ເມືອງຫົງສາຈະສູ້ຊົນໃຫ້ລາຍຮັບຕໍ່ຫົວຄົນ ບັນລຸໄດ້ 30 ລ້ານກວ່າກີບຕໍ່ຄົນຕໍ່ປີ

   ທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ແຂວງໄຊຍະບູລີ ຜູ້ຊີ້ນຳວຽກງານຂົງເຂດເສດຖະກິດຂອງເມືອງໄດ້ໃຫ້ຮູ້ວ່າ: ພາຍໃຕ້ການຊີ້ນຳ-ນຳພາຂອງອົງຄະ ນະພັກເມືອງໃນໄລຍະ 5 ປີ ຜ່ານມາຄື: (2015-2019) ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງຫົງສາມີການຂະຫຍາຍຕົວຕໍ່ເນື່ອງໃນລະດັບ 11,3% ຕໍ່ປີ, ລວມຍອດລາຍໄດ້ໃນທົ່ວເມືອງທັງໝົດ 644,32 ຕື້ກີບ, ສະເລ່ຍໃສ່ຫົວຄົນໜຶ່ງ 21,96 ລ້ານກີບຕໍ່ຄົນຕໍ່ປີເທົ່າກັບ 2.745 ໂດລາສະຫະ ລັດຕໍ່ຄົນຕໍປີ, ໂຄງປະກອບສ້າງຂອງເສດຖະກິດຫັນປ່ຽນໄປຕາມທິດເປັນອຸດສາຫະກໍາ ແລະ ທັນສະໄໝ, ສະແດງໃຫ້ເຫັນຈາກລາຍຮັບໃນດ້ານກະສິກໍາ ແລະ ປ່າໄມ້ 178,46 ຕື້ກີບ ກວມເອົາ 28%, ດ້ານອຸດສາຫະກຳ-ຫັດຖະກຳ 168,17 ຕື້ກີບ ກວມເອົາ 26%, ດ້ານການຄ້າ-ບໍລິການ 297,69 ຕື້ກີບ ກວມເອົາ 46% ແລະເຮັດໃຫ້ມູນຄ່າການສົ່ງອອກບັນລຸ 13,92 ຕື້ກີບ.

ສະໜັບສະໜູນໂດຍ: HONDA

  ສໍາລັບໃນໄລຍະ 5 ປີຕໍ່ໜ້ານີ້ (2020-2024) ເມືອງຫົງສາ ແຂວງໄຊຍະບູລີ ຄາດໝາຍສູ້ຊົນ ເພື່ອເຮັດໃຫ້ເສດຖະກິດມີການຂະຫຍາຍຕົວເປັນລະບົບຕໍ່ເນື່ອງໃນລະດັບສະເລ່ຍບໍ່ຫຼຸດ 9,5% ຕໍ່ປີ. ໃນນີ້, ຂະແໜງກະສິກຳ ແລະປ່າໄມ້ ໃຫ້ເພີ່ມຂຶ້ນ 5,3% ລວມຍອດລາຍ ໄດ້ໃຫ້ບັນລຸ 235,01 ຕື້ກີບ, ຂະແໜງອຸດສາຫະກຳ-ຫັດຖະກຳໃຫ້ເພີ່ມຂຶ້ນ 10,2% ລວມຍອດໄດ້ໃຫ້ບັນລຸ 274,05 ຕື້ກີບ, ຂະແໜງການຄ້າ-ບໍລິການໃຫ້ ເພີ່ມຂຶ້ນ10,3%ລວມຍອດລາຍໄດ້ໃຫ້ບັນລຸ 486,44 ຕື້ກີບ; ຄາດຄະເນການເພີ່ມຂຶ້ນຂອງພົນລະ ເມືອງຮອດປີ 2024 ຈະມີທັງໝົດ 32,074 ຄົນ, ລວມຍອດລາຍໄດ້ ໃຫ້ບັນລຸ 995,51 ຕື້ກີບ ສະເລ່ຍ ໃສ່ຫົວຄົນໜຶ່ງ 31 ລ້ານກີບຕໍ່ຄົນ ຕໍ່ປີ ຫຼື ເທົ່າກັບ 3.570 ໂດລາສະຫະລັດຕໍ່ຄົນຕໍ່ປີ.

ພາບຂ່າວ

 ທ່ານ ຈັນເພັງ ອູ່ທອງຄໍາ ຍັງກ່າວໃຫ້ຮູ້ອີກວ່າ:ບົນພື້ນຖານຜົນສຳເລັດອັນສຳຄັນໃນຫຼາຍດ້ານທີ່ ຍາດມາໄດ້ ໃນ 5 ປີຜ່ານມານັ້ນກອງປະຊຸມໃຫຍ່ຂອງອົງຄະນະພັກເມືອງຫົງສາ ຄັ້ງທີ VIII ໄດ້ຢືນຢັນຄວາມຕັດສິນໃຈໃນການສືບຕໍ່ນຳພາສ້າງເມືອງໃຫ້ກາຍເປັນ ເມືອງອຸດສາຫະກຳ ແລະເຂັ້ມແຂງ ຮອບດ້ານໂດຍໄດ້ກຳນົດວິໄສທັດການພັດທະນາອອກເປັນ 2 ໄລຍະຄື: 1, ວິໄສທັດໄລຍະຍາວ “ສ້າງເມືອງຫົງສາໃຫ້ກາຍເປັນ ເມືອງອຸດສາຫະກຳ, ສູນກາງທາງຜ່ານ, ປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ວັດທະນະທຳ-ສັງຄົມ ມີການນຳໃຊ້ ຊັບພະຍາກອນແບບຍືນຍົງ”, 2, ວິໄສທັດໃນໄລຍະ 5 ປີຕໍ່ໜ້າ (2020-2024) “ສືບຕໍ່ສ້າງເມືອງຫົງສາເປັນເມືອງອຸດສາຫະກໍາ, ປູກພືດເປັນສິນຄ້າຕິດພັນກັບການປຸງແຕ່ງ, ສົ່ງເສີມຫັດຖະກຳທີ່ເປັນມູນເຊື້ອ ແລະ ພັດທະນາການບໍລິການທ່ອງທ່ຽວທີ່ເປັນມິດກັບສິ່ງ ແວດລ້ອມ”.

____________

ຂຽນໂດຍ: ກິດຕິສັກ ບົວໄລ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์