ໄຈກ້າ ມອບຖັງໃສ່ຂີ້ເຫຍື້ອໃຫ້ຫຼວງພະບາງ

  ວັນທີ 11 ມີນາ 2020 ທີ່ຂະແໜງການທ່ອງທ່ຽວແຂວງຫຼວງພະບາງ ຕາງໜ້າຈາກອົງການໄຈກ້າ ທ່ານ ມາຊາຊຸມິ ໂອກາວະ ຫົວໜ້າຊ່ຽວຊານໂຄງການສ້າງຄວາມອາດສາມາດດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງແບບຍືນຍົງເພື່ອການທ່ອງທ່ຽວໄດ້ນຳເອົາຖັງໃສ່ຂີ້ເຫຍື້ອແຍກປະເພດ 30 ຖັງ, ຖັງຂີ້ເຫຍື້ອ 60 ໜ່ວຍ, ມູນຄ່າ 6.284 ໂດ ລາສະຫະລັດ, ມາມອບໃຫ້ນະຄອນຫຼວງພະບາງ, ຮັບໂດຍທ່ານນາງ ສຸດາພອນ ຄົມທະວົງ ຫົວໜ້າພະແນກຖະແຫຼງຂ່າວວັດທະນະທໍາ ແລະທ່ອງທ່ຽວແຂວງຫຼວງພະບາງ ແລະມອບຕໍ່ໃຫ້ຫ້ອງການບໍລິການຕົວເມືອງນະຄອນ-ຫຼວງພະບາງ.

  ຈຸດປະສົງຫຼັກກໍເພື່ອເປັນການປົກປັກຮັກສາສິ່ງແວດລ້ອມ ແລະສ້າງຄວາມສະອາດງາມຕາຢູ່ພາຍໃນເທສະບານນະຄອນຫຼວງພະບາງ, ເຮັດໃຫ້ການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງ ໃຫ້ມີຄວາມຍືນຍົງ ແລະຫຼຸດຜ່ອນບັນຫາການຖີ້ມຂີ້ເຫຍື້ອຊະຊາຍ,ສໍາລັບຢູ່ພາຍໃນເທສະບານແຂວງກໍຄືນະຄອນຫຼວງພະບາງມີຂີ້ເຫຍື້ອທີ່ຕ້ອງຂົນອອກໄປຖິ້ມມື້ໜຶ່ງບໍ່ຕໍ່າ 60-70 ໂຕນ ສະນັ້ນຖັງໃສ່ຂີ້ເຫຍື້ອແຍກປະເພດ 30 ຖັງ, ຖັງຂີ້ເຫຍື້ອ 60 ໜ່ວຍ, ທີ່ໄດ້ຮັບ ການສະໜັບສະໜູນຈາກໂຄງການຄັ້ງນີ້ຈະໄດ້ນໍາໄປວາງໄວ້ຈຸດລະ 2 ໜ່ວຍ, ລວມ 30 ຈຸດ ຢູ່ພາຍໃນເທດສະບານນະຄອນຫຼວງພະບາງແນໃສ່ໃຫ້ການຖິ້ມຂີ້ເຫຍື້ອຍແບບຊະຊາຍຫຼຸດລົງເທື່ອລະກ້າວ.

ສະໜັບສະໜູນໂດຍ: HONDA

  ດ້ານທ່ານ ນາງ ບົວສອນ ແກ້ວປະເສີດ ຫົວໜ້າຫ້ອງການບໍລິການຕົວເມືອງກໍໄດ້ກ່າວສະແດງຄວາມຂອບໃຈຢ່າງສູງຕໍ່ການຊ່ວຍເຫຼືອຂອງໂຄງການທີ່ເຫັນຄວາມສໍາຄັນຕໍ່ການ ປົກປັກຮັກສາ ມໍລະດົກໂລກຫຼວງພະບາງແບບຍືນຍົງເພື່ອການທ່ອງທ່ຽວ ແລະຈະນໍາໄປມອບໃຫ້ອົງການປົກຄອງບ້ານແຕ່ລະບ້ານນໍາໄປໝູນໃຊ້ພ້ອມກັນປົກປັກຮັກສານຳໃຊ້ໃຫ້ເກີດຜົນປະໂຫຍດສູງສຸດ ແລະຍາວນານເພື່ອໃຫ້ເມືອງມໍລະດົກໂລກແຫ່ງນີ້ມີຄວາມສະອາດງາມຕາຕະຫຼອດໄປ.

 

 

แชร์