ແຂ່ງຂັນການແຕ້ມຮູບ ຊີງຂັນຫົວໜ້າພະແນກສຶກສາ

  ໃນວັນທີ 11 ມີນາ ຜ່ານມາ ພະແນກສຶກສາທິການ ແລະກີລາແຂວງອັດຕະປື ໄດ້ຈັດງານແຂ່ງຂັນປະກວດສີລະປະກຳການແຕ້ມຮູບສຳລັບນັກຮຽນຊັ້ນມັດທະຍົມສຶກ ສາທົ່ວແຂວງອັດຕະປື ຄັ້ງທີ 1, ສົກຮຽນ 2019-2020, ຊິງຂັນ ແລະເງິນລາງວັນຂອງທ່ານຫົວໜ້າພະແນກສຶກສາທິການ ແລະກີລາແຂວງອັດຕະປື ໂດຍພາຍໃຕ້ການເປັນປະທານຂອງທ່ານ ພົງສະຫວັນ ຄຳສົງກາ ຮອງຫົວໜ້າພະແນກສຶກສາທິການ ແລະກີລາແຂວງ, ທ່ານ ສີພອນ ວັນນະລາດ ຮອງຫົວໜ້າພະແນກສຶກສາ ທິການ ແລະກີລາແຂວງ, ບັນດາຫົວໜ້າຂະແໜງ, ຮອງຂະແໜງ, ຄູນຳພາ ແລະ ນ້ອງນັກຮຽນທີ່ເປັນນັກແຕ້ມຕົວແທນຂອງເມືອງ ແລະໂຮງຮຽນມັດທະຍົມສຶກສາແຫ່ງຕ່າງໆໃນທົ່ວແຂວງເຂົ້າຮ່ວມ.

 ທ່ານ ພົງສະຫວັນ ຄໍາສົງກາ ໄດ້ໃຫ້ຮູ້ວ່າ: ການແຂ່ງຂັນຄັ້ງນີ້ ແມ່ນເປັນການປະຕິບັດຕາມແຜນວຽກຂອງຂະແໜງພະລະ-ສີລະປະກໍ່ຄືແຜນພັດທະນາຄຸນນະພາບ ການສຶກສາຂອງພະແນກສຶກສາ ທິການ ແລະກີລາປະຈຳສົກຮຽນ 2019-2020 ໃຫ້ຄົບຕາມ 3 ລັກສະນະ 5 ຫຼັກມູນ ແລະ3 ຂໍ້ແຂ່ງຂັນຂອງຂະແໜງການສຶກສາທີ່ກະຊວງສຶກສາທິການ ແລະກີລາໄດ້ວາງອອກໃຫ້ມີປະສິດທິພາບສູງຂຶ້ນໄປເລື້ອຍໆເວົ້າລວມ,ເວົ້າສະເພາະແມ່ນເພື່ອເປັນການປະເມີນ ແລະຊຸກຍູ້ສົ່ງເສີມການຄຸ້ມຄອງ-ບໍລິຫານ, ການຮຽນ-ການສອນຂອງຜູ້ບໍລິຫານການສຶກສາ, ຄູ-ອາຈານ ແລະນ້ອງນັກຮຽນໃນວິຊາສີລະປະກຳການແຕ້ມຮູບພາຍໃນໂຮງຮຽນຊັ້ນມັດທະຍົມສຶກສາແຕ່ ລະແຫ່ງໃນທົ່ວແຂວງໃຫ້ໄດ້ດີຂຶ້ນແນໃສ່ເຮັດໃຫ້ນ້ອງໆນັກຮຽນ ຜູ້ທີ່ມີຄວາມຮູ້, ຄວາມສາມາດ, ມີພອນສະຫວັນ, ມີຄວາມມັກຮັກ ແລະມີພອນສະແຫວງໃນດ້ານສີລະປະກຳການແຕ້ມຮູບໄດ້ມີເວທີ ສະແດງອອກຢ່າງສົມກຽດໃຫ້ສັງຄົມໄດ້ຮັບຮູ້ຜົນງານຂອງຕົ້ນຢ່າງກວ້າງຂວາງ ແລະໄດ້ຮັບການກະຕຸກຊຸກຍູ້ຈາກຄູ-ອາຈານ, ພໍ່-ແມ່, ຜູ້ປົກຄອງຕະຫຼອດຮອດສັງຄົມ, ຊຶ່ງຈະເຮັດໃຫ້ນັກຮຽນມີຄວາມກະຕືລືລົ້ນຢາກພັດທະນາຈຸດເດັ່ນຂອງຕົນເອງຫຼາຍຂຶ້ນຈົນກ້າວໄປສູ່ຄວາມເປັນມືອາຊີບໃນອະນາຄົດ.

  ການແຂ່ງຂັນແຕ້ມຮູບດັ່ງກ່າວໄດ້ກໍານົດເອົາ 2 ຫົວຂໍ້ຄື: ແຕ້ມຮູບການຮັກສາສິ່ງແວດລ້ອມ ແລະແຕ້ມຮູບທໍາມະຊາດ, ໃນ 2 ຫົວຂໍ້ນີ້ຜູ້ເຂົ້າແຂ່ງຂັນເລືອກເອົາຫົວຂໍ້ໜຶ່ງໃນການແຕ້ມປະກວດ,ໂດຍແຕ້ມໃສ່ແຜ່ນຜ້າຂາວ, ຂະໜາດ 100 ຊັງຕີແມັດ x80 ຊັງຕີແມັດ, ແຕ້ມດ້ວຍສີນໍ້າ, ໃຊ້ເວລາໃນການແຕ້ມ 3 ຊົ່ວໂມງ, ມີຜູ້ເຂົ້າ ຮ່ວມແຂ່ງຂັນທັງໝົດ 13 ຄົນ, ເປັນສາມະເນນ 1 ອົງ,

  ຜ່ານແຂ່ງຂັນຜົນປະກົດວ່າ: ຊະນະເລີດທ້າວ ນັນທະພອນ ຄຳວິໄລ ນັກຮຽນຊັ້ນ ມ7 ຈາກໂຮງຮຽນ ມສ ຈັນທາ, ຮອງຊະນະເລີດ ທ້າວ ເຫຼັກ ສີປະເສີດ ນັກຮຽນ ຊັ້ນມ7 ຈາກໂຮງຮຽນ ມສ ເສດຖາທິລາດ, ອັນດັບທີ 3 ທ້າວ ຄຳນິຍົມ ສິນທະນຸພັດ ນັກຮຽນ ຊັ້ນມ6 ຈາກໂຮງຮຽນ ມສ ຈະເລີນສຸກ.  

--------

ໜັງສືພິມເສດຖະກິດ-ສັງຄົມ

 

แชร์