ເຜີຍແຜ່ກົດໝາຍວ່າດ້ວຍປ້າຍ 6 ແຂວງພາກໃຕ້ ແລະແຂວງສະຫວັນນະເຂດ

  ໃນວັນທີ 12 ມີນາ 2020 ທີ່ຫ້ອງປະຊຸມພະແນກ ຖວທ ແຂວງສະຫວັນນະເຂດ, ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍປ້າຍ 6 ແຂວງພາກໃຕ້ ແລະບັນດາຂະແໜງການອ້ອມຂ້າງແຂວງສະຫວັນນະເຂດໂດຍການເປັນປະທານຂອງ ທ່ານ ບົວເງິນ ຊາພູວົງ ຮອງລັດຖະມົນ ຕີກະຊວງ ຖວທ, ມີກົມທີ່ກ່ຽວຂ້ອງຈາກກະຊວງ ຖວທ, ຫົວໜ້າ-ຮອງຫົວໜ້າພະແນກ ຖວທ 6 ແຂວງພາກໃຕ້, ບັນດາຜູ້ປະກອບການດ້ານປ້າຍ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໂອກາດນີ້, ທ່ານ ນາງ ດາວວອນ ໄຊສຸລຽນ ຫົວໜ້າພະແນກ ຖວທ ແຂວງສະຫວັນນະເຂດ ກໍ່ໄດ້ເຜີຍແຜ່ເນື້ອໃນສຳຄັນຂອງກົດໝາຍວ່າ ດ້ວຍປ້າຍ ຊຶ່ງກົດໝາຍສະບັບດັ່ງກ່າວປະກອບ ມີ XII ພາກ, 64 ມາດຕາຊຶ່ງກົດໝາຍວ່າດ້ວຍປ້າຍແມ່ນໄດ້ບອກໃຫ້ຮູ້ເຖິງປະເພດ ແລະຊະນິດຂອງປ້າຍ, ເນື້ອໃນ, ສີພື້ນ, ສີໂຕໜັງສື ແລະ ຄວາມຮຸ່ງແຈ້ງຂອງປ້າຍ, ການດຳເນີນທຸລະກິດກ່ຽວກັບປ້າຍ, ການຂໍອະນຸຍາດອອກປ້າຍ, ຂະໜາດ, ການຕິດຕັ້ງ ແລະ ການກຳນົດເວລານຳໃຊ້ປ້າຍ, ສິດ ແລະພັນ ທະຂອງພົນລະເມືອງ ແລະ ຜູ້ດຳເນີນທຸລະກິດກ່ຽວກັບປ້າຍ, ການປ່ຽນແປງ, ການໂຈະຊົ່ວຄາວ ແລະ ການຍົກເລີກການດຳເນີນທຸລະກິດກ່ຽວກັບປ້າຍຕະຫຼອດເຖິງຂໍ້ຫ້າມ, ການແກ້ໄຂຂໍ້ຂັດແຍ່ງ, ການຄຸ້ມຄອງ ແລະກວດກາວຽກງານກ່ຽວກັບປ້າຍລວມເຖິງນະໂຍບາຍຕໍ່ຜູ້ມີຜົນງານ ແລະມາດຕະການຕໍ່ຜູ້ລະເມີດ.

ກອງປະຊຸມກໍຍັງໄດ້ມີການປະກອບຄຳຄິດຄຳເຫັນກ່ຽວກັບວຽກງານປ້າຍເພື່ອພ້ອມກັນຊອກຫາທິດທາງແກ້ໄຂປັບປຸງໃຫ້ດີຂຶ້ນກວ່າເກົ່າ ແລະເຮັດໃຫ້ການຈັດຕັ້ງ-ການຄຸ້ມຄອງວຽກງານປ້າຍມີຄວາມເປັນເອກະພາບກັນໃນຂອບເຂດທົ່ວປະເທດ.

____________

ໜັງສືພິມເສດຖະກິດ-ສັງຄົມ

แชร์