65 ປີແຫ່ງການກຳເນີດ-ເຕີບໃຫຍ່ຂອງພັກປະຊາຊົນປະຕິວັດລາວ

 ທ່ານ ເພີດ ມາປັນຍາ ກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຫົວພັນໃຫ້ຮູ້ວ່າ: ພັກປະຊາຊົນປະຕິວັດລາວແມ່ນອົງການການເມືອງສູງສຸດໃນການຊີ້ນໍາ-ນໍາພາປວງ ຊົນລາວທັງຊາດ ເອົາໃຈໃສ່ໃນ ການປົກປັກຮັກສາ ແລະສ້າງສາພັດທະນາປະເທດຊາດ, ໄດ້ກຳເນີດ ມາຈາກພັກກອມມູນິດອິນດູຈີນໂດຍແມ່ນ ປະທານ ໂຮຈີມິນ ເປັນຜູ້ສ້າງຕັ້ງຂຶ້ນໃນປີ 1930 ແລະ ກຳເນີດມາຈາກຄວາມຮຽກຮ້ອງຕ້ອງການຂອງການນໍາພາປະເທດຊາດ ໜ້າທີ່ການເມືອງຂອງພັກ ແມ່ນສືບຕໍ່ນໍາພາປະຊາຊົນຕໍ່ສູ້ກັບສັດຕູຜູ້ຮຸກຮານ,ຍາດເອົາອຳນາດການປົກຄອງໃນທົ່ວປະເທດຈາກກຳມືຂອງພວກຟາດຊິດຍີ່ປຸ່ນ ແລະພວກລ່າເມືອງຂຶ້ນຝຣັ່ງ,ປະກາດຄວາມເປັນເອກະລາດຂອງປະເທດລາວຕໍ່ໂລກເມື່ອວັນທີ 12 ຕຸລາ 1945, ປີ 1955 ຕໍ່ໜ້າ ຄວາມຮຽກຮ້ອງຕ້ອງການໃໝ່ຂອງການປະຕິວັດ ແລະໂດຍປະຕິວັດຕາມມະຕິຂອງກອງປະຊຸມໃຫຍ່ຄັ້ງທີ 2 ຂອງພັກກອມມູນິດອິນດູຈີນ, ບັນດານັກກອມມູນິດລາວ,ພາຍຫຼັງທີ່ໄດ້ກະກຽມມາໄດ້ໄລຍະໜຶ່ງກໍ່ໄດ້ເປີດກອງປະຊຸມໃຫຍ່ຜູ້ແທນທົ່ວປະເທດເພື່ອສ້າງຕັ້ງພັກປະຊາຊົນປະຕິວັດລາວຂຶ້ນໃນວັນ ທີ 22 ມີນາ 1955 ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນກໍໄດ້ປະເຊີນໜ້າກັບຈັກກະພັດອາເມລິກາຊຶ່ງເປັນຈັກກະພັດໂຕໃໝ່ແຕ່ພັກເຮົາກໍໄດ້ແບກຫາບເອົາພາລະກຳອັນໜັກໜ່ວງເພື່ອຊີ້ນໍາໆ ພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະລູກມືປະຕິ ການຂາຍຊາດຢ່າງດຸ ເດືອດຂ້ຽວຂາດຈົນກ້າວໄປເຖິງການປົດປ່ອຍ ແລະສະຖາປະນາເປັນປະເທດຊາດຢ່າງສົມບູນໃນວັນທີ 2 ທັນວາ 1975.

  ນັບແຕ່ປີ 1975 ເປັນຕົ້ນມາ, ພັກປະຊາຊົນປະຕິວັດລາວໄດ້ກ້າວເຂົ້າສູ່ໄລຍະໃໝ່ຂອງການປະຕິວັດແນວທາງຢ່າງຮອບດ້ານ ແລະເປີດປະຕູສູ່ໂລກພາຍນອກເປັນຕົ້ນແມ່ນດ້ານເສດຖະກິດໄດ້ເຊື່ອມໂຍງກັບເສດຖະກິດຂອງພາກພື້ນ ແລະສາກົນປະຈຸບັນນີ້, ພັກເຮົາໄດ້ສຸມໃສ່ວຽກງານກໍ່ສ້າງຮາກຖານການເມືອງ ແລະພັດທະນາຊົນນະ ບົດຮອບດ້ານຕາມ 4 ເນື້ອໃນ 4 ຄາດໝາຍ ແລະຕິດພັນກັບວຽກງານ 3 ສ້າງເປັນວຽກສຳຄັນ.

