ອງທ່ຽວທາງທໍາມະຊາດທີ່ສວຍສົດງົດງາມຢ່າງຫຼວງຫຼາຍ, ສໍາລັບສະຖານທີ່ທ່ອງທ່ຽວໃນຮູບແບບຂອງການພັກຜ່ອນນີ້ຊຶ່ງເໝາະກັບການພາຄົນຮັກ ຫຼື ຄອບຄົວໄປຫຼິ້ນທ່ຽວເພື່ອຜ່ອນຄາຍສະຖານທີ່ດັ່ງກ່າວມີຄວາມສວຍງາມປະ ກອບກັບບັນຍາກາດທີ່ສົດຊື່ນຕິດແຄມນໍ້າເຮັດໃຫ້ສະຖານທີ່ທ່ອງທ່ຽວໃນເຂດດັ່ງກ່າວໜ້າຫຼົງໄຫຼ ແລະກໍາລັງເປັນທີ່ສົນໃຈຂອງນັກທ່ອງທ່ຽວພາຍໃນ, ຖ້າຫາກໃນວັນພັກຜ່ອນໃຜທີ່ຍັງບໍ່ທັນມີແຜນໄປທ່ຽວທາງໃດ ຫຼືຖ້າຫາກໄດ້ໄປນະຄອນໄກສອນພົມວິຫານ ແຂວງສະຫວັນນະເຂດ ພວກເຮົາຂໍແນະນໍາສະຖານທີ່ພັກຜ່ອນແຫ່ງໃໝ່ນັ້ນກໍຄື: “ບຶງວະ”.

  ບຶງວະເປັນແຫຼ່ງທ່ອງທ່ຽວທຳມະຊາດທີ່ສວຍງາມ ແລະເປັນໜອງຂະໜາດໃຫ່ຍທີ່ມີທີວທັດທຳມະຊາດທີ່ສວຍສົດງົດງາມ, ອາກາດສົດຊື່ນເຢັນສະບາຍຕັ້ງຢູ່ບ້ານບຶງ ວະນະຄອນໄກສອນພົມວິຫານ ແຂວງສະຫວັນນະເຂດ ຢູ່ທາງທິດຕາເວັນອອກຂອງເທສະບານແຂວງ,ບຶງວະນັ້ນແມ່ນອ່າງເກັບນໍ້າເພື່ອໃຊ້ເຂົ້າໃນການເຮັດນາແຊງລວມໄປເຖິງການຜະລິດກະສິກໍາຕ່າງໆໃນລະດູແລ້ງຂອງຊາວບ້ານພາຍໃນບ້ານບຶງວະ ແລະນອກຈາກນັ້ນກໍ່ຍັງເປັນບ່ອນທໍາມາຫາກິນຂອງປະຊາຊົນເຊັ່ນ: ການຫາປາ, ກຸ້ງ , ຫອຍ ແລະອື່ນໆ.

 ການເດີນທາງໄປແຫຼ່ງທ່ອງທ່ຽວບຶງວະແມ່ນໃຊ້ເວລາບໍ່ດົນປານໃດເນື່ອງຈາກສະຖານທີ່ດັ່ງກ່າວແມ່ນຢູ່ບໍ່ໄກຈາກຕົວເມືອງປະມານ 5 ກິໂລແມັດເທົ່ານັ້ນ ແລະເປັນທາງປູຢາງສໍາລັບວັນພັກເສົາ-ອາທິດ ຫຼືວັນພັກຕາມເທສະການຕ່າງໆຈະມີປະຊາຊົນອອກມາພັກຜ່ອນກິນເຂົ້າຢູ່ລຽບຕາມແຄມໜອງ, ນອກນັ້ນພາຍໃນບຶງຍັງມີຕູບນ້ອຍ ແລະຮ້ານອາຫານເພື່ອໄວ້ໃຫ້ບໍລິການແກ່ນັກທ່ອງທ່ຽວທີ່ເດີນທາງໄປທ່ຽວຊົມ.

• 17/03/2020