ປະເມີນວຽກປະກັນຄຸນນະພາບການສຶກສາ

  ເມື່ອບໍ່ດົນມານີ້ໂຮງຮຽນເຕັກນິກ-ວິຊາຊີບແບບປະສົມ ແຂວງຊຽງຂວາງ ໄດ້ຈັດກອງປະຊຸມການປະເມີນພາຍນອກວຽກງານປະກັນຄຸນນະພາບການສຶກສາໂດຍການເປັນປະທານຂອງ ທ່ານ ບຸນຄົງ ດວງພະວັນອໍານວຍການໂຮງຮຽນໃຫ້ກຽດເຂົ້າຮ່ວມໂດຍທ່ານ ເດືອນສະຫວັນ ພົມມະວົງສາຫົວໜ້າພະແນກ ຄະນະວິສະວະກໍາສາດ ມະຫາວິທະຍາໄລແຫ່ງຊາດ ມີຄະນະປະເມີນຈາກພາກລັດ ແລະເອກະຊົນ ຈາກນະຄອນຫຼວງວຽງຈັນ, ຄະນະອໍານວຍການໂຮງຮຽນເຕັກນິກ-ວິຊາຊີບພ້ອມດ້ວຍຄູ-ອາຈານ ຜູ້ຮັບຜິດຊອບວຽກງານການປະກັນຄຸນນະພາບການສຶກສາເຂົ້າຮ່ວມ.

   ທ່ານ ບຸນຄົງ ດວງພະວັນ ອໍານວຍການໂຮງຮຽນໄດ້ນໍາສະເໜີສະພາບການຈັດຕັ້ງປະຕິບັດວຽກງານການຮຽນ-ການສອນໃນສົກຮຽນ 2018-2019 ໂດຍຫຍໍ້, ທ່ານໄດ້ຍົກໃຫ້ເຫັນເຖິງກົງຈັກ ການຈັດຕັ້ງຂອງໂຮງຮຽນໃນສົກຮຽນ 2018-2019 ມີຄູ-ອາຈານທັງໝົດ 56 ຄົນ, ຍິງ 16 ຄົນ, ມີນັກຮຽນ-ນັກສຶກສາທັງໝົດ 748 ຄົນ,ຍິງ 245 ຄົນໃນນັ້ນໄດ້ຈັດຕັ້ງການຮຽນ-ການສອນຢູ່ 9 ສາຂາວິຊາຮຽນຄື:ສາຂາປູກຝັງ, ສາຂາລ້ຽງສັດ,ກໍ່ສ້າງ, ຊ່າງໄມ້, ໄຟຟ້າ, ສ້ອມແປງທົ່ວໄປ, ຕັດຫຍິບ, ອາຫານ-ການບໍລິການເຄື່ອງດື່ມ ແລະ ການບໍລິການໂຮງແຮມ, ໃນນັ້ນວຽກງານປະກັນຄຸນນະພາບການສຶກສາທາງໂຮງຮຽນໄດ້ເອົາໃຈໃສ່ປະຕິບັດຢ່າງຕັ້ງໜ້າດ້ວຍການນໍາເອົານັກຮຽນເຂົ້າຮ່ວມແຂ່ງຂັນສີມືຢູ່ໃນເຄືອຂ່າຍພາກເໜືອ ແລະສາມາດຍາດໄດ້ອັນດັບ 1 ເລື້ອຍໆມາ, ອັນໄດ້ສ້າງຜົນງານ ແລະຊື່ສຽງມາສູ່ໂຮງຮຽນກໍຄື ແຂວງຊຽງຂວາງ.

  ສໍາລັບການລົງປະເມີນຂອງ ຄະນະທີມງານຄັ້ງນີ້ແມ່ນເພື່ອເປັນການຕິດຕາມກວດກາວຽກງານ ດ້ານຕ່າງໆຂອງໂຮງຮຽນທີ່ໄດ້ ຈັດຕັ້ງປະຕິບັດໃນໄລຍະຜ່ານມາວຽກໃດທີ່ເຮັດສໍາເລັດ ແລະວຽກໃດທີ່ຍັງຄ້າງຄາແລ້ວຈະໄດ້ພ້ອມກັນຊອກຫາວິທີທາງປັບປຸງແກ້ໄຂໃຫ້ໄດ້ດີຂຶ້ນເພື່ອໃຫ້ເປັນທີ່ຍອມຮັບຂອງສັງຄົມໄດ້,ຫຼັງຈາກນັ້ນກໍຈະໄດ້ສໍາພາດຄະນະອໍານວຍການໂຮງຮຽນ, ຫົວໜ້າພະແນກວິຊາ, ຄູ-ອາຈານ ແລະນັກຮຽນຈໍານວນໜຶ່ງຕື່ມອີກເພື່ອໃຫ້ໄດ້ຂໍ້ມູນທີ່ຊັດເຈນໃນການເຄື່ອນໄຫວວຽກງານຕ່າງໆ ພ້ອມນັ້ນຍັງຈະໄດ້ລົງສໍາພາດບັນດາສະຖານປະກອບການພາກເອກະຊົນກ່ຽວກັບຜົນການຕອບຮັບຂອງສັງຄົມດ້ານສີມືແຮງງານຂອງນັກສຶກສາທີ່ຮຽນຈົບອອກໄປ ແລະສໍາພາດອາດີີດນັກຮຽນທີ່ຮຽນຈົບຢູ່ໂຮງຮຽນໄປປະກອບອາຊີບເຮັດທຸລະກິດສ່ວນຕົວຕື່ມອີກ.

-------

ໂດຍ: ຄຳເພົາ

แชร์