  ສະເພາະແຂວງຫົວພັນ, ຄະນະພັກແຕ່ລະຂັ້ນກໍໄດ້ເອົາໃຈໃສ່ສຶກສາອົບຮົມການເມືອງແນວຄິດ ແລະຊີ້ນໍານໍາພາປະຊາຊົນບັນດາ ເຜົ່າຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 ເຫັນວ່າ: ສະພາບທາງດ້ານການເມືອງໄດ້ມີສະຖຽນລະພາບ, ສັງ ຄົມມີຄວາມສະຫງົບ, ເສດຖະກິດ ໄດ້ຮັບການພັດທະນາຫຼາຍຂຶ້ນ ເປັນຕົ້ນແມ່ນ: ດ້ານກະສິກຳໄດ້ຊຸກ ຍູ້ສົ່ງເສີມການປູກຕົ້ນໄມ້ອຸດສາຫະກຳການຜະລິດພືດຜັກ ແລະ ການລ້ຽງສັດຕາມເງື່ອນໄຂທ່າ ແຮງຂອງແຂວງ; ດ້ານພະລັງງານ ແລະບໍ່ແຮ່ກໍໄດ້ມີການຂະຫຍາຍ ຕົວຢ່າງຕໍ່ເນື່ອງເຮັດໃຫ້ປະຊາຊົນໃນທົ່ວແຂວງໄດ້ຊົມໃຊ້ໄຟຟ້າເປັນຈໍານວນຫຼາຍ; ດ້ານອຸດສາຫະກຳ ແລະ ການຄ້າບັນດາໂຮງຈັກ, ໂຮງງານ, ການຕະຫຼາດໄດ້ຮັບການພັດທະນານັບມື້ເພີ່ມ ຂຶ້ນ; ດ້ານການຄົມມະນາຄົມຂົນສົ່ງໄດ້ຮັບການຂະຫຍາຍຕົວໂດຍສະເພາະແມ່ນລະບົບເສັ້ນທາງທີ່ສາມາດຖ່ຽວໄດ້ 2 ລະດູກວມ 47%; ດ້ານ ໄປສະນີໂທລະຄົມມະ ນາຄົມ ແລະ ການສື່ສານໄດ້ເອົາໃຈໃສ່ພັດທະນາ, ຂະຫຍາຍເຄືອຂ່າຍສັນຍານ ລະບົບຕ່າງໆໃຫ້ທ່ວງທັນກັບ ຄວາມຕ້ອງການຂອງສັງຄົມ; ດ້ານວັດທະນະທໍາ-ສັງຄົມໄດ້ຂະ ຫຍາຍຕາໜ່າງສາທາລະນະສຸກ, ການສຶກສາຊັ້ນຕ່າງໆໄປທົ່ວທຸກ ຮາກຖານທ້ອງຖິ່ນເຮັດໃຫ້ອັດຕາ ເຂົ້າຮຽນຂອງເດັກໃນເກນອາຍຸ ແຕ່ລະຊັ້ນຮຽນໄດ້ເຂົ້າຮຽນຕາມ ລະດັບຄາດໝາຍ, ປະຊາຊົນບັນດາເຜົ່າໄດ້ຮັບໃຊ້ບໍລິການສາທາລະນະສຸກຢ່າງທົ່ວເຖິງໂດຍສະ ເພາະແມ່ນແມ່ຍິງ ແລະເດັກນ້ອຍ; ວຽກງານແຮງງານສະຫວັດດີ ການສັງຄົມໄດ້ພັດທະນາສີມືແຮງງານ, ຈັດຫາວຽກເຮັດງານທຳໃຫ້ແຮງງານພາຍໃນໄດ້ເພີ່ມຂຶ້ນ, ສາມາດຄຸ້ມຄອງແຮງງານໄດ້ຢ່າງຖືກຕ້ອງຕາມລະບຽບກົດໝາຍ, ປະຕິບັດນະໂຍບາຍຕໍ່ຜູ້ທີ່ມີຄຸນງາມຄວາມດີຕໍ່ປະເທດຊາດໄດ້ຈໍານວນໜື່ງ;ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວໄດ້ນໍາເອົາມູນເຊື້ອ, ແນວທາງນະໂຍ ບາຍຂອງພັກ-ລັດ ແລະ ເຫດການທີ່ພົ້ນເດັ່ນຕ່າງໆທັງພາຍໃນ ແລະ ຕ່າງປະເທດກະຈ່າຍອອກໃຫ້ສັງຄົມຮັບຟັງຮັບຊົມ; ວຽກງານຍຸຕິທຳໄດ້ລົງໂຄສະນາເຜີຍແຜ່ກົດໝາຍຕ່າງໆຢ່າງທົ່ວເຖິງ ແລະວຽກງານປ້ອງກັນຊາດ-ປ້ອງກັນຄວາມສະຫງົບໄດ້ສຸມໃສ່ຫັນລົງຮາກຖານການເມືອງເຮັດໃຫ້ພື້ນຖານມີຄວາມສະຫງົບຢ່າງໜັກແໜ້ນ.

ສະໜັບສະໜູນໂດຍ: HONDA

    ປະຈຸບັນແຂວງຫົວພັນພວມກະກຽມສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ ໂດຍສະເພາະແມ່ນໄດ້ແຕ່ງຕັ້ງຄະນະຮັບຜິດຊອບຂັ້ນ ແຂວງ, ຂັ້ນເມືອງລົງໄປປາຖະກະຖາເຜີຍແຜ່ເອກະສານວັນສ້າງ ຕັ້ງພັກ ແລະເອກະສານສຳຄັນຈຳນວນໜຶ່ງເພື່ອເຊື່ອມຊຶມໃຫ້ສະມາ ຊິກພັກ, ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈ ແລະເຫັນຄວາມສຳຄັນເຖິງການກຳເນີດ-ເຕີບ ໃຫຍ່ຂະຫຍາຍຕົວ ແລະຜົນງານໃນການຊີ້ນໍານຳພາຂອງພັກຕະຫຼອດໄລຍະເວລາ 65 ປີ, ພ້ອມທັງຮັບ ຮູ້ເຖິງມູນເຊື້ອຄວາມສາມັກຄີຂອງປະຊາຊົນລາວໃນທົ່ວປະເທດໂດຍສະເພາະແຂວງຫົວພັນ ຄາດວ່າການດຳເນີນປາຖະກະຖາຈະໃຫ້ສຳເລັດໃນທຸກໆເມືອງກ່ອນວັນທີ 22 ມີນາ 2020 ນີ້.

-----------------

ຂຽນໂດຍ:  ນິດຖະໜອມ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

 

แชร์