ຫຼວງພະບາງມອບເງິນຊ່ວຍເຫຼືອ ສປ ຈີນ

ຍ້ອນເຫັນໄດ້ຄວາມສາມະຄີສາຍພົວພັນການຮ່ວມມືຮອບດ້ານສອງຊາດລາວ-ຈີນ ວັນທີ 12 ມີນານີ້ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງພ້ອມຄະນະໄດ້ນຳເອົາເງິນຈໍານວນ 20 ພັນໂດລາ ໄປມອບໃຫ້ ທ່ານ ຫຼີ ຈື່ກົງ ຫົວໜ້າກົງສູນໃຫຍ່ຈີນປະຈຳພາກເໜືອຂອງລາວແຂວງຫຼວງພະບາງເພື່ອນຳໄປມອບຕໍ່ໃຫ້ລັດຖະບານຈີນໃນການຊ່ວຍເຫຼືອຜູ້ປະສົບໄພ ແລະຕິດພະຍາດເຊື້ອຈຸລະໂລກໂຄໂລນາສາຍພັນໃໝ່ ຫຼື COVID-19 ເກີດຂຶ້ນຢູ່ ສປ ຈີນ.

  ໂອກາດນີ້ ທ່ານ ຫຼີ ຈື່ກົງ ຫົວໜ້າກົງສູນໃຫຍ່ຈີນປະຈຳພາກເໜືອຂອງລາວ ແຂວງຫຼວງພະບາງ ກໍໄດ້ສະຄວາມຂອບໃຈຢ່າງສູງຕໍ່ລັດຖະບານແຫ່ງ ສປປ ລາວ ກໍຄືແຂວງຫຼວງພະບາງ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້ ພ້ອມທັງ ໄດ້ລາຍງານສະພາບພະຍາດທີ່ ເກີດຂຶ້ນຢູ່ປະເທດຈີນໃຫ້ທ່ານ ແຂວງຫຼວງພະບາງຮັບຮູ້ວ່າ: ເຊື້ອຈຸລະໂລກໂຄໂລນາສາຍພັນໃໝ່ ຫຼື COVID-19 ເກີດຂຶ້ນຢູ່ ສປ ຈີນ ພະຍາດດັ່ງກ່າວໄດ້ລະບາດຢ່າງ ໄວວາ ແລະແຜ່ລາມເປັນວົງກວ້າງໄປທົ່ວປະເທດມາຮອດປະຈຸບັນກໍ່ມີການລະບາດຢູ່ຫຼາຍປະເທດ ໃນທົ່ວໂລກ ໂດຍສະເພາະແມ່ນ ແຂວງອູຮັ້ນ ສປ ຈີນ ເປັນແຂວງ ທີ່ໄດ້ຮັບຜົນກະທົບ ແລະເກີດການລະບາດຂອງເຊື້ອພະຍາດຈຸລະໂລກ ໂຄໂລນາສາຍພັນໃໝ່ ຫຼື COVID-19 ກ່ອນໝູ່ຊຶ່ງມີຜູ້ຕິດເຊື້ອ ແລະເສຍຊີວິດເປັນຈໍານວນຫຼາຍປະຈຸບັນປະເທດຈີນມີຜູ້ຕິດເຊື້ອເຖິງ 8 ໝື່ນກວ່າຄົນແຕ່ເຖິງຢ່າງ ໃດກໍຕາມຍ້ອນຄວາມເອົາໃຈ ໃສ່ຂອງລັດຖະບານຈີນໃນການ ຕ້ານ-ສະກັດກັ້ນ ແລະຄວບຄຸມ ພະຍາດດັ່ງກ່າວ ຊຶ່ງມາຮອດປະຈຸບັນແມ່ນມີທ່າອ່ຽງຫຼຸດລົງ ແລະປິ່ນປົວດີກັບສູ້ຄອບຄົວແລ້ວເປັນຈຳນວນຫຼາຍມາຮອດດຽວນີ້ທົ່ວປະເທດຈີນເຫຼືອພຽງ 15 ກໍລະນີ ແລະ 6 ກໍລະນີມາຈາກຕ່າງປະເທດມີຕິດເຊື້ອພວມປິ່ນປົວຍັງເຫຼືອ 1 ໝື່ນ 4 ພັນກວ່າກໍລະນີ, ກໍລະນີສົງໄສ 253 ກໍລະນີສ່ວນຢູ່ແຂວງຢູນນານມີຜູ້ຕິດເຊື້ອ 174 ກໍລະນີ ປິ່ນປົວດີ 172 ກໍລະນີ ປະຈຸບັນທົ່ວປະເທດຈີນສາມາດຄວບຄຸມໄດ້ດີຂຶ້ນຕາມລະດັບ ແລະພວມກ້າວເຂົ້າສູ່ສະພາບປົກກະຕິ.

ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ຕີລາສູງຕໍ່ລັດຖະບານ ສປ ຈີນ ທີ່ໄດ້ເອົາໃຈໃສ່ຕ້ານ ແລະຄວບຄຸມພະຍາດດັ່ງກ່າວໄດ້ ແລະເຂົ້າສູ່ສະພາບປົກກະຕິພ້ອມນີ້ ທ່ານກໍໄດ້ ລາຍງານສະພາບການຢູ່ ສປປ ລາວ ເຖິງແມ່ນວ່າປະເທດລາວ ບໍ່ມີຜູ້ຕິດເຊື້ອພະຍາດກໍຕາມແຕ່ ລັດຖະບານລາວກໍ່ໄດ້ເອົາໃຈໃສ່ເຝົ້າລະວັງ ແລະວາງມາດຕະການຕ້ານ-ສະກັດກັ້ນຢ່າງເຂັ້ມງວດໂດຍສະເພາະຢູ່ແຂວງຫຼວງພະບາງກໍ່ໄດ້ອອກແຈ້ງການໂຈະການຈັດງານຕ່າງໆເປັນຕົ້ນແມ່ນງານບຸນປະເພນີ ແລະງານອື່ນໆ ທີ່ມີມວນຊົນເຂົ້າຮ່ວມເປັນຈໍານວນຫຼວງຫຼາຍ ແລະ ແອອັດທັງນີ້ກໍ່ປ້ອງກັນ, ຄວບຄຸມ ແລະຫຼຸດຜ່ອນຄວາມສ່ຽງຕໍ່ການຕິດເຊື້ອ.  

--------------

ຂຽນໂດຍ: ແຫຼ້ ສຸລິນພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์