ປກສ ແຂວງບໍລິຄຳໄຊທົບທວນຕີລາຄາຜົນງານທີ່ຍາດມາໄດ້

  ກອງປະຊຸມໃຫຍ່ຜູ້ແທນອົງຄະນະພັກກອງບັນຊາການ ປກສ ແຂວງບໍລິຄໍາໄຊ ຄັ້ງທີ III ໄດ້ເປີດຂຶ້ນຢ່າງເປັນທາງການໃນຕອນເຊົ້າວັນທີ 10  ມີນາ 2020 ນີ້, ທີ່ສະໂມສອນກອງບັນຊາການ ປກສ ແຂວງ, ໂດຍການເປັນປະທານຂອງສະຫາຍ ພັນໂທ ກົງຈັນ ໄຊປັນຍາ ວ່າການເລຂາຄະນະບໍລິຫານງານພັກຫົວໜ້າກອງບັນຊາການ ປກສ ແຂວງບໍລິຄໍາໄຊ, ມີສະຫາຍປະລິນຍາເອກ ກອງແກ້ວ ໄຊສົງຄາມ ກໍາມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງບໍລິຄໍາໄຊ, ສະ ຫາຍ ແດນປີ ມູນທະດີ ຮອງເລຂາພັກແຂວງຫົວໜ້າຄະນະຈັດຕັ້ງແຂວງ, ຄະນະພັກກອງບັນຊາການ ປກສ ແຂວງ, ພະນັກງານອາວຸດໂສບໍານານ, ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ.

   ກອງປະຊຸມໃຫຍ່ຜູ້ແທນອົງຄະນະພັກກອງບັນຊາການ ປກສ ແຂວງບໍລິຄໍາໄຊ ຄັ້ງທີ 3 ໄດ້ພ້ອມກັນທົບທວນ, ຕີລາຄາຄືນຜົນງານ ແລະໄຊຊະນະທີ່ຍາດມາໄດ້, ຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ ແລະບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະມະຕິກອງປະຊຸມໃຫຍ່ຄັ້ງທີ 2 ຂອງອົງ ຄະນະພັກກອງບັນຊາການ ປກສ ແຂວງບໍລິຄໍາໄຊໃນໄລຍະ 5 ປີຜ່ານມາ, ພ້ອມທັງກໍານົດເອົາຄາດໝາຍຍຸດທະສາດແຕ່ລະດ້ານແຕ່ນີ້ຫາປີ 2025 ຊຶ່ງຄະນະພັກຄະ ນະບັນຊາໄດ້ເອົາໃຈໃສ່ເຮັດວຽກງານສືກສາອົບຮົມ, ການເມືອງ, ແນວຄິດໃຫ້ສະມາຊິກພັກ, ພະນັກງານ, ນັກຮົບຢ່າງເປັນປົກກະຕິດ້ວຍຫຼາຍຮູບຫຼາຍສີ, ສອດຫ້ອຍເຂົ້າໃນທຸກຂົງເຂດວຽກງານຈຶ່ງເຮັດໃຫ້ສະມາຊິກພັກ, ພະນັກງານ-ນັກຮົບ ມີແນວຄິດການເມືອງໜັກແໜ້ນ, ມີຄຸນສົມບັດສີນທໍາປະຕິວັດ, ເຊື່ອໝັ້ນຕໍ່ແນວທາງນະ ໂຍບາຍຂອງພັກ, ເຄົາລົບລະບຽບກົດໝາຍຂອງລັດຢ່າງເຂັ້ມງວດ, ໄດ້ເອົາໃຈໃສ່ເຮັດວຽກງານກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນໂດຍປະຕິບັດຕາມ 5 ຫຼັກການ 3 ທິດນໍາຂອງພັກ, ເຮັດໃຫ້ພັກມີຄວາມປອດໃສທາງດ້ານແນວຄິດ,ມີຄວາມເຂັ້ມແຂງທາງດ້ານການຈັດຕັ້ງ, ມີຄວາມໜັກແໜ້ນທາງດ້ານການເມືອງ, ມີແບບແຜນວິທີເຮັດວຽກທີ່ທັນສະໄໝປະຕິບັດຕາມຫຼັກການລວມສູນປະຊາທິປະໄຕ, ໄປຄຽງຄູ່ກັບການປະຕິບັດກົດລະບຽບຂອງພັກຢ່າງເຂັ້ມງວດ, ວຽກງານກໍ່ສ້າງພະ ນັກງານໂດຍປະຕິບັດຄາດໝາຍບຸກທະລຸດ້ານການພັດທະນາຊັບພະຍາກອນມະນຸດໄດ້ສົ່ງສະມາຊິກພັກ,ພະນັກງານ-ນັກຮົບ ໄປຍົກລະດັບທາງດ້ານວິຊາສະເພາະ ແລະທິດສະດີການເມືອງ-ການປົກຄອງທັງພາຍໃນ ແລະຕ່າງປະເທດເພື່ອເຮັດໃຫ້ກໍາລັງມີຄວາມເຕີບໃຫ່ຍທາງດ້ານປະລິມານ ແລະ ຄຸນນະພາບ, ໄດ້ປະຕິບັດວຽກງານນະ ໂຍບາຍຍ້ອງຍໍ, ເລື່ອນຊັ້ນ, ປະດັບຊັ້ນໃຫ້ນາຍ ແລະພົນຕໍາຫຼວດຜູ້ທີ່ມີຜົນງານດີເດັ່ນ, ເອົາໃຈໃສ່ເບີ່ງແຍງພະນັກງານ-ນັກຮົບ ໃນເວລາເຈັບເປັນ, ນອນໂຮງໝໍ, ເສຍຊີວິດ ແລະນະໂຍບາຍອື່ນໆຕາມຄວາມສາມາດ, ໄດ້ອໍານວຍຄວາມສະດວກໃຫ້ 2 ອົງການຈັດຕັ້ງມະຫາຊົນຊາວໜຸ່ມ-ແມ່ຍິງເຄື່ອນໄຫວໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ, ເອົາໃຈໃສ່ຊີ້ນໍາໆພາເຫຼົ່າຮົບວິຊາສະເພາະເຄື່ອນໄຫວເຮັດວຽກງານຕາມພາລະບົດບາດ, ສິດ ແລະ ໜ້າທີ່ເປັນຕົ້ນແມ່ນເຮັດວຽກ ງານຮັກສາຄວາມສະຫງົບຄວາມເປັນລະບຽບຮຽບຮ້ອຍຂອງສັງຄົມໃນການຕ້ານ, ສະກັດກັ້ນບັນດາປາກົດການຫຍໍ້ທໍ້ຕ່າງໆທີ່ເກີດຂຶ້ນພາຍໃນແຂວງໃຫ້ຫຼຸດໜ້ອຍຖອຍລົງ,ສ່ວນວຽກງານຫ້ອງການ,ວຽກງານພາລາທິການ ແລະວຽກງານວິຊາສະເພາະດ້ານອື່ນໆກໍແມ່ນສາມາດເຮັດສໍາເລັດຢ່າງມີປະສິດທິພາບສູງ,ໂອກາດດຽວກັນບັນດາຜູ້ກອງປະຊຸມຍັງໄດ້ປະກອບຄໍາຄິດຄໍາເຫັນໃສ່ຮ່າງບົດລາຍງານການເມືອງ 2 ພາກ, ໃນກອງປະຊຸມດັ່ງກ່າວໄດ້ຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການຮັບຮອງເອົາລາຍຊື່ຜູ້ລົງສະໝັກ ແລະ ມາດຖານເງື່ອນໄຂຜູ້ທີ່ຈະສະໝັກເຂົ້າເປັນຄະນະບໍລິຫານງານພັກກອງບັນຊາການ ປກສ ແຂວງບໍລິຄໍາໄຊ ກອງປະຊຸມໃນຄັ້ງນີ້ ຍັງໄດ້ປ່ອນບັດເລືອກຕັ້ງເອົາຄະນະບໍລິຫານງານພັກກອງບັນຊາການ ປກສ ແຂວງບໍລິຄໍາໄຊ,  ເລືອກເອົາເລຂາ, ຮອງເລຂາ, ປະທານ ແລະຮອງປະທານກວດກາເພື່ອສືບຕໍ່ຊີ້ນໍາໆ ພາກໍາລັງໃຫ້ມີຜົນງານອັນໃຫຍ່, ເຕີບໃຫຍ່ເຂັ້ມແຂງກວ່າເກົ່າພ້ອມທັງປ່ອນບັດຄັດເລືອກເອົາຜູ້ທີ່ທີ່ເປັນຕົວແທນໃຫ້ແກ່ອົງຄະນະພັກກອງບັນຊາ ການ ປກສ ແຂວງ, ເຂົ້າຮ່ວມກອງປະຊຸມໃຫຍ່ອົງຄະນະພັກແຂວງບໍລິຄໍາໄຊ, ກອງປະຊຸມຄັ້ງນີ້ແມ່ນຈະໄດ້ດໍາເນີນໄປເປັນເວລາ 2 ວັນຈຶ່ງຈະສໍາເລັດ.

__________

ຂຽນໂດຍ: ພອນສະຫວັນ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ສົນໃຈລົງໂຄສະນາໄດ້ທີ່:  021 313645, 316511

แชร